Ազգային ժողովի պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանը կարծում է, որ ղարաբաղյան հակամարտության շուրջ բանակցային գործընթացի վերսկսումը կարեւոր նշանակություն կարող է ունենալ բոլոր կողմերի համար:

«Արմենպրես»-ի հաղորդմամբ՝ նա այս մասին ասաց հանձնաժողովի նախաձեռնությամբ հրավիրված «Աղետների ռիսկերի կառավարման բնագավառում ազգային կարողությունների զարգացումը» թեմայով խորհրդարանական լսումներից հետո՝ ի պատասխան լրագրողների հարցին, թե ինչ ակնկալիքներ ունի Հայաստանի եւ Ադրբեջանի նախագահների՝ հոկտեմբերի 16-ին  Ժնևում կայանալիք հանդիպումից:

Նրա խոսքով՝ ակնկալիքները գնահատելիս պետք է հաշվի առնել  հանդիպմանը նախորդող ժամանակահատվածում տեղի ունեցած իրադարձությունները:

«Այդ առումով որեւէ դրական բան չեմ կարող ասել, որովհետեւ Ադրբեջանը շարունակաբար խախտում է հրադադարի ռեժիմը, իրականացնում է ագրեսիվ գործողություններ, որոնք փաստում են միայն մի բանի մասին, որ հազիվ թե մոտակա ժամանակահատվածում  կարելի է ակնկալել այդ երկրի քաղաքականության վերանայում: Բայց բոլոր դեպքերում սպասենք՝ տեսնելու համար, թե ինչ ընթացք կունենան այդ բանակցությունները: Գուցե որոշակի անակնկալներ լինեն այս պահին, որեւէ բան չենք կարող բացառել»,-ասաց Կորյուն Նահապետյանը:
Նա վստահեցրեց, որ հայկական կողմը հավատարիմ է իր դիրքորոշմանը, իսկ Սանկտ Պետերբուրգում ու Վիեննայում ձեռք բերված բոլոր պայմանավորվածությունները անհրաժեշտ է կյանքի կոչել:

«Հուսամ՝  այդ հանդիպման քննարկումների առանցքում կլինեն այդ հարցեր: Գիտենք, որ խոսքը միջադեպերի հետաքննության մեխանիզմների ստեղծման, ԵԱՀԿ հատուկ ներկայացուցչի մանդատի ընդլայնման եւ ձեռք բերված մյուս բոլոր պայմանավորվածությունների իրականացման մասին է: Մենք հետեւողական ենք մեր մոտեցումներին.  իհարկե, որոշակիորեն կարող են նոր, ճկուն մոտեցումներ ցուցաբերվել՝ կախված բանակցությունների ընթացքից»,-նշեց ԱԺ պատգամավորը՝ հավելելով, որ կարեւոր է Արցախի ժողովրդի անվտանգության ապահովումը, ինչի հարցում Հայաստանի Հանրապետությունն ունի իր ստանձնած պարտավորությունները:

Երիտասարդներին ՀՀ պետական գերատեսչություններում աշխատելու հնարավորություն ընձեռող «Yes Armenia» ծրագրին հոկտեմբերի 10-ի դրությամբ դիմել են ավելի քան 170 անձ:

Ինչպես լրագրողների հետ հանդիպմանը տեղեկացրեց ծրագիրն իրականացնող Ռազմավարական  նախաձեռնությունների կենտրոնի (ՌՆԿ) գործադիր տնօրեն Ալեքսանդր Խաչատուրյանը, դիմողների 30-40 տոկոսը սփյուռքից են: «Ծրագիրն իրականացնում ենք Եվրամիության տեխնիկական և ֆինանսական աջակցությամբ, որի շրջանակներում ազգությամբ հայ կամ ՀՀ քաղաքացիություն ունեցող շուրջ 20 երիտասարդ 12 ամիս կաշխատեն ՀՀ  նախարարություններում և պետական այլ գերատեսչություններում»,-ասաց Խաչատուրյանը` ավելացնելով, որ ծրագրի մեկնարկը կտրվի նոյեմբերին:

«Yes Armenia» ծրագրի նպատակն է մշակել և իրականացնել այնպիսի ռազմավարական  նախաձեռնություններ և նախագծեր, որոնքկնպաստեն Հայաստանի զարգացման ռազմավարական, ինչպես նաև ՀՀ  կառավարության 2017-2022 թթ. ծրագրերով նախատեսվածառանցքային բարեփոխումների իրականացմանը,  և համահունչ  կլինեն ԵՄ – Հայաստան գործընկերության առաջնահերթություններին։ Երիտասարդ փորձագետների  գլխավոր խնդիրն է լինելու այս առաջնահերթությունների և բարեփոխումների հետ կապված հա տուկծրագրերի  մշակումն ու իրականացումը։

«Հանունկայուն մարդկային զարգացման» ասոցիացիայի նախագահ, բնապահպան Կարինե Դանիելյանը, ով մասնակցում էր ՀՀ ԱԺ պաշտպանության եւ անվտանգության հարցերի մշտական հանձնաժողովի նախաձեռնությամբ հրավիրված «Աղետների ռիսկերի կառավարման բնագավառում ազգային կարողությունների զարգացումը» թեմայով խորհրդարանական լսումներին, իր զեկույցում անդրադարձ կատարեց քաղաքաշինության ոլորտում առկա խնդիրներին: Նա, մասնավորապես, որակեց Երեւանի վերջին տարիների կառուցապատումը բացարձակ հակաէկոլոգիական  եւ նշեց, որ այն բարձրացրել է աղետների ռիսկերը:

«Ըստ Կառավարության նախնական որոշման՝ Հյուսիսային պողոտայի շենքերը չպետք է բարձր լինեին Օպերայի և բալետի ակադեմիական թատրոնի շենքից, բայց այսօր տեսնում ենք, թե ինչ բազմահարկեր են այնտեղ: Կարծես այդ բազմահարկերը հատուկ կառուցվում են հենց դպրոցների կողքին՝ հաճախ մի քանի մետր հեռավորությամբ»,-նշեց բնապահպանը՝ ընդգծելով, որ երկրաշարժերի ժամանակ դրանք անչափ մեծ վտանգ են պարունակում:  

Բնապահպանը խոսեց նաեւ պոչամբարներից՝ նշելով, որ Հայաստանում այսօր կա 21 պոչամբար, որոնցից ոչ մեկը որեւէ ստանդարտի չի համապատասխանում:

«Ախթալայի պոչամբարը, օրինակ, շատ մոտ է դպրոցին, կողքը խմելու ջրի աղբյուրն է»,- ասաց բնապահպանը:  

Քաղաքապետ Տարոն Մարգարյանը հանդիպել է «Էրեբունի-Երևան 2799» տոնական միջոցառումներին մասնակցելու նպատակով Երևան ժամանած Ֆրանսիայի Դրագինյան քաղաքի  քաղաքապետի առաջին տեղակալ Պրիմոզելլի Քրիստինի գլխավորած պատվիրակության հետ: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, ողջունելով հյուրերին՝ քաղաքապետ Տարոն Մարգարյանը նախ շնորհակալություն է հայտնել  հրավերն ընդունելու համար և համոզմունք հայտնել, որ այս այցը ևս իր դրական ազդեցությունը կունենա Երևանի Մալաթիա-Սեբաստիա վարչական շրջանի և Դրագինյան քաղաքի միջև առկա փոխգործակցությունն ու գործընկերային կապերն էլ ավելի ամրապնդելու և ընդլայնելու գործում:

«Երևանի քաղաքապետարանը տարեցտարի ընդլայնում է քույր և գործընկեր քաղաքների հետ համագործակցության ծրագրերը, որոնց շրջանակում ոչ միայն իրականացվում են փոխշահավետ ծրագրեր, այլ նաև ամրապնդվում են տվյալ քաղաքներում հայ համայնքների հետ կապերը: Լավագույն ապացույցը, թերևս, պատվիրակության կազմում նաև Դրագինյանի հայ համայնքի ներկայացուցչի ընդգրկված լինելն է: Իսկ ընդհանուր առմամբ, մեզ համար, անշուշտ, կարևոր է նաև տարբեր պետությունների քաղաքների հետ Երևանի 12 վարչական շրջանների համագործակցությունը: Այս համատեքստում է նաև այս տարվա մարտ ամսին Մալաթիա-Սեբաստիա վարչական շրջանի և Ֆրանսիայի Դրագինյան քաղաքի  միջև Երևանում վերաստորագրված բարեկամության հուշագիրը, որը, համոզված եմ, լավ մեկնակետ է արդյունավետ փոխագործակցությունը երկուստեք ամրապնդելու համար», – նշել է Տարոն Մարգարյանը:

Դրագինյան քաղաքի  քաղաքապետի առաջին տեղակալ Պրիմոզելլի Քրիստինն իր հերթին շնորհակալություն է հայտնել հրավերի համար և, շնորհավորելով Երևանի քաղաքապետին՝ մայրաքաղաքի տոնի առթիվ, նաև ընդգծել է, որ սա լրացուցիչ առիթ է` քննարկելու համագործակցության ծրագրերի ընթացքը, և նախանշել առաջիկա անելիքները:

«Ես նույնպես վստահ եմ, պարոն քաղաքապետ, որ առաջիկայում մենք հնարավորություն կունենանք էլ ավելի ընդլայնել համագործակցության շրջանակներն ու նոր թափ հաղորդել երկուստեք փոխգործակցությանը: Ի դեպ, իսկապես հիացած ենք Ձեր ջերմ և հյուրընկալ քաղաքի տոնական մթնոլորտով: Իրոք հաճելի է գտնվել Երևանում և դառնալ այս տոնի լիարժեք մասնակիցը», – նշել է Պրիմոզելլի Քրիստինը:

Շնորհակալություն հատնելով ջերմ խոսքերի համար` քաղաքապետ Տարոն Մարգարյանը Դրագինյան քաղաքի  պատվիրակության անդամներին հրավիրել է հաջորդ տարի՝ Դրագինյանի քաղաքապետի գլխավորությամբ, կրկին այցելել Երևան՝ մասնակցելու Էրեբունի-Երևանի հիմնադրման 2800-ամյակին նվիրված հոբելյանական միջոցառումներին: