Ամերիաբանկի թիմը բանկերի միջև անցկացվող ակտիվների և պարտավորությունների կառավարման առցանց համաշխարհային  8-րդ մրցույթում /virtual Banking/ դուրս է եկել եզրափակիչ փուլ:  Այն տեղի կունենա այս տարվա նոյեմբերի 23-ին Հաագայում: Բացի Ամերիաբանկից, եզրափակիչ փուլ են անցել ևս 3 ընկերություն՝  Bancop SA (Պարագվայ), Supervielle (Արգենտինա) և Ficohsa (Հոնդուրաս): Ինչպես «Արմենպրես»-ին տեղեկացրին Ամերիաբանկի հասարակայնության և հաղորդակցման թիմից, մրցույթին մասնակցել է 30 բանկ  Աֆրիկա, Ասիա, Լատինական Ամերիկա, Եվրոպա/Կենտրոնական Ասիա տարածաշրջաններից:

Մրցույթը վերաբերում է բանկերում  ակտիվների և պարտավորությունների, ինչպես նաև ռիսկերի արդյունավետ կառավարման խնդիրներին: Այն նպատակ ունի նպաստել ֆինանսաբանկային ոլորտի գիտելիքների զարգացմանն ու պրոֆեսիոնալ մակարդակի բարձրացմանը, այլընտրանքային և նորարարական գիտելիքների փոխանցմանը, միջազգային փորձի փոխանակմանը, բանկերում ռիսկերի կառավարման ուժեղացմանն ու զարգացմանը:

Մրցույթը կազմակերպվել է SimArch Group-ի կողմից, ֆինանսաբանկային ուսումնական պորտալի շրջանակներում և ֆինանսավորվել է FMO-ի` Նիդերլանդների միջազգային զարգացման բանկի, DEG-ի` KfW Bankengruppe-ի (KfW բանկային խումբ) անդամի և PROPARCO ֆինանսների զարգացման ֆրանսիական գործակալության կողմից:

SimArch Group-ը դեռևս 1999-ից առաջարկում է նորարական և առաջադեմ ուսուցողական լուծումներ ֆինանսաբանկային ոլորտի մասնագետների համար՝ ստեղծելով կրթական մեծ հնարավորություններ: Ընկերության կրթական ծրագրերը հաջողությամբ կիրառվել են ավելի քան 45 երկրի 170 ընկերությունների կողմից, որոնց շարքում են այնպիսի խոշորագույն բանկեր, ինչպիսիք են՝ ABN AMRO,  ING, FirstRand, Dexia և այլն:

«Ամերիաբանկ» ՓԲԸ Հայաստանի դինամիկ զարգացող բանկերից է և դասվում է երկրի ամենակայուն և խոշոր  ֆինանսականհաստատությունների շարքին: Այն Հայաստանում առաջին ներդրումային բանկն է և սկսած 2007թ–ից` տրամադրում էնորարարական բանկային ծառայությունների լայն տեսականի: «Ամերիաբանկ» ՓԲԸ  ունիվերսալ բանկ է, որը մատուցում էկորպորատիվ, ներդրումային և մանրածախ բանկային  ծառայություններ` տրամադրելով բանկային լուծումների ամբողջականփաթեթ: Լրացուցիչ տեղեկությունների համար կարող եք    այցելել www.ameriabank.am:

 Կառավարության որոշումներով «Էյ Բի Էնջինիրինգ» և «ԱԱ Թրաքս» ՍՊԸ-ներին տրամադրվել է «Ալյանս» ազատ տնտեսական գոտու շահագործողի թույլտվություն: 

ՀՀ տնտեսական զարգացման և ներդրումների նախարար Սուրեն Կարայանը նշեց, որ «Էյ Բի Էնջինիրինգ» ընկերությունը նախատեսում է կազմակերպել բազմաֆունկցիոնալ ցանցային սարքերի նախագծում, համապատասխան ծրագրային ապահովության նախապատրաստում, ինչպես նաև առանձին բաղկացուցիչ մասերից պատրաստի արտադրանքի հավաքում: «2018թ-ին արտահանման ծավալները կկազմեն միջինում 0,8 մլն ԱՄՆ դոլար, իսկ 5-րդ տարում` 3-4 մլն դոլար: Արտահանման ուղղությունները կլինեն ԵՄ, ԱՄՆ, Ասիական երկրները։ Ներդրումը կկազմի շուրջ 2,8 մլն դոլար, առաջին տարում կստեղծվի 5 նոր աշխատատեղ` 190 հազար դրամ միջին աշխատավարձով, իսկ հետագայում արտադրանքի ծավալների աճի արդյունքում՝ 25 նոր աշխատատեղ»,- «Արմենպրես»-ի փոխանցմամբ, ասաց նախարարը:

Ըստ նրա, «ԱԱ Թրաքս»-ը կկազմակերպի նորարարական տեխնոլոգիաներով բազմաֆունկցիոնալ բեռնատար ավտոմեքենաների արտադրություն: Նախատեսված է, որ արտահանման ծավալները ծրագրի 5-րդ տարում կկազմեն 25 մլն դոլար: Արտահանման ուղղություններն են՝ ԵԱՏՄ երկրներ, Իրան, Վրաստան, ԱՄՆ, Մերձավոր Արևելքի և Միջին Ասիայի երկրներ: Ծրագրի շրջանակում ներդրումը կկազմի մոտ 40 մլն դոլար, առաջին երկու տարում կստեղծվի 40 նոր աշխատատեղ՝ 150 000 դրամ միջին աշխատավարձով, իսկ հետագայում արտադրանքի ծավալների աճի արդյունքում՝ 1000-ից ավելի նոր աշխատատեղ:

Հայաստանում 2-12-րդ դասարանների սովորողներին աշնանային արձակուրդներ կտրամադրվեն 2017թ. հոկտեմբերի 30-ից նոյեմբերի 5-ը ներառյալ, առաջին դասարանցիներին՝ հոկտեմբերի 23-ից նոյեմբերի 5-ը ներառյալ:

Այս մասին «Արմենպրես»-ին տեղեկացրին ՀՀ կրթության և գիտության նախարարությունից: Հետևյալ օրերը սահմանված են  ՀՀ ԿԳ նախարար Լևոն Մկրտչյանի հրամանով հաստատված  «Հանրակրթական հիմնական ընդհանուր պետական ծրագրեր իրականացնող ուսումնական հաստատությունների 2017-2018 ուսումնական տարվա օրինակելի ուսումնական պլանների»՝ համաձայն:

Ըստ ուսպլանի՝ դպրոցականների  ձմեռային արձակուրդները կմեկնարկեն 2017թ. դեկտեմբերի 25-ից. 3-12-րդ դասարանցիների  ձմեռային արձակուրդը կտևի  մինչև 2018թ. հունվարի 7-ը ներառյալ:

Առաջին և երկրորդ դասարանցիների ձմեռային արձակուրդները  ավելի երկար են, նրանք կհանգստանան 2017թ. դեկտեմբերի 25-ից 2018թ. հունվարի 21-ը ներառյալ:

ՀՀ կառավարությունը հաստատեց «Զինված ուժերի ներքին ծառայության կանոնագրքի», «Ռազմաարդյունաբերական համալիրի մասին», «Ռազմական ոստիկանության մասին» և այլ օրենքներում փոփոխություններ կատարելու որոշման նախագծերի փաթեթը:

«Արմենպրես»-ի փոխանցմամբ, ՀՀ պաշտպանության նախարարի տեղակալ Արտակ Դավթյանը նշեց, որ նախագծի ընդունումը պայմանավորված է ՀՀ Սահմանադրության փոփոխությունների հետ կապված օրենքի մի շարք դրույթների վերանայման անհրաժեշտությամբ: Այսպիսով, ըստ նախագծի՝ ՀՀ ԶՈւ ներքին ծառայության կանոնագրքում վերանայման կարիք ունեն զինծառայողների համազգեստի և տարբերանշանների, զորամասի մարտական դրոշի նկարագրի հաստատման ու զորամասին հանձնման հետ կապված դրույթները:

Փոփոխություններ են նախատեսվում նաև «Այլընտրանքային ծառայության մասին» ՀՀ օրենքում, որոնք ևս պայմանավորված է սահմանադրական փոփոխություններով:

 «Սանիթեք» ընկերությունը նախորդ շաբաթվա ընթացքում ավելացրել է Երևանի մի շարք հասցեներում տեղադրված աղբամանների թիվը։ Ավելացված աղբամանները բոլորովին նոր են և տեղադրվել են այն հասցեներում, որտեղ ամռան ամիսների ընթացքում աղբամանները վնասվել կամ անհետացել էին՝ առաջացնելով աղբահանության հետ կապված լրացուցիչ խնդիրներ։ Թվով 225 աղբամաններն արդեն տեղադրվել են մայրաքաղաքի Կենտրոն, Արաբկիր, Դավթաշեն, Զեյթուն, Ավան և Աջափնյակ վարչական շրջաններում։

«Արմենպրես»-ին ընկերությունից հայտնում են, որ դիտարկվել են նաև «Սանիթեք» ընկերությանն ուղղված նամակներում բնակիչների կողմից նշված հասցեները, և նպատակահարմարության դեպքում այդ հասցեներում ևս տեղադրվել են լրացուցիչ աղբամաններ։ Առաջիկայում կմեկնարկի նաև մյուս վարչական շրջաններում աղբամանների տեղադրման գործընթացը։

«Սանիթեք» ընկերությունը ևս մեկ անգամ հորդորում է Երևան քաղաքի բնակիչներին խնամքով վերաբերվել աղբամաններին և աղբը նետել միայն աղբամանների մեջ։ Հիշեցնենք նաև, որ աղբամանները նախատեսված չեն շինարարական աղբի համար, իսկ կենցաղային աղբն ավելի նպատակահարմար է նետել առանձին տոպրակներով՝ կապված վիճակում։ Այս մոտեցումը մեծ ջանքեր չի պահանջի բնակիչներից, սակայն դրական ազդեցություն կունենա «Սանիթեք» ընկերության աշխատակիցների ամենօրյա աշխատանքի որակի վրա։ Համագործակցելով, լավ սովորություններ ձևավորելով և փոխադարձ հարգանքի միջոցով միայն հնարավոր է քաղաքն ավելի մաքուր պահելու մշակույթ ձևավորել։

«Սանիթեք» ընկերության մեկ աղբամանն արժե 360 եվրո։ Ընկերությունն այս պահին պատվիրել է 700 նոր աղբաման, որոնցից 425-ն արդեն տեղադրվում են քաղաքում։