Կիրակի, 08. 06. 2025

Հիմնական Էջ Բլոգ էջ 2137

Սպանիոյ Թագաւորը Ջանքեր Գործադրած Է Փրկելու Դանիէլ Վարուժանը

0

Վերջերս Արեւմտահայոց Հարցերու Ուսումնասիրութեան կեդրոնը հրապարակած էր որոշ փաստաթուղթեր, ըստ որոնց`Սպանիոյ թագաւոր Ալֆոնսօ 13-րդը փորձեր էր փրկել 1915 թ. Ապրիլ 24-ին ձերբակալուած հայ մտաւորականութեան որոշ ներկայացուցիչներ: Քանի որ այդ վաւերագրերը մեծ հետաքրքրութիւն առաջացուցին գիտնականներու եւ ընդհանրապէս մեր բոլոր ընթերցողներուն մօտ, Akunq.net-ը ստորեւ կը հրապարակէ նաեւ 1916 թ. Մայիսին Օսմանեան կայսրութեան մէջ Սպանիոյ ներկայացուցիչին պաշտօնական նամակը` ուղղուած տուեալ ժամանակաշրջանին Թուրքիոյ Արտաքին Գործոց նախարար Հալիլ Մենթեշէին: Նամակը կը պարզաբանէ, թէ Սպանիոյ թագաւորը 1916 թուականին տեղեակ չէր, որ Դանիէլ Վարուժանը եւ միւս հայ մտաւորականները արդէն սպանուած էին օսմանեան իշխանութիւններու հրամանով, եւ դեռ յոյսեր կը փայփայէր զանոնք փրկելու:

Փաստաթուղթը Արեւմտահայոց Հարցերու Ուսումնասիրութեան կեդրոնին տրամադրած է օսմանեան արխիւէն զայն յայտնաբերած ամերիկաբնակ պոլսահայ Գէորգ Յակոբեանը, իսկ ֆրանսերէնէ հայերէն թարգմանած է կեդրոնի թրքերէն բաժինի պատասխանատու Մելինէ Անումեանը:

«10 Մայիս 1916 թ.

Թուրքիոյ մէջ Սպանիոյ ներկայացուցչութիւն

Պարո՛ն նախարար,

Ընթացիկ ամսուան 1-ին եւ 8-ին պատիւ ունեցայ հանդիպումներ ունենալու Ձերդ գերազանցութեան հետ: Այդ հանդիպումներուն քննարկուած այն մի քանի հայերու թեմայի առումով, հայեր, որոնց ազատ արձակումը խնդրուած էր Նորին մեծութիւն տիրակալիս կողմէ, Ձեր թոյլտուութեամբ կը ցանկամ յաւելել, որ Դանիէլ Վարուժան անուամբ յիշատակուած անձը կը կրէ Դանիէլ Չպուգեարեան անունը, եւ որ Վարուժան անունը, որով ան յայտնի է, իրականութեան մէջ անոր գրական կեղծանունն է:

Իմ ունեցած տեղեկութիւններուս համաձայն` վերոյիշեալ անձը ձերբակալուած է 1915 թ. Ապրիլ 11-24-ին, եւ միւս բանտարկեալներուն հետ միասին ուղարկուած՝ Չանքըրը, ուր ան մնացեր է առնուազն մինչեւ նոյն տարուան Օգոստոս 7-20-ը, իսկ այնտեղէն ալ հաւանաբար ուղարկուած է Այիաշ:

Կը շտապեմ Ձեր գերազանցութեան յայտնել այն ինչ որ տեղի ունեցած է մինչ այժմ, քանի որ կը ցանկամ դիւրացնել անոր որոնումը, զոր հրահանգուած է օսմանեան կառավարութեան կողմէ, եւ օգտուելով առիթէն` կը տեղեկացնեմ, որ քիչ առաջ նոր հրահանգներ ստացեր եմ, ըստ որոնց` պէտք է աշխուժացնեմ քայլերս` վերոնշեալ անձանց խնդրի ուղղութեամբ:

Կանխաւ երախտագիտութիւս կը յայտնեմ Ձերդ գերազանցութեան` վերոյիշեալ որոնումներուն արդիւնքի մասին յառաջիկային զիս տեղեկացնելու համար, որպէսզի ես կարելիութիւն ունենամ հնարաւորինս շուտով պատասխանելու Նորին մեծութիւն Սպանիոյ թագաւորին:

Պարո՛ն նախարար, ընդունեցէ՛ք, խնդրեմ, խորին յարգանքներուս հաւաստիքը»:

Ֆրանսերէնէ թարգմանեց Մելինէ Անումեանը

12

13

Մակեդոնացիի Կտակը` Գրաբարով. Լոնտոնաբնակ Պատմաբանի Յայտնագործութիւնը

0

Լոնտոնաբնակ պատմաբան Տէյվիտ Կրանդը կը պնդէ, որ տաս տարի փնտռտուքներէ ետք յայտնաբերած է Ալեքսանդր Մակեդոնացիի կտակը: The Daily Mail պարբերականը հրապարակած է կտակին լուսանկարը, որ գրուած է գրաբարով:

Փաստաթուղթին մէջ տեղ գտած են Ալեքսանդրի ծրագիրները կայսրութեան վերաբերեալ, ինչպէս նաեւ հրահանգներ իր յուղարկաւորութեան առնչութեամբ եւ ժառանգներու անունները:

Կրանդը նշած է, որ Ալեքսանդր Մակեդոնացիի կտակը ոչ մէկը չէ թաքցուցած, անիկա յայտնաբերուած է հնագոյն ձեռագիրի մը մէջ, որ յայտնի է Alexander Romance (Ալեքսանդրի վէպը) անունով: Ժողովածուն կը պարունակէ պատմութիւններ եւ հեքիաթներ, որոնք կը պատմեն զօրավարի սխրանքներուն մասին: Կը նշուի, որ պատմութիւնները գրի առնուած են անոր մահէն մօտ 100 տարի անց, կը գրէ armradio.am-ը:

Մոսկուայի «Հայորդաց Տան» Սաները Հանդիպեցան ՀՀ ԶՈՒ Հրամանատարին Հետ

0

Յունուար 29-ին Մոսկուայի «Հայորդաց տան» սաները հանդիպած են  ՀՀ ԶՈՒ հրամանատար Արթուր Խաչատրեանի հետ, որ իրենց հանդիպումէն մէկ օր առաջ արժանացած էր Գարեգին Նժդեհ շքանշանին, ինչպէս «Հայերն այսօր»-ին կը յայտնեն «Հայորդաց տան» տեղեկատուական կեդրոնէն` հանդիպման ընթացքին, որ նուիրուած էր ՀՀ ԶՈՒ կազմաւորման 25-ամեակին, հրամանատարը պատմած է իր անցած մարտական ուղիէն եւ ստացած ռազմական կրթութենէն:

«Կարմիր տիպլոմով, ոսկէ մետալով աւարտած եմ Չինաստանի ռազմական ակադեմիան: 88 երկրի 500 ուսանողնորէ  գերազանց յառաջադիմութիւն ունեցած են 7-ը, որոնցմէ մէկը ես եղած եմ: Համոզուած եմ, որ ով որ ալ ըլլար Հայաստանէն այնտեղ ուսանող` դարձեալ գերազանց յառաջադիմութիւն կ’րձանագրէր, քանի որ բոլորիս նպատակն ալ մեր երկրի դրօշը բարձր պահելն է: Աշխատած ենք, որ այնտեղ ուսանող օտարերկրացիները, որոնք մեր երկրին մասին բան չեն լսած` տեսնեն մեր դրօշը, հետաքրքրուին Հայաստանով, Հայոց պատմութեամբ»,- անդրադառնալով ուսումնառութեան` ըսած է առաջին կրթութեամբ իրաւաբան Արթուր Խաչատրեան:

Այնուհետեւ սաները հարց ու պատասխանով հետաքրքրուած են, թէ ինչ կը պակսի հայոց բանակին, ինչ մակարդակի վրայ է մարտական ոգին եւ, որպէս զինուորական, ինչ գնահատական կու տայ հրամանատարը ապրիլեան պատերազմի ժամանակ մեր զինուորներու գործողութիւններուն:

«Կային սպաներ, որոնք չէին պատկերացներ, որ այդ զինուորները նման սխրանքներ կը գործեն: Քիչերը կը պատկերացնէին, որ անոնց մէջ այնպիսի եռանդ, ոգի կայ, որմով կրցան ատոնց դէմը առնել: Անոնք ծնած են պատերազմէն յետոյ` մութ ու ցուրտ տարիներուն, սուղ պայմաններու մէջ մեծցած տղաներ են: Բայց ատիկա չէ ազդած անոնց մարտական ոգիին, տեսակին վրայ, եւ անոնք ամէն վայրկեան  կրնան անգամ անձնազոհութեամբ պաշտպանել ազգը»,- ըսաւ հրամանարտարը:

Շնորհակալութիւն յայտնելով Արթուր Խաչատրեանին հետաքրքիր հանդիպման համար`  «Հայորդաց տան» հոգեւոր տեսուչ Տէր Առաքել քահանայ Ամիրեան ըսած է․ «Մեր հայոց բանակին, սպաներուն ուժ, կարողութիւն, որ երբեք ու երբեք չյուսալքուին եւ իրենց քրիստոնէական հաւատքը բարձր պահելով առաջ երթան ու պահպանեն մեր հայրենիքը, որ ապացուցեցին ապրիլեան պատերազմին ժամանակ: Աղօթենք Աստուծոյ, որ մեր զինուորները ամուր պահէ եւ հայոց երկիրը, հայոց եկեղեցին, հայոց բանակը կանգուն մնան»:

Շնորհակալական խօսքէն ետք Տէր Առաքէլ քահանայ Ամիրեան «Հայորդաց տան» կողմէն Արթուր Խաչատրեանին նուիրեց Արցախի մասին պատմող գիրքեր:

 

 

 

Լաւ Լուր. Հայկական Աշխարհս.com

0

Ուրախութեամբ իմացանք, որ մեր պաշտօնակից ԵՌԱԳՈՅՆ.com-ը կը ստեղծէ մանկապատանեկան արեւմտահայերէն կայք մը (Armlands.com, Հայկական Աշխարհս), որ կը ներառէ երկու բաժին՝ 4-8 եւ 9-16 տարեկաններու համար։

Կայքը կը ներառէ համապատասխան տարիքի հասցէատէրերը հետաքրքրող համապարփակ նիւթեր, տեսանիւթեր, լուրեր եւայլն։ Կայքի ձեւաւորման աշխատանքները պիտի սկսին Փետրուար 21-ին (լեզուի տօնին), իսկ այն հանրութեան պիտի ներկայացուի 2018 թուականի Փետրուար 21-ին։

Ալեքսանդր Սարուխանհի Մահուան 40-ամեակի Նուիրուած Ցուցահանդէս, Հ.Բ.Ը.Մ.-ի Հիմնադրութեան 110-Ամեակի Առթիւ

0

Հ. Բ. Ը. Միութեան հիմնադրութեան 110-ամեակի առիթով, Յունաստանի Կեդրոնական Յանձնաժողովը, կազմակերպեց Ալեքսանդր Սարուխանի մահուան 40-ամեակի նուիրուած ծաղրանկարչութեան ցուցահանդէս, Փ. Ֆալիրօ-ի քաղաքապետութեան հովանաւորութեամբ:Բացումը տեղի ունեցաւ Չորեքշաբթի 25 Յունուար 2017-ին, երեկոյեան ժամը 7-ին, Փ. Ֆալիրօ-ի «Flisvos» Մշակութային Կեդրոնի մէջ:  Ներկայ գտնուեցաւ Ա. Սարուխան-ի թոռնիկը Տիկ. Սիլվա Ներետեան / Բլատեանը: Հանդիսութիւնը իրենց ներկայութեամբ պատուեցին Յունահայոց Թեմի առաջնորդական տեղապահ Տէր Խորէն Վրդ. Առաքելեանը, Տիկ. Աննա Խաչատուրեանը Հայաստանի Հանրապետութեան Հիւպատոս Յունաստանի մօտ, Դոկտ. Հուսէին Մարէյ Եգիպտոսի Արաբական Հանրապետութեան Մշակութային Կցորդ Յունաստանի մօտ, Պրն. Տիոնիսիոս Խածիտագիս Փ. Ֆալիրօ-ի քաղաքապետը, Թեմական Խորհուրդի ներկայացուցիչներ, միութիւններու ներկայացուցիչներ, ինչպէս նաեւ յունահայ հասարակութիւնը:

Օրուան հանդիսավարն էր Հ. Բ. Ը. Միութեան Յունաստանի Կեդրոնական Յանձնաժողովի Գանձապահ՝ Պրն. Սեդրակ Ապասեանը: Բարի գալուստեան մաղթանքներէն ետք, խօսք առաւ Հ. Բ. Ը. Միութեան Յունաստանի Կեդրոնական յանձնաժողովի Ատենապետ՝ Դոկտ. Համբիկ-Սահակ Մարուքեան, ուր պանծացուց միութեան հիմնադրութեան 110-ամեակը: Նաեւ շնորհակալութիւն յայտնեց բոլոր անոնց որոնք իրենց բարոյական օժանդակութեամբ թիկունք կը կանգնին միութեան:

Ապա խօսք առաւ Պրն. Տիոնիսիոս Հածիտագիս Փ. Ֆալիրօ-ի քաղաքապետը: Յայտնեց իր ոգեւորութիւնը եւ ուրախութիւնը այս գործակցութեան համար եւ մանաւանդ որ Հ. Բ. Ը. Միութիւնը կը գործէ իր քաղաքէն ներս: Վերջաւորութեան խօսք առաւ Ա. Սարուխան-ի թոռնիկը՝ Տիկ. Սիլվա Ներետեան/Բլատեանը: Նախ շնորհակալութիւն յայտնեց Հ. Բ. Ը. Միութեան Յունաստանի Կեդրոնական Յանձնաժողովին այս ցուցահանդէսին համար, իսկ յետոյ պատմեց Սարուխանի կեանքի մասին: Հանդիսութեան աւարտին, Հ. Բ. Ը. Միութեան Յունաստանի Կեդրոնական Յանձնաժողովի Ատենապետ՝ Դոկտ. Համբիկ-Սահակ Մարուքեանը յուշատախտակ մը յանձնեց Սարուխան-ի թոռնիկին՝ Տիկ. Սիլվա Ներետեան / Բլատեանին: Ցուցահանդէսը բաց մնաց մինչեւ Կիրակի 29 Յունուար 2017-ը:

5

2

 

4

 

6

 

Ֆրանսայի ՄԷջ Տեղի Ունեցած Է Սփիւռքի Նախարարութեան Պարգեւի Յանձնման Արարողութիւն

0

Ֆրանսայի Կրենոպլի եւ Տոֆինէի հայ մշակոյթի տունը 2015 թուականին մասնակցած է ՀՀ Սփիւռքի նախարարութեան «Հայապահպանութեան գործին մէջ նշանակալի աւանդի համար» համահայկական մրցանակաբաշխութեան եւ 2016 թուականի Հոկտեմբերին կայացած ձեռնարկին ժամանակ արժանացած է «Լաւագոյն հայկական համայնք»  2–րդ կարգի մրցանակի:

Այս առիթով 2017 թուականի Յունուար 24-ին Մշակոյթի տան մէջ տեղի ունեցած է պարգեւի յանձնման պաշտօնական արարողութիւնը, որուն ներկայ էին Կրենոպլի քաղաքապետ, Ֆրանսայի ԱԺ պատգամաւոր Էրիկ Փիոլը, փոխքաղաքպետ Պերնար Մակրեն, Ռոն Ալպի շրջանային խորհուրդի ներկայացուցիչ Նաթալի  Պերանժեն, ծերակուտականներ, ԱԺ պատգամաւորներ եւ հայ համայնքի  ներկայացուցիչներ: Պարգեւի յանձնման առիթով ցուցադրուած է  ՀՀ Սփիւռքի նախարար Հրանոյշ Յակոբեանի շնորհաւորական տեսաուղերձը եւ Մշակոյթի տան 34-ամեայ գործունէութեան վերաբերեալ ֆիլմը:

Ներկայացուած են Կրենոպլ եւ Սեւան քաղաքներու միջեւ համագործակցութեան ծիրէն ներս իրականացուած աշխատանքները: Ձեռնարկին աւարտին մշակոյթի տան հովանիին տակ գործող մէկօրեայ դպրոցի եւ «Սեւան» պարախումբի սաներու մասնակցութեամբ տեղի ունեցաւ համերգ:

Հաղորդագրութիւն

0

Յառաջիկայ Ապրիլին Հայրենիքի մէջ տեղի ունենալիք խորհրդարանական ընտրութիւններուն լոյսին տակ` Ռամկավար Ազատական Կուսակցութեան Կեդրոնական Վարչութիւնը ժողով մը գումարեց՝ քննարկելու համար այդ ուղղութեամբ ՌԱԿ-ի կեցուածքը:

Ժողովին իբրեւ արդիւնք՝ հրապարակուեցաւ հետեւեալ հաղորդագրութիւնը.

Ռամկավար Ազատական Կուսակցութիւնը կ՛ողջունէ Հայրենի պետութեան եւ ժողովուրդին ռամկավարական սկզբունքներուն հանդէպ ունեցած հաւատամքը, որ անցնող 25 տարիներուն արտացոլաց կազմակերպելով ու մասնակցելով ժողովրդավարական ընտրութիւններ, ըլլան անոնք նախագահական, խորհրդարանական, թէ տեղական ինքնավարման ընտրութիւններ:

Ժողովրդավարական սկզբունքներով կազմակերպուած ընտրութիւններն են միայն, որ տուեալ ժողովուրդը մասնակից կը դարձնեն իշխանութեան՝ հետեւաբար իր առողջ կառավարման:

Հիմնուելով վերոյիշեալին վրայ՝ Ռամկավար Ազատական Կուսակցութիւնը կը շեշտէ, թէ չի կրնար բարոյապէս անմասն մնալ ու չզօրակցիլ ժողովրդավարական մշակոյթի տարածման եւ անոր առողջ կիրառման մեր Հայրենիքին մէջ: Հակառակ այս փաստին սակայն, ան պաշտօնապէս կը յայտարարէ, որ ներկայ հանգրուանին՝ նկատի ունենալով, որ աշխարհասփիւռ 95-ամեայ Ռամկավար Ազատական Կուսակցութիւնը առ այժմ զինք իրաւականօրէն ներկայացնող քաղաքական կառոյց մը չունի Հայրենիքի մէջ, ան ո՛չ ուղղակի եւ ո՛չ ալ քաղաքական կամ ընտրական դաշինքներու միջոցաւ պիտի մասնակցի յառաջիկայ Ապրիլի խորհրդարանական ընտրութիւններուն եւ այդ ուղղութեամբ առաջադրուած թեկնածուներ չունի բնականաբար:

Այս առիթով` Ռամկավար Ազատական Կուսակցութեան Կեդրոնական Վարչութիւնը՝ պատմական այս հանգրուանին լաւատեսութեամբ կ՛ողջունէ Հայրենի ժողովուրդը եւ կը խոնարհի ժողովուրդին կամքին առջեւ՝ արդար, խաղաղ եւ թափանցիկ ընտրական գործընթացով ընտրելու զինք լաւագոյնս ներկայացնող թեկնածուներ ի փառս եւ ի յաւերժութիւն մեր ազատ, անկախ եւ ժողովրդավար Հայրենիքին:

Կեցցէ՛ Ժողովրդավարութիւնը:
Կեցցէ՛ Հայ Ժողովուրդը:

Ի Դիմաց՝
ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ
ԿԵԴՐՈՆԱԿԱՆ ՎԱՐՉՈՒԹԵԱՆ

Սեւակ Յակոբեան                                                                                Սերխիօ Նահապետեան

Ատենադպիր                                                                                                  Ատենապետ

4 Փետրուար 2017

 

ՅԱՅՏԱՐԱՐՈՒԹԻՒՆ

0

Վերջերս շրջանառութեան մէջ դրուած է նամակ մը «ՌԱԿ Գերագոյն Խորհուրդ» ստորագրութեամբ, որ կը յաւակնի խօսիլ Ռամկավար Ազատական Կուսակցութեան Սփիւռքի շրջանակներու անունով ներառեալ Պէյրութի:

Հիմնուելով վերոյիշեալին վրայ, Ռամկավար Ազատական Կուսակցութեան Լիբանանի Շրջանային Վարչութիւնը սոյն յայտարարութեամբ կ՛ուզէ միանգամընդմիշտ յստակացնել հետեւեալը.

  1. «ՌԱԿ Գերագոյն Խորհուրդ» անունով մարմին մը գոյութիւն չունի 95 ամեայ Ռամկավար Ազատական Կուսակցութեան կանոնագրութեան մէջ:
  2. Ռամկավար Ազատական Կուսակցութեան Լիբանանի շրջանակը ունի մէկ պաշտօնաթերթ, որն է «Զարթօնք»ը:
  3. Հայրենիքի մէջ յառաջիկայ Ապրիլին տեղի ունենալիք խորհրդարանական ընտրութիւններու կապակցութեամբ աշխարհասփիւռ Ռամկավար Ազատական Կուսակցութեան Կեդրոնական Վարչութիւնը իր 4 Փետրուար 2017-ի հաղորդագրութեամբ յստակացուցած է իր կեցուածքը:

Ի Դիմաց՝
ՌԱԿ Լիբանանի Շրջանային Վարչութեան

Տոքթ. Յակոբ Փափազեան                                          Տոքթ. Աւետիս Տաքեսեան
Ատենադպիր                                                                                             Ատենապետ

5 Փետրուար 2017

 

Ընտրութիւնները Իրենց Ժամանակին Տեղի Պիտի Ունենա՞ն

0
3D, answer, ask, background, business, businessman, cartoon, character, communication, competition, concept, confusion, design, doubt, face, figure, find, graphic, hand, help, human, humorous, icon, idea, illustration, information, illustration, information, isolated, male, man, mark, mind, people, pose, problem, quest, question, red, search, sign, silhouette, solution, strategy, symbol, think, white, why, worry.

*ՍԵՒԱԿ ՅԱԿՈԲԵԱՆ*

Յառաջդիմական Ընկերվար Կուսակցապետ՝ Երեսփոխան Ուալիտ Ժոմպլաթ երէկ կոչ ուղղեց ամբողջութեամբ վերացնել ընտրական օրէնքի համայնքային դրութիւնը համեմատական օրէնք մը քննարկելէ առաջ:

Միւս կողմէ Ազգային Ազատ Հոսանք կուսակցութիւնը կը պահանջէ համայնքային ներկայացուցչութիւն համեմատականի զուգահեռ:

Մուսթաքպալ հոսանքը, իր կողմէ, այնքան ալ կողմնակից չէ համեմատականին:

Լիբանանեան Ուժեր եւ Փաղանգաւոր կուսակցութիւնները կ՛առաջարկեն համեմատական եւ մեծամասնական օրէնքի ձեւանիշ մը:

Կարգ մը կուսակցութիւններ օրակարգի վրայ կը բերեն այն փաստը, որ Թաէֆի համաձայնագիրը համեմատական օրէնք մը չէ նկատուած:

Հիմա դուն ըսէ, սիրելի ընթերցող, երեսփոխանական ընտրութիւնները իրենց ժամանակին պիտի կատարուի՞ն…:

Միայն Աստուած գիտէ:

 

 

«Բախտաւորութի՛ւն Է Հայրենիքի Մէջ Ապրիլը». Ճորճ Բարսեղեան

0

*ԿԱՐԻՆԷ ԱՒԱԳԵԱՆ*

ՀՀ Սփիւռքի նախարարութեան կազմակերպած «Հայրենադարձներու հաւաք» ձեռնարկին մասնակցող մեր հայրենակիցներէն շատերը, հաստատուելով Հայրենիքի մէջ,  կրցած են աշխատանք գտնել, յարմարիլ նոր միջավայրին, ձեռք բերել նոր ընկերներ, լիարժէքօրէն մասնակցիլ Հայրենիքի տնտեսութեան ու մշակութային կեանքի զարգացման աշխատանքներուն: Անոնցմէ մէկուն` սրտաբան Ճորճ Բարսեղեանի հետ,  զրոյց  ունեցայ «Հայերն այսօր»-ի համար, որուն ընթացքին, այս  քանիերորդ անգամ ըլլալով, համոզուեցայ, որ աշխարհի տարբեր ծագերու մէջ ապրող մեր հայրենակիցները ապրած ու կ’ապրին  Հայրենիքով, իսկ Հայրենիքի մէջ հաստատուելով` կը դառնան  անոր սիւներէն, կամարներէն մէկը:

-Պարո՛ն Բարսեղեան, ե՞րբ բռնած էք տունդարձի ճամբան:

-2012-ին եկած եմ` Սուրիոյ մէջ ծաւալած պատերազմական գործողութիւններուն պատճառով: Ընտանիքիս հետ  եկած եմ` ես, տիկինս, երկու աղջիկներս. մեծ աղջիկս`  Նարէն, 17 տարեկան է, տակաւին դպրոց կը յաճախէ, կը պատրաստուի ընդունուիլ Կինոյի եւ թատրոնի ինստիտուտ, փոքր աղջիկս` Մեղրին, 14 տարեկան է: Հայրենիքի մէջ ենք, եւ ատիկա արդէն մեզի համար մեծ ձեռքբերում է: Ես աշխատանք ունիմ. իմ մասնագիտութեամբ  կ’աշխատիմ «Նայիրի» բժշկական կեդրոնին մէջ` որպէս սրտաբան:

-Հայաստանի մէջ ստացած էք բժշկական բարձրագոյն կրթութիւն:

-Այո՛: 1984 թուականին ընդունուած եմ Հերացիի անուան բժշկական համալսարան, աւարտած եմ 1991-ին, որմէ յետոյ, մինչեւ 1996 թուական, մասնագիտացած եմ `որպէս բժիշկ- սրտաբան: Ուսումս աւարտելէ յետոյ մեկնեցայ Սուրիա, յանձնեցի քննութիւնները, բացի սեփական Clinic եւ աշխատանքի անցայ:

-Պարո՛ն Բարսեղեան, եթէ չըլլար սուրիական պատերազմը, օր մը Հայաստանի մէջ  պիտի հաստատուէի՞ք:

-Հայաստան գալու ծրագիր կար, անշու՛շտ.  նոյնիսկ  տարածք մը գնելու, տուն  կառուցելու, գնելու մտադրութիւն ունէի, սակայն սուրիական պատերազմը այս որոշումը  արագացուց: Եթէ Սուրիոյ խնդիրը չըլլար ալ, միեւնոյնն է, մենք պիտի տեղափոխուէինք Հայաստան, եւ ես դարձեալ այստեղ կ’ըլլայի` աւելի լաւ պայմաններով: Ես միշտ տրամադրուած եղած եմ` բռնելու տունդարձի ճամբան: Շատ գոհ եմ, ուրախ` մեր կայացուցած որոշման համար: Դամասկոսի իմ տունս,   բնական վիճակի մէջ է, միշտ ալ կրնամ երթալ ու գալ:

-Որպէս սուրիացի, աշխարհագրական այդ տարածքը տնօրինողներէն, բնակիչներէն մէկը, որպէս կրթուած մարդ` ի՞նչ կը կարծէք, սուրիական պատերազմը արդեօք վերջնականապէս աւարտա՞ծ է, թէ պարզապէս ժամանակաւոր, խաբուսիկ խաղաղութիւն է:

-Սկզբունքօրէն, պատերազմը որքան ալ երկար ըլլայ, այնուամենայնիւ, ժամանակաւոր է: Խաղաղութիւնն է, որ հիմնականն է, մնացեալը ժամանակաւոր է. հետեւաբար, փիլիսոփայական այս մտքերէն ելլելով, պատերազմը անպայման  վերջ ունի` կամ այսօր, կամ ալ `վաղը: Ես կը կարծեմ, որ խաղաղութիւնը արդէն ընթացքի մէջ է Սուրիոյ մէջ եւ, ժամանակաւոր բնոյթ չի կրեր: Ուրիշ հարց է, որ սկսած  որեւէ պատերազմ կրնայ  աւարտիլ պահի եւ ժամի ճշգրտութեամբ,  բան մը, որ Սուրիոյ չի վերաբերիր. Սուրիոյ պատերազմի աւարտը պահի եւ ժամի ճշգրտութիւն չի կրնար ունենալ.  այդ մէկը մարող ալիքներու սկզբունքով  կրնայ ըլլալ, աստիճանաբար:

– Եւ իմ աւանդական հարցս` պարո՛ն  Ճորճ, ի՞նչ է Ձեզի համար Հայրենիքը…

-Հայրենիքն այն է, ուր ինքզինքդ  հիւր չես զգար. սփիւռքահայուն համար Հայրենիքը միշտ ալ մեծ արժէք  եղած է, միշտ` եռաձայն, բայց կայ երկու տեսակի հայրենասիրութիւն` այն, որ դուն կ’ապրիս Հայրենիքի մէջ եւ այն, որ հեռուէն կը սիրես Հայրենիքդ: Իմ տեսակիս համար  ապրելու լաւագոյն վայրը` իր լաւով ու վատով, իր թերութիւններով ու արժանիքներով, սա՛ է, Հայաստա՛նն  է: Բախտաւորութիւ՛ն է Հայրենիքի մէջ ապրիլը:

-Շնորհակալութիւ՛ն յարգելի հայրենակից. շնորհակալութիւ՛ն  քու նուիրումիդ, քու ջերմ խօսքերուդ, քու անկեղծութեանդ համար: Ծննդավայրը կորսնցուցած,  կամ ալ՝  հեռուն ձգած  հայ մարդը, անոր սերունդները,  հարիւրաւոր տարիներ հոգեւոր ու նիւթական արժէքներ   ստեղծելով  այլոց  համար, շէնացնելով  օտարի հողը,  կը վերադառնան  ու պիտի վերադառնան Հայրենիք` միացեալ ուժերով հզօրացնելու Արարիչի նախաստեղծ լեռնաշխարհը:

«Հայերն Այսօր»

1...2,1362,1372,138...2,723էջ 2,137 / 2,723-ից

ԶԱՐԹՕՆՔ ազգային-քաղաքական, հասարակական եւ գրական օրաթերթ է: Հիմնադրուած է 26 Սեպտեմբեր 1937-ին, Լիբանանի մայրաքաղաք Պէյրութի մէջ: ԶԱՐԹՕՆՔ-ի առաջին խմբագիրը եղած է Վահան Թէքէեան։ Պաշտօնաթերթն է Ռամկավար Ազատական Կուսակցութեան: Ունի քաղաքական, լրատուական եւ մշակութային հարուստ բովանդակութիւն։ Իր գոյերթին ընթացքին կարեւոր եւ ազդեցիկ դեր ունեցած է լիբանանահայ կեանքին մէջ։
2013-էն ի վեր անոր գլխաւոր խմբագիրն է Սեւակ Յակոբեան:
Լոյս կը տեսնէ տպագիր եւ ելեկտրոնային տարբերակներով

Դաւանելով ռամկավար եւ ազատական սկզբունքներ, կը հաւատանք բազմակարծութեան եւ ազատ խօսքի իրաւունքի: Հետեւաբար՝ թերթիս եւ կայքիս մէջ հրատարակուած գրութիւնները անպայմանօրէն չեն արտայայտեր խմբագրութեանս տեսակէտը: Կամքէ անկախ սպրդած վրիպակներու պարագային համար ալ, կ'ապաւինինք յօդուածագիրներուն եւ մեր ընթերցողներուն ազնիւ ներողամտութեան:

© 2013 - 2025, Zartonkdaily. All rights reserved. Developed by Abstract.