Ջերմուկում տեղի ունեցան Եվրոպայի պատանեկան «Գրան պրի»  մրցաշարի 8-րդ տուրի պարտիաները:

«Արմենպրես»–ի հաղորդմամբ` մրցաշարի միանձնյա առաջատար Կիրիլ Շևչենկոն տոնեց իր 7-րդ հաղթանակը. այս տուրում նրա մրցակիցն էր Սերգեյ Լոբանովը:
2-րդ հորիզոնականում ընթացող Արամ Հակոբյանը պարտվեց Վյաչեսլավ Զարուբիցկուն, իսկ լավագույն եռյակը եզրափակող Շանթ Սարգսյանը հաղթեց Եվրոպայի պատանեկան «Գրան պրի» մրցաշարի առաջին փուլի հաղթող Կիրիլ Շուբինին:
Մեր երրորդ ներկայացուցիչը՝ 4-րդ հորիզոնականում ընթացող Մամիկոն Ղարիբյանը, պարտվեց նորվեգացի Թոր-Ֆրեդրիկ Կաասենին:
Արսենի Նեստերովը կարևոր հաղթանակ տոնեց Ստեֆան Պողոսյանի նկատմամբ և բարձրացավ 4-րդ հորիզոնական:  Անհաջող մեկնարկից հետո 2-րդ անընդմեջ հաղթանակը տոնեց Պաուլյուս Պուլտինյավիչյուսը:
8-րդ տուրից հետո 7.5 միավորով աղյուսակը շարունակում է վստահորեն գլխավորել Ուկրաինան   ներկայացնող  Կիրիլ Շևչենկոն, ով 2-րդ հորիզոնականում ընթացող Հայաստանի   ներկայացուցիչ Շանթ Սարգսյանին   գերազանցում է 1  միավորով: Արամ Հակոբյանը 6 միավորով եզրափակում է լավագույն եռյակը: 4-րդ հորիզոնականում գտնվող  Արսենի Նեստերովն իր ակտիվում ունի 5.5 միավոր, Մամիկոն Ղարիբյանը և Վյաչեսլավ Զարուբիցկին վաստակել են 4.5-ական միավոր և կիսում են 5-6-րդ հորիզոնականները:

 ՀՀ արտակարգ իրավիճակների նախարար Դավիթ Տոնոյանն ընդունել է ՄԱԿ-ի եվրոպական տարածաշրջանի աղետների ռիսկի նվազեցման գրասենյակի ղեկավար Պաոլա Ալբրիտոյին: Ինչպես «Արմենպրես»-ին տեղեկացրին ՀՀ արտակարգ իրավիճակների նախարարությունից, հանդիպման ընթացքում քննարկվեցին Հայաստանում աղետների ռիսկի նվազեցման, կանխարգելման, աղետների հետևանքների վերացման մեխանիզմների և մեթոդաբանության կատարելագործման հնարավորությունները՝ կիրառելով այս բնագավառում եվրոպական լավագույն փորձը:

Իր խոսքում ԱԻ նախարարը նշեց, որ պետության համար ավելի քիչ ծախսատար, բայց և ավելի արդյունավետ է գումար ներդնել աղետների կանխարգելման գործընթացում, քան աղետից հետո վերացնել վերջինիս հետևանքները: Այս համատեքստում կողմերը կարևորեցին հոկտեմբերի 13-ին «Դիմակայունություն հանուն կայուն զարգացման» եռօրյա միջազգային համաժողովի շրջանակներում ՀՀ ազգային ժողովում կայանալիք լսումները՝  «Աղետների ռիսկերի կառավարման բնագավառում ազգային կարողությունների զարգացումը» թեմայով: Սա կարող է հաջողված սկիզբ դառնալ աղետների կանխարգելման մշակույթը նաև օրենսդրական դաշտում ձևավորելու համար:

Կողմերը քննարկեցին նաև աղետների ռիսկի նվազեցման ռազմավարությունը տարածաշրջանային և պետական մակարդակներից համայնքային մակարդակներում ներդնելու հիմնախնդիրը՝ նշելով, որ յուրաքանչյուր համայնքի համար կենսականորեն անհրաժեշտ է ունենալ աղետների ռիսկերի նվազեցման սեփական մարտավարությունը: Բարձր գնահատելով Հայաստանի փորձը աղետների ռիսկի նվազեցման ռազմավարության մշակման գործընթացում՝ Պաոլա Ալբրիտոն նշեց, որ տարածաշրջանային մակարդակում Հայաստանն այս հարցում, անշուշտ, առաջատարներից է:

Հանդիպման ավարտին ՄԱԿ-ի եվրոպական տարածաշրջանի աղետների ռիսկի նվազեցման գրասենյակի ղեկավարն այցելեց ՀՀ ԱԻՆ Ճգնաժամային կառավարման ազգային կենտրոն՝ ծանոթանալու «911» ծառայության գործառույթներին: 

 «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:

ՀՀ ԱԺ պաշտպանության եւ անվտանգության հարցերի մշտական հանձնաժողովն այսօր` հոկտեմբերի 13-ին, կազմակերպում է «Աղետների ռիսկերի կառավարման բնագավառում ազգային կարողությունների զարգացումը» թեմայով խորհրդարանական լսումներ:

ՀՀ ՊՆ «Բաղրամյան» զորավարժարանում շարունակվում է «Փոխգործակցություն 2017» զորավարժությունը: Այն անցկացվում է ՀԱՊԿ Օպերատիվ արձագանքման հավաքական ուժերի համակազմերի ու ՀՀ ԶՈՒ և ՌԴ ԶՈՒ զորքերի (ուժերի) միացյալ խմբավորման ստորաբաժանումների հետ: Լրատվամիջոցների ներկայացուցիչները հնարավորություն կունենան ներկա գտնվել զորավարժության ակտիվ՝ կրակային փուլին:

Մսի, կարագի և այլ ապրանքների շուկայում թանկացումները շարունակում են մնալ մասնագետների ուշադրության կենտրոնում: Հրավիրված մամուլի ասուլիսին թեմայի վերաբերյալ իրենց դիտարկումները կներկայացնեն տնտեսագետներ Թաթուլ Մանասերյանն ու Վիգեն Խաչատրյանը:

Լրագրողների հետ կհանդիպի ՀՀ ԿԳՆ գիտության պետական կոմիտեի նախագահ Սամվել Հարությունյանը: Նա կներկայացնի կոմիտեի ծրագրերը:

Մեկնարկում է Սրտաբանների եվրակովկասյան 6-րդ համաժողովը: «Ակցիա Առողջություն Հայաստան-Ֆրանսիա» կազմակերպության նախաձեռնությամբ, ՀՀ սփյուռքի նախարարության, ՀՀ առողջապահության նախարարության աջակցությամբ կմեկնարկի «Սրտաբանության եվրակովկասյան 6-րդ համաժողովը»: Համաժողովին կմասնակցեն 38 օտարազգի և սփյուռքահայ անվանի սրտաբաններ՝ Ֆրանսիայից, Մոնակոյից, Մեծ Բրիտանիայից, Լիբանանից, Ռուսաստանից, Ղազախստանից, Իրանից, Իտալիայից: Շուրջ 250 սրտաբաններ Հայաստանից և Արցախից կմասնակցեն համաժողովի շրջանակներում կազմակերպվող սեմինարներին: Համաժողովի նպատակն է նպաստել սրտաբանության ոլորտի զարգացմանը, աշխարհի հայ սրտաբանների ներուժի համախմբմանը:

Այսօր գրող, հրապարակախոս, թարգմանիչ, Հայաստանի գրողների միության նախկին նախագահ,  Հայաստանի Հանրապետության մշակույթի վաստակավոր գործիչ Լևոն Անանյանի ծննդյան օրն է: Այդ առթիվ  Գրողների միությունում այսօր կանցկացվի երիտասարդ ստեղծագործողներին Լեւոն Անանյանի անվան մրցանակների հանձնման արարողություն:

Կոմիտասի անվան կամերային երաժշտության տանը Խաչատրյանի 5-րդ միջազգային փառատոնի շրջանակներում տեղի կունենա Հայաստանի պետական երիտասարդական նվագախմբի պղնձափողային անսամբլի ելույթը։ Ծրագրում կհնչեն Դմիտրի Շոստակովիչի, Յան Սիբելիուսի, Ռիխարդ Վագների, Մարտին Ուլիխանյանի, Թեդ Ջոնսի ստեղծագործություններից։ Խաչատրյանի միջազգային փառատոնն անցկացվում է ՀՀ Նախագահի հովանու ներքո։

Ռուսաստանի ցանցացատկի (բատուտ) ազգային հավաքականի գլխավոր մարզիչ Ալեքսեյ Ռիժկովը և Հայաստանի ցանցացատկի ֆեդերացիայի հիմնադիր, նախագահ, Գինեսի հնգակի ռեկորդակիր Դավիթ Ֆահրադյանը կհանդիպեն լրագրողների հետ: Նրանք կխոսեն ոլորտում Հայաստանի և Ռուսաստանի համագործակցային շրջանակների և Հայաստանում իրականացվող ապագա ծրագրերի մասին:

Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:

Հոկտեմբեր 16-ին` ժամը 11:00-ին, Տաթեւի վանական համալիրի բակին մէջ տեղի պիտի ունենայ Հայաստանի պետական ազգային ակադեմիական երգչախումբի համերգը` խմբավար Յովհաննէս Չէքիճեանի ղեկավարութեամբ, կը հաղորդէ «Մեդիամաքս»-ը:

Համերգը տեղի պիտի ունենայ «Հայաստանի զարգացման նախաձեռնութիւններ» (IDeA) հիմնադրամի նախաձեռնութեամբ` «Տաթեւի վերածնունդ» ծրագրի ծիրէն ներս:

Հոկտեմբեր 16-ին կը լրանայ «Տաթեւեր» ճոպանողիի գործարկման 7-րդ տարին:

Համերգային ծրագրի ընթացքին պիտի հնչեն հայ, ռուս, եւրոպացի երգահաններու ստեղծագործութիւններ:

Համերգը կը կազմակերպուի Տաթեւի վանքի յարակից համայնքներու բնակիչներու, զբօսաշրջիկներու եւ բոլոր ցանկացողներու համար:

«Տաթեւի Վերածնունդ» նախագիծը վանական ու զբօսաշրջային բաղադրիչներու համադրման միջոցով նպատակ ունի բարձրացնել Տաթեւի վանական համալիրի դերն ու նշանակութիւնը, եւ տարածաշրջանը դարձնել զբօսաշրջութեան գրաւիչ կեդրոն: