Հայկական դիվանագիտությունը մեծ դեր է ունեցել Բյուլբյուլօղլուի թեկնածությունը ՅՈՒՆԵՍԿՕ-ի գլխավոր տնօրենի ընտրություններից հետ կանչելու գործում: Այս մասին «Արմենպրես»-ի մամուլի սրահում հրավիրված ասուլիսում նշեց արտակարգ և լիազոր դեսպան, Հայ ռուսական համալսարանի համաշխարհային քաղաքականության միջազգային հարաբերությունների ամբիոնի վարիչ Արման Նավասարդյանը:

«Արտգործանախարարության հետ սկսեցինք աշխատել, եղան բազմաթիվ հանդիպումներ, հոդվածներ, բազմաթիվ կապեր հաստատեցինք տարբեր երկրների հետ: Փաստորեն մենք գործի դրեցինք հանրային դիվանագիտության փափուկ ուժի հնարավորությունները, և դա հոյակապ արդյունք տվեց»,-ասաց Արման Նավասարդյանը` նշելով, որ նման քաղաքական գիծը պետք է շարունակվի:

Իհարկե, հայկական դիվանագիտությունը լավ աշխատեց, սակայն Արման Նավասարդյանն ընդգծեց, որ այդ գործին նպաստեց հենց ինքը Բյուլբյուլօղլուն: «Նրա ելույթը կառանձնացնեի, այն աստիճանի էր, որ ծիծաղ էր առաջացնում ներկաների մոտ, դրանում կովկասյան բաժակաճառեր կային, կարմիր թելի պես ասում էր հետևյալը` ես շատ փող կբերեմ և բոլորիդ համար լավ կլինի: Այն աստիճան, որ ներկաներից մեկն ասաց` դուք միայն փողի մասին եք խոսում, իսկ ինչ ծրագրեր ունեք: Մի խոսքով, և էթիկայի, և դիվանագիտության, և քաղաքական մշակույթի ամենացածր մակարդակն էր»,-ասաց Արման Նավասարյանը: Արդյունքը եղավ այն, որ առաջին փուլում նա ստացավ երկու ձայն, որից հետո Ադրբեջանը պաշտոնապես հանեց նրա թեկնածությունը: Այս ամենը ցույց է տալիս, որ չօգնեցին այն հսկայական ֆինասնական ռեսուրսները, որ Ադրբեջանը դրել էր գործի մեջ:

Հոկտեմբերի 10-ին ՅՈՒՆԵՍԿՕ-ի գլխավոր տնօրենի ընտրությունների երկրորդ փուլում Ադրբեջանի թեկնածու, Ռուսաստանում Ադրբեջանի դեսպան Փոլադ Բյուլբյուլօղլուն դադարեցրել է պայքարն այդ պաշտոնի համար՝ հետ կանչելով իր թեկնածությունը:

58 քվեներից ստանալով 20-ը՝ ընտրություններում առաջատարն է Կատարի թեկնածու դոկտոր Համադ բին Աբդուլազիզ Ալ-Քաուարին: Նա գլխավորում էր թեկնածուների ցուցակը նաև ընտրությունների առաջին փուլում: Ընտրությունների վերջնական արդյունքները հայտնի կդառնան հոկտեմբերի 13-ին:

Հայաստանում այս պահին աջ ղեկով ավտոմեքենաները շահագործումից հանելու վերաբերյալ քննարկումներ չկան: Կառավարության նիստից հետո լրագրողների հետ ճեպազրույցում ասաց ՀՀ տրանսպորտի, կապի և տեղեկատվական տեխնոլոգիաների նախարար Վահան  Մարտիրոսյանը՝ ավելացնելով, որ երբ օպտիմալ լուծումը գտնեն, այն կներկայացնեն հանրությանը:

Նրա խոսքով՝ աջ ղեկով ավտոմեքենաների շահագործման ուղղությամբ համակարգային լուծումներ գտնելու դեպքում տրանսպորտային համակարգը կբարելավվի: «Այդ հարցը պետք է ինչ-որ ձևով լուծվի: Տեսեք, դուք ասում եք՝ ժամանակին արգելեիք, բայց եթե ժամանակին չի արգելվել, գոնե ինչ-որ մի օր պետք է գա, որ կանոնակարգենք»,- «Արմենպրես»–ի փոխանցմամբ, ասաց նա: Դիտարկմանը, թե հնարավո՞ր է, որ ձախակողմյան ղեկով մեքենաների ներմուծման մաքսատուրքերը էժանանան՝ Վահան Մարտիրոսյանը նշեց. «Կան քննարկումներ: Մենք ունենք կոնկրետ համաձայնագիր ԵԱՏՄ-ի հետ, որը 2020 թվականին կմտնի ուժի մեջ: Մաքսային գոտու ընդունած նորմեր ու չափեր կան՝ տոկոսադրույքների մասով»: Հարցին՝ արդյոք աջակողմյան ղեկով մեքենաների երթևեկությունն արգելելու դեպքում պետությունը կաջակցի՞ դրանց վաճառքի կամ ղեկի տեղափոխման հարցում՝ Վահան Մարտիրոսյանը նշեց. «Իսկ եթե չպարտադրվի՞ ղեկը փոխել: Եթե որոշում չկա, ինչի՞ մասին է խոսքը»:

Էլեկտրոնային համակարգի ներդրմամբ կբացառվեն ռիսկերը, կպարզեցվեն մի շարք ընթացակարգեր:

«Արմենպրես»–ի հաղորդմամբ՝ հոկտեմբերի 12-ի լրագրողների հետ հանդիպմանը ՀՀարդարադատության նախարարիտեղակալ Սուրեն Քրմոյանն ասաց, որ այս դրույթը նախատեսված է քրեակատարողական համակարգի 2018-2038 թթ. ռազմավարական ծրագրով:  

«Էլեկտրոնային ծառայությունները ներդնելով՝ մենք  հնարավորություն կունենանք շատ խնդիրներ լուծել: Քրեակատարողական ծառայողների թիվը բավարար չէ: Սակայն նորագույն էլեկտրոնային տեխնոլոգիաների կիրառմամբ կօպտիմալացնենք  քրեակատարողական ծառայողների աշխատանքը»,-ասաց Քրմոյանը:

Բոլոր գործառույթները կիրականացվեն էլեկտրոնային եղանակով՝ դատապարտյալի գործի, տույժերի վարում, դիմումների ներկայացում: Նախնական մշակվել է էլեկտրոնային քրեակատարողական համակարգ, որը դեռ փորձարկման փուլում է: Մոտակա տարիներին համակարգը պետք է կատարելագործվի: Փաստաթղթերի կորելը բացառելու, տույժերի և ծանուցումների համակարգը հստակեցնելու նպատակով կներդրվեն  նոր մոդուլներ:

«Հաճախ մենք ստիպված ենք լինում բողոքի համար հարցում կատարել քրեակատարողական վարչություն, հիմնարկ: Էլեկտրոնային համակարգի շնորհիվ մեր վերահսկողական ծառայությունն անմիջապես կարող է տեսնել անձի տույժերը, սոցիալական, ինչպես նաև առողջական խնդիրները»,-եզրափակեց նախարարի տեղակալը:

 Ադրբեջանի՝ Եվրասիական տնտեսական միությանն անդամակցելու ցանկության պարագայում Հայաստանի դիրքորոշումը կլինի հստակ ու պարզ: Այդ մասին կառավարության նիստից հետո լրագրողների հետ զրույցում հայտարարեց ՀՀ փոխարտգործնախարար Շավարշ Քոչարյանը:

«Ցանկացած պետության՝ ԵԱՏՄ անդամ դառնալը պայմանավորված է բոլոր երկրների համաձայնությամբ: Ադրբեջանը չի դիմել ԵԱՏՄ-ին անդամակցելու հարցով, երբ դիմի՝ մեր դիրքորոշումը շատ հստակ ու պարզ է: Նույնիսկ ԵԱՏՄ-ում դիտորդ դառնալ չի կարող այն պետությունը, որը քայլեր է ձեռնարկում ի վնաս որևէ անդամ պետության և ամբողջ կառույցի: Եթե հաշվի առնենք միայն տնտեսական դաշտը, ապա բավական է նշել, որ միայն շրջափակումը հնարավոր չէ գնահատել այլ կերպ, քան քայլ՝ ի վնաս անդամ պետության»,- «Արմենպրես»-ի փոխանցմամբ, ասաց Շավարշ Քոչարյանը՝ ավելացնելով, որ այդ տեսակետից նույնիսկ դիտորդի մասին խոսք լինել չի կարող, ինչ մնաց անդամակցության:

ԵԱՀԿ Մինսկի խմբի համանախագահների հայտարարությունները գնալով ավելի հասցեական են դառնում, միշտ չէ, որ անունը տրվում է, բայց արդեն հասցեատերը երևում է: Այդ մասին կառավարության նիստից հետո լրագրողների հետ զրույցում նշեց ՀՀ արտաքին գործերի նախարարի տեղակալ Շավարշ Քոչարյանը: «Պատահական չէ, որ համանախագահող երկրները հստակ խոսում են կրակի դադարեցման ռեժիմն ամրապնդելու, սարքավորումներ տեղադրելու, Ադրբեջանի պարտավորությունների կատարման, հետաքննության մեխանիզմի ներդրման մասին և այլն: Գնալով Ադրբեջանը հայտնվելու է միջազգային ճնշման տակ՝ բոլոր պարագաներում, լինի Լեռնային Ղարաբաղի բանակցային գործընթացում, թե եվրոպական կառույցներն այլասերելու հարցում»,- «Արմենպրես»-ի փոխանցմամբ, ասաց Շավարշ Քոչարյանը:

Նրա խոսքով, այսօր Ադրբեջանն իրեն դրել է խաղի կանոններից դուրս ու ակնհայտ է, որ այս պարագայում այդ ամենը չի կարող անվերջ շարունակվել: «Ակնհայտ էր, որ Ադրբեջանի՝ Եվրոպայի խորհրդում կաշառելու գործընթացը կհասնի այն տրամաբանական ավարտին, որին այսօր հասնում է: Նույնը վերաբերվում է Ադրբեջանի սադրիչ գործողություններին՝ կապված բանակցային գործընթացի հետ: Վերջիվերջո, նա գործ ունի ՄԱԿ-ի անվտանգության խորհրդի երեք մշտական անդամների հետ: Վերջիններիս թիվ մեկ առաքելությունը կայանում է նրանում, որպեսզի պատերազմ չլինի աշխարհի որևէ ծայրում, բայց եթե նրանք միջնորդ են և դրանով հանդերձ լինելում են ռազմական գործողություններ, ապա դա ապտակ է ՄԱԿ ԱԽ երեք մշտական անդամներին: Ադրբեջանը դա շատ լավ գիտակցում է և ինչ-որ կերպ փորձում է ազատվել այդ ֆորմատից, ինչը նրան չի հաջողվի»,- ընդգծեց ՀՀ ԱԳ նախարարի տեղակալը:  

Քոչարյանի դիտարկմամբ՝ եթե արցախյան հակամարտության գոտում ինչ-որ չափով նվազել են միջադեպերը, դա պայմանավորված է նրանով, որ հայկական կողմերն ավելի պատրաստ են դրանց, ավելի են համալրվել անհրաժեշտ սարքավորումներով: Անդրադառնալով նրան, որ նախօրեին Տավուշի մարզում նորից հայ զինվոր է զոհվել Ադրբեջանի զինուժի գնդակից՝ ԱԳ փոխնախարարն ասաց. «Ընդհանուր առմամբ մենք գիտենք, որ Ադրբեջանի նպատակն անընդհատ վնաս հասցնելն է: Դա նրանց հետևողական քաղաքականությունն է: Այո, կարևորագույն հանդիպումներից առաջ, ընթացքում, հետո սադրանքներն ավելի հաճախակի են դառնում»,– «Արմենպրես»-ի փոխանցմամբ, նկատեց Շավարշ Քոչարյանը:

Հայաստանում մեծահասակների մոտ աչքի ամենահաճախ հանդիպող հիվանդությունները կատարակտը, գլաուկոման եւ դիաբետիկ ռետինոպատիան են: Երեխաների մոտ հիմնականում գերակշռում են շլությունը, կարճատեսությունն ու հեռատեսությունը:

«Արմենպրես»–ի հետ զրույցում «Ս. Մալայանի անվան ակնաբուժական կենտրոն»-ի  ակնաբույժ,  Աչքի Բանկի տնօրեն Անի Համբարձումյանն ասաց, որ կատարակտն այսօր 100 տոկոս բուժելի հիվանդություն է: Առողջապահության նախարարության նախաձեռնությամբ կուրության կանխարգելման նպատակով Երեւանում եւ մարզերում տեղակայված 8 բժշկական կազմակերպություններում անվճար իրականացվել է  3000 վիրահատություն: «Գլաուկոման հիմնականում ժառանգականորեն է փոխանցվում, իսկ դիաբետիկ ռետինոպատիան հանդիպում է շաքարային դիաբետ ունեցողների մոտ»,-ասաց նա:

Ակնաբույժը խորհուրդ տվեց աչքի հիվանդություններից հնարավորինս խուսափելու համար բոլորին տարեկան մեկ կամ, ցանկալի է, երկու անգամ պրոֆիլակտիկ ստուգում անցնել:

Առողջապահության համաշխարհային կազմակերպության (ԱՀԿ) նախաձեռնությամբ՝ հոկտեմբերի երկրորդ հինգշաբթին նշվում է որպես Տեսողության համաշխարհային օր (World Sight Day): Օրացույցում այս օրը ներառվել է՝ կուրության, տեսողության խանգարումների եւ նման խնդիրներ ունեցող մարդկանց վերականգնման ուղղությամբ գլոբալ ուշադրություն հրավիրելու նպատակով: Այս օրը նաեւ«2020-ի տեսլական. տեսողության իրավունք» կուրության կանխարգելման գլոբալ նախաձեռնությունների հիմնական իրադարձությունն է, որը ստեղծել են ԱՀԿ-ն ու Կուրության կանխարգելման միջազգային գործակալությունը:

Քրոնիկ կուրության առաջատար պատճառներից են կատարակտը, գլաուկոման, դեղին բծի տարիքային դեգեներացիան, ոսպնյակի մթագնումը, տրախոման եւ երեխաների աչքերի հիվանդությունները (օրինակ՝ պայմանավորված A վիտամինի դեֆիցիտով): Աշխարհում ավելի ու ավելի լայն տարածում է ստանում տարիքի հետ, ինչպես նաեւ չվերահսկվող դիաբետի հետեւանքով առաջացող կուրությունը:

Կուրության կանխարգելման միջազգային գործակալության տվյալներով՝ շուրջ 284 մլն մարդ  տեսողության հետ կապված խնդիրներ ունի, նրանցից 39 մլն-ն ընդհանրապես չի տեսնում: Աչքերի  հիվանդություններ ունեն ավելի քան 19 մլն երեխա: Ժամանակին բուժվելու դեպքում կուրության  դեպքերի շուրջ 80%-ից հնարավոր է խուսափել: