Բնապահպանութեան նախարարութիւնը կը նախատեսէ Գառնիի մէջ ճոպանուղի կառուցել: Այս մասին Փետրուար 10-ին լրագրողներու հետ հանդիպման ժամանակ ըսած է նախարար Արծուիկ Մինասեան` նշելով, որ իրենք մօտ 180 միլիոն տոլարի ներդրումային ծրագիրներ պիտի իրականացնեն։

«Մենք մեր ներկայ քաղաքականութիւնը որդեգրած ենք շրջակայ միջավայրի պահպանութեան ուղղուող ֆինանսական աղբիւրներու համախմբման եւ նպատակային ծրագիրներու իրականացման ուղութեամբ»- PanARMENIAN.Net-ի փոխամցմամբ՝ ըսած է Արծուիկ Մինասեան:

Մանրամասնելով Գառնիի ճոպանուղիի ծրագիրը, նախարարը նշած է, որ անիկա կը ներառէ Քարերու սիմֆոնիայի յուշարձանը ու Խոսրովի անտառ արգելոցը:

«Կ՛ուզենք իրականացնել ծրագիր, որ ուղիղ կապ պիտի ունենայ նաեւ Խոսրովի անտառ արգելոցի հետ եւ հետաքրքրական շղթայ պիտի ապահովէ: Ընդհանուր նպատակն է ունենալ ճոպանուղի, որ կ’ապահովէ ելքը ձորի վրայէն եւ այցելուները կը տանի Քարերու սիմֆոնիայի մօտ»,- ըսած է նախարարը` աւելցնելով, որ նախնական գնահատմամբ ծրագիրը կ’արժէ մօտ 5 միլիոն տոլար:

Ան նշած է, որ այժմ կ’աշխատին նախագծումներու վրայ: Կը նախատեսուի կառուցել նաեւ կամուրջ եւ զբօսաշրջիկներու համար նախատեսուած տեղեկատուական կեդրոններ:

Իրանի նախագահ Հասան Ռոհանի իսլամական յեղափոխութեան 38-րդ տարեդարձին առթիւ Հինգշաբթի օր հանդիպում ունեցած է Թեհրանի մէջ հաւատարմագրուած դեսպաններու եւ միջազգային կազմակերպութիւններու ներկայացուցիչներու հետ:

Իրանի նախագահը, անդրադառնալով տարածաշրջանային անվտանգութեան եւ շրջանին մէջ խաղաղութիւն հաստատելու ուղղուած Իրանի ջանքերուն, նշած է. «Այն ատեն, երբ Իրանի հիւսիսը՝ Հայաստանի եւ Ազրպէյճանի միջեւ Ղարաբաղի բարձունքներուն վրայ բախումներ տեղի կ’ունենային, Իրան երկու ճակատներու վրայ ալ գործօն ներկայութիւն ունեցաւ, որպէսզի պատերազմի կրակը հանգեցնէ եւ տարածաշրջանին մէջ խաղաղութիւն հաստատէ», կը հաղորդէ “Փանորամա”-ն:

Փետրուար 9-ին եւ լոյս 10-ի գիշերը ղարաբաղա-ազրպէյճանական հակամարտ զօրքերու սահմանագիծին վրայ արձանագրուած է հակառակորդին կողմէ հրադադարի խախտումներու աճ:

ԼՂՀ ՊՆ մամուլի ծառայութեան հաղորդմամբ` նշուած ժամանակահատուածին մէջ հակառակորդը 60 եւ 82 միլիմեթրնոց ականանետերէ, տարբեր տիպի նռնականետերէ ու հրաձգային զինատեսակներէ հրադադարը խախտած է շուրջ 70 անգամ` հայ դիրքապահներու ուղղութեամբ արձակելով աւելի քան 1000 կրակոց: Առաւել բուռն խախտումներ արձանագրուած են առաջնային գիծի արեւելեան, հարաւային եւ հիւսիս-արեւելեան ուղղութիւններով: Նշուած հատուածներուն մէջ ազրպէյճանական զինուժը ականանետէ ու նռնականետերէ ընդհանուր առմամբ արձակած է 34 արկեր, որոնցմէ 24-ը ականանետերէ, 10-ը` նռնականետերէ:

ՊԲ առաջապահ զօրամասերը կը տիրապետեն մարտավարական իրադրութեան առաջնագիծի վրայ` խիստ անհրաժեշտութեան պարագային պատասխանելով հակառակորդին նախայարձակ գործողութիւններուն:

ՀՀ վարչապետ Կարէն Կարապետեանի գլխաւորութեամբ կառավարութեան հետ տեղի ունեցած է Ֆրանսախօս պետութիւններու եւ կառավարութիւններու ղեկավարներու 17-րդ գագաթնաժողովի նախապատրաստման եւ իրականացման միջգերատեսչական յանձնաժողովին անդրանիկ նիստը: Այս մասին կը հաղորդէ ՀՀ արտաքին գործոց նախարարութեան մամուլի վարչութիւնը։

ՀՀ ԱԳ նախարար Էդուարդ Նալպանտեան նշած է, որ Հայաստանի մէջ, 2018-ին, պիտի կազմակերպուի ֆրանսախօս երկիրներու գագաթնաժողովը եւ մեր երկիրը երկու տարի ժամկէտով պիտի ստանձնէ այս խորոշագոյն` 84 անդամ, զուգորդուած  եւ դիտորդ երկիրներ ու կառավարութիւններ ընդգրկող կառոյցին նախագահութիւնը: ԱԳ նախարարին խօսքով` Հայաստանը առաջին անգամ է, որ պիտի իրականացնէ այս կարգի բարձր մակարդակի, ծաւալի եւ միջազգային ընդգրկուածութեամբ ձեռնարկ: Կ’ակնկալուի, որ գագաթնաժողովին մասնակցին շուրջ հինգ տասնեակ պետութիւններու եւ կառավարութիւններու ղեկավարներ, կը նախատեսուի նաեւ Ֆրանսախօս երկիրներու 31 գործընկեր կառոյցներու պատուիրակութիւններու մասնակցութիւնը:

Կ’ակնկալուի հարիւրէն աւելի պատուիրակութիւններու ժամանումը, ընդհանուր հիւրերուն քանակը պիտի հասնի մինչեւ 4000 մարդ: Երկօրեայ գագաթնաժողովի մեկնարկէն երեք օր առաջ պիտի կայանայ արտաքին գործոց նախարարներու համաժողովը, որուն պիտի նախորդէ նաեւ մշտական խորհուրդին նիստը: Գագաթնաժողովին կարեւոր տեղ պիտի յատկացուի այնպիսի ուղղութիւններուն, ինչպէս կայուն զարգացումը, նորարարութիւնը,  տեղեկատուական ճարտարագիտութիւնները, մշակութային բազմազանութիւնը, երիտասարդութեան հարցերը եւ այլն: Ձեռնարկը հնարաւորութիւն կ’ընձեռէ կազմակերպել տնտեսական գործարար ատեան`  ֆրանսախօս երկիրներու ընկերութիւններու եւ ձեռնարկութիւններու լայն ներկայացուածութեամբ: Ատոր ծիրէն ներս՝ առաջարկուած է իրականացնել հայկական ապրանքատեսակներու եւ ծառայութիւններու ցուցահանդէս, որուն միջոցով պիտի ներկայացուին Հայաստանի ներդրումային եւ առեւտրատնտեսական հնարաւորութիւնները, մեր երկրի զբօսաշրջային գրաւչութիւնը:

Վարչապետ Կարապետեան կարեւոր համարած է մեր երկրին մէջ նման ծաւալով ձեռնարկի բարձր մակարդակով կազմակերպումը եւ նշած. «Հետաքրքրական իրադարձութիւն է, հետաքրքրական հարթակ, օգտագործելով այս հնարաւորութիւնը` կրնանք լաւագոյնս ներկայացնել Հայաստանը եւ ալ աւելի ճանաչելի դարձնել մեր երկիրը»:

Վարչապետը շահագրգիռ գերատեսչութիւններու ղեկավարներուն յանձնարարած է ՀՀ արտաքին գործոց նախարարութեան գլխաւորութեամբ ստեղծուած աշխատանքային խումբին մէջ ներգրաւելու համար նշանակել յստակ պատասխանատուներ:

ՀՀ Վարչապետ Կարէն Կարապետեանի գլխաւորութեամբ կառավարութեան հետ շարունակուած է ՀՀ պետական կառավարման մարմիններու գնահատուած կատարողականներու եւ ՀՀ կառավարութեան 2016-ի գործունէութեան ձեռնարկներու ծրագիրի ու գերակայ խնդիրներու կատարման մասին հաշուետւութիւններու քննարկումը: 2016-ի ձեռնարկներու ծրագիրի եւ գերակայ խնդիրներու իրականացման արդիւնքներուն մասին զեկուցած է ՀՀ սփիւռքի նախարար Հրանոյշ Յակոբեան:

Նախարար Յակոբեան՝ անդրադառնալով 2016-ի ձեռնարկներու ծրագիրի եւ գերակայ խնդիրներու իրականացման արդիւնքներուն, նշած է, որ շարունակուած են Սուրիայէն Հայաստան տեղափոխուած փախստականներու կեցութեան, կրթութեան, աշխատանքի եւ այլ հարցերու լուծման ուղղուած աշխատանքները: Կարեւոր համարուած են Սփիւռքի հայ երիտասարդութեան մէջ հայոց լեզուի իմացութեան մակարդակի բարձրացման նպաստող քայլերը: Յաջողութեամբ իրականացած են «Սփիւռք» ամառնային դպրոց, «Արի տուն» ծրագիրները, մասնակիցներուն համար 2016-ին եւս կազմակերպուած են հայոց լեզուի արագացած դասընթացներ: Նախարարը նշած է, որ 2016-ին Հայաստանի Հանրապետութեան եւ Արցախի Հանրապետութեան 25-ամեայ յոբելեաններուն նուիրուած են նախարարութեան բոլոր ծրագիրները, «Իմ Հայաստան» համահայկական փառատօնը, որ աննախադէպ եղած է մասնակիցներու թիւով:

Հրանոյշ Յակոբեան զեկուցած է նաեւ 2017-ի գերակայ խնդիրներուն մասին` Հայաստան տեղափոխուած սուրիահայերու եւ իրաքահայերու խնդիրներու լուծման ուղղուած աշխատանքներու համակարգում, սուրիահայերու բնակարանային խնդիրներու լուծման նպատակով աջակցութեան տրամադրում, մասնագիտական վերապատրաստումներու իրականացում, աջակցութիւն Հայաստանի մէջ գործող սփիւռքահայերու հասարակական միաւորումներու գործունէութեան, սփիւռքահայ ուսուցիչներու եւ երիտասարդներու համար Երեւանի մէջ հայոց լեզուի (արեւմտահայերէնի եւ արեւելահայերէնի) արագացուած դասընթացներու կազմակերպում եւ այլն:

Վարչապետ Կարապետեան կարեւոր համարած է նախարարութեան գործունէութիւնը սփիւռքահայութեան հետ կապերու ամրապնդման գործին մէջ եւ նշած,- «Մենք ձեր օղակները, հարթակը պէտք է օգտագործենք, որպէսզի ստանանք բազմապատկուած ազդեցութիւն: Մեզի պէտք է կառավարման մշակոյթ, շփում մեր հայրենակիցներուն հետ: Իբրեւ հաւանական դեսպաններ` յայտնի, յաջողակ հայերու միջոցով պէտք է բարձրացնենք մեր երկրին ճանաչելիութիւնը, զարգացնենք կառավարման մշակոյթը»:

Ազգային ժողովի պատգամաւորները երէկ ` Փետրուար 8-ին, մեկնաբանած են Պելառուսիոյ կողմէ յայտնի պլոկըր Ալեքսանտըր Լափշինը Ազրպէյճանին արտայանձնումը, կը հաղորդէ «Նիուզ»-ը։

Ըստ «Ազատ դեմոկրատներ» կուսակցութեան նախագահ Խաչատուր Քօքոբելեանի` Հայաստանի Ազգային ժողովը պէտք է իր դիրքորոշումը յայտնէ տեղի ունեցածին վերաբերեալ:

«Երէկ բոլորս տեսանք, թէ ինչպէս մեր բարեկամ Պելառուսիան յայտնի պլոկըրը անօրինական արտայանձնեց մեր հակառակորդ Ազրպէյճանին: Ասիկա մարդու ազատ խօսքի իրաւունքի խախտում է, զայն կը մեղադրեն Արցախ այցելելու եւ իր մտքերը տեսակէտները հնչեցնելու համար: Մենք պէտք չէ բաւարարուինք այստեղ կամ այնտեղ խօսելէն, Ազգային ժողովը իր դիրքորոշումը պէտք է յայտնէ»,- ըսած է Խաչատուր Քօքոբելեան:

Էդուարդ Շարմազանով` իբրեւ հայ-պելառուսական յանձնաժողովի համանախագահ, Պելառուսիոյ այս քայլը որակեց խայտառակ, որ չի բխիր խաղաղ կարգաւորման տրամաբանութենէն. «Այս քայլը նաեւ Ռուսիոյ ու Հայաստանի դէմ է»:

ՀՅԴ խմբակցութեան քարտուղար Աղուան Վարդանեան յայտնեց՝ յուզական ելոյթներով հարցը չի լուծուիր: Ելոյթները պէտք է ըլլան յստակ եւ հասցէական: «Աւելի ճիշդ կ’ըլլայ խորհրդարանական յայտարարութիւն տարածել եւ միանշանակ դատապարտել»,– ըսած է Վարդանեան:

ՀԱԿ խմբակցութեան պատգամաւոր Նիկոլ Փաշինեան առաջարկեց ՝ ժամը 15:00-ին հաւաքուիլ Հայաստանի մէջ, Պելառուսիոյ դեսպանատան դիմաց` կոշտ դիրքորոշումը յայտնելու համար:

«Սա իր քաղաքական նշանակութեամբ հաւասար է Հունկարիոյ կողմէ Ռամիլ Սաֆարովը արտայանձնելուն»,- ըսած է Նիկոլ Փաշինեան:

Քանի մը պատգամաւորներ ալ պահանջած են սառեցնել ՀԱՊԿ անդամակցութիւնը, ետ կանչել Պելառուսիոյ մէջ Հայաստանի դեսպանը:

«Աննախադէպ լկտիութիւն է եւ ցինիզմ (շնականութիւն,լրբութիւն), այստեղ ամենամեծ ընելիքը ունի Հայաստանի Հանրապետութիւնը, եթէ ինքզինք կը համարէ արժանապատիւ պետութիւն, լաւ կ’ըլլայ, որ սառեցնենք մեր անդամակցութիւնը ՀԱՊԿ-ին, ետ կանչենք մեր դեսպանը»,- յայտարարած է Նայիրա Զոհրապեան:

Հրանդ Բագրատեան նոյնպէս յորդորած է յստակ քայլերու դիմել, ոչ թէ բոցաշունչ եւ հայրենասիրական ելոյթներ ունենալ: Ինչ կը վերաբերի Հայաստանի խորհրդարանի քայլերուն, պատգամաւորները առաջարկեցին վեց խմբակցութիւններով դատապարտող բանաձեւ պատրաստել կամ ԱԺ նախագահը յանձնարարէ արտաքին յարաբերութիւններու յանձնաժողովին ի մի բերել բոլոր կարծիքներն ու դատապարտող յայտարարութիւն տարածել:

Ազգային ժողովի նախագահ Գալուստ Սահակեան, սակայն, կը կարծէ` պէտք չէ հապճեպ որոշումներ կայացնել. «Աւելի լուրջ մտայնութիւններ պէտք են եւ ատիկա սովորական խնդիր չէ, եւ յառաջիկային որոշակի ուղերձներ պիտի ըլլան այդ ուղղութեամբ»:

Աւելի առաջ յայտնած էինք, որ Փետրուար 7-ին, Պելառուսիոյ Գերագոյն դատարանը հաստատած է դատախազութեան որոշումը` Ալեքսանտըր Լափշինը Ազրպէյճանին արտայանձնելու մասին: Ան երէկ արտայանձնուեցաւ Ազրպէյճանին:

Ռուսիոյ  եւ Իսրայէլի քաղաքացի Ալեքսանտըր Լափշին ձերբակալուած է 2016-ի Դեկտեմբերին, Մինսկի մէջ` Ազրպէյճանի պահանջով։ Աններառուած է «սեւ ցուցակ»-ի մէջ ԼՂՀ այցելութեան համար:

Պաշտպանութեան բանակի հիւսիսային ուղղութեամբ տեղակայուած զօրամասերէն մէկու պահպանութեան տեղամասին մէջ Փետրուար 8-­ին` մօտ ժամը 11:00­-ին, հակառակորդին կողմէ հրադադարի խախտման հետեւանքով, մահացու վէրք ստացած է ՊԲ պայմանագրային զինծառայող, 1979-ի ծնունդ Գեղամ Հենրիկի Մանուկեանը: Այս մասին կը  տեղեկացնեն ԼՂՀ պաշտպանութեան նախարարութեան մամուլի ծառայութենէն:

Դէպքի մանրամասնութիւնները պարզելու համար կը կատարուի քննութիւն:

Նոյն օրը հակամարտ զօրքերու շփման գիծի մէկ այլ (Մարտակերտ) ուղղութեամբ մօտ ժամը 12:00­-ին, կրկին հակառակորդին կողմէ հրադադարի խախտման արդիւնքով, ծանր վիրաւորուած է ՊԲ ժամկէտային զինծառայող, 1988-ի ծնունդ Կորիւն Կամոյի Կիրակոսեանը:

Կը կատարուի քննութիւն: ԼՂՀ պաշտպանութեան նախարարութիւնը կը կիսէ կորստեան ծանր վիշտը եւ իր զօրակցութիւնը կը յայտնէ զոհուած զինծառայողի ընտանիքի անդամներուն, հարազատներուն եւ ծառայակիցներուն:

Ինչպէս թուրք յայտնի ցեղասպանագէտ Թաներ Աքչամ եւս կ’արձանագրէ «Հայերու բռնի իսլամացումը. լռութիւն, ժխտում եւ ուծացում» գիրքին մէջ, օսմանեան իշխանութիւնները Հայոց ցեղասպանութեան ընթացքին կրօնափոխուած հայերուն որոշ ժամանակ, մասնաւորապէս մինչեւ 1915-ի Յուլիս 1-ը, թոյլ տուած են, դաւանափոխ ըլլալու պարագային, զերծ մնալ տեղահանութենէն, սակայն Յուլիս 1-էն մինչեւ նոյն տարուան Նոյեմբեր 4-ը արգիլուած է հաւատափոխ հայերու համար նման բացառութիւն ընելը:

Արդ, ստորեւ Akunq.net-ը կը հրապարակէ 1915-ի Նոյեմբեր 4-ին Թալիաթի կողմէ Օսմանեան կայսրութեան բոլոր նահանգապետներուն ուղարկուած օսմաներէն հեռագրի պատճէնը եւ ատոր արեւմտահայերէն թարգմանութիւնը: Սոյն փաստաթուղթէն պարզ կը դառնայ, որ վերստին թոյլ տրուած կրօնափոխութիւնը ոչ բոլորին կը վերաբերի եւ կը կարգաւորուի` ըստ որոշ սկզբունքներու:

Արեւմտահայոց հարցերու ուսումնասիրութեան կեդրոնին սոյն փաստաթուղթը տրամադրած եւ թարգմանած է ամերիկաբնակ պոլսահայ ուսումնասիրող Գէորգ Յակոբեանը: