Ուժեղ քամու մասին կանխատեսումների պատճառով Հայաստանի դպրոցներից երեխաներին և մանկարավարժներին տուն ուղարկելը պայմանավորված է զգուշավորությամբ: Այս մասին «Արմենպրես»-ի հետ զրույցում տեղեկացրեց ՀՀ ԿԳՆ հասարակայնության հետ կապերի և տեղեկատվության վարչության պետ Արթուր Բաղդասարյանը:

«ՀՀ կրթության և գիտության նախարարությունը ՀՀ արտակարգ իրավիճակների նախարարությունից ստացված տեղեկության համաձայն` զգուշացրել է հանրապետության ուսումնական հաստատությունների բոլոր ղեկավարներին` այդ մասին իրազեկել ծնողներին և շահառուներին` պահպանել նման իրավիճակների համար նախատեսված անվտանգության համապատասխան կանոնները` բացառելով տվյալ ժամանակահատվածում երեխաների դրսում գտնվելու հանգամանքը»,-նշում են ՀՀ ԿԳՆ-ից:

Ավելի վաղ ԱԻՆ-ից հայտնել էին, որ քամու ուժգնացման վտանգ կա (25-30 մ/վ արագություն) Լոռու, Գեղարքունիքի ու Տավուշի մարզերում: Հնարավոր է կոտրվեն ծառեր և վնասվեն տանիքներ, ուստի հորդորում են բնակչությանը մնալ շինությունների ներսում: ԱԻՆ-ի կողմից Երևանում և հանրապետության մյուս հատվածներում նման ուժեղ քամիներ չեն կանխատեսվել:

Հանրապետության տարբեր մարզերի և մայրաքաղաքի բնակիչներից ստացած հեռախոսազանգերից տեղեկացել ենք, որ թե մանկապարտեզներից, թե դպրոցներից աշակերտներին ու մանկավարժներին տուն են ուղարկել` կանխատեսվող «փոթորիկի» վտանգներից խուսափելու համար:

Հայաստանի և Ադրբեջանի նախագահների հանդիպումը տեղի է ունենում Հայաստանի համար բարենպաստ պայմաններում: «Արմենպրես»–ի մամուլի սրահում հրավիրված ասուլիսում քաղաքագետ Ալեքսանդր Մանասյանը նշեց, որ աշխարհաքաղաքական տեսանկյունից  տեղի են ունենում հետաքրքիր զարգացումներ, որոնք շահեկան են Հայաստանի համար:

Վերջին 2, 3 տարիների ընթացքում կարևոր տեղաշարժեր են եղել: «Եվրոպան հասկացել է, թե ում հետ գործ ունի և վերջին բացահայտումները` կապված ադրբեջանական լվացքատան, մարդու իրավունքների շարունակական խախտման հետ, Եվրոպային հուշել են, որ այլևս չի կարող Ադրբեջանին հին ձևով հանդուրժել Եվրոպայի խորհրդի կազմում: Հետևաբար` ձեռնարկում է դաստիարակչական քայլեր: Սկսում է մի երկար գործընթաց, որի ընթացքում փորձում է փոխել այդ երկիրը, ինչպես անում է Թուրքիայի դեպքում: Այս իրավիճակում Ադրբեջանն արդեն կներկայանա ոչ թե որպես երկիր, որը բարձր ձայնով խոսում է ժողովրդավարության մասին, Հայաստանին էլ մեղադրում ագրեսիայի մեջ, այլ նա դեռ պետք է ապացուցի, որ արժանի է լինել եվրոպական ընտանիքի անդամ»,-ասաց Ալեքսանդր Մանասյանը: Ըստ նրա`այդ իմաստով Ադրբեջանն ու Թուրքիան դառնում են նույն գործընթացներում հայտնված պետություններ, աշխարհը, ի դեմս Եվրոպայի, փորձում է փոխել այդ երկրների քաղաքական վարքը:

Մյուս կողմից, ըստ քաղաքագետի, նույն Եվրոպան ամենայն հավանականությամբ Հայաստանի հետ կունենա փաստաթուղթ, որի գլխավոր բովանադակությունն այն է, որ համակրում է Հայաստանին, համարում է  քաղաքակրթական արժեքներ դավանող  պետություն: Ալեքսանդր Մանասյանը նկատեց, որ նման ուղերձ Հայաստանն ստացել է նաև ԱՄՆ-ից: Երբ ընթանում էին ՀԱՊԿ զորավարժությունները, ամերիկյան գեներալը հայտարարել է, որ Հայաստանի հետ խորացնում են ռազմական համագործակցությունը, և ռուսական զորքերն այդ հարցում չեն խանգարում: Չինաստանի ԱԳՆ-ն էլ նշել է, որ Հայաստանն իր արտաքին քաղաքական առաջնահերթություններից է:

«Եվրոպայից, ԱՄՆ-ից ստացված ուղերձները տրամագծորեն հակառակ բովանդակությունն ունեն Ադրբեջանի համար: Ինչպես տեսնում եք, որ շատ լավ քաղաքական իրավիճակ է, այս պայմաններում է տեղի ունենում Հայաստանի, Ադրբեջանի նախագահների հանդիպումը: Քաղաքագետներն ասում են, թե պահը հարմար է Ղարաբաղի հարցում բացահայտ գրոհների անցնելու համար, սակայն կարծում եմ` շտապել պետք չէ: Մենք պետք է դանդաղ, հետևողականորեն քայլ առ քայլ, բառ առ բառ ամրապնդենք մեր դիրքերը: Ինչպես նաև շարունակենք ամրապնդել մեր կապերը Եվրոպայի, ԵԱՏՄ-ի, Իրանի, ԱՄՆ-ի հետ: Ղարաբաղյան հակամարտության մեջ էլ այս բարենպաստ շրջանում աշխատենք փոխել խնդրի աղճատված կերպարը: Ադրբեջանի` որպես ցեղասպան պետության կերպարը, չի արտացոլվում որևէ փաստաթղթում, մեր խնդիրն է տանել այդ գործն առաջ»,-ասաց նա:

Ինչ վերաբերում է ՀՀ-ի, Ադրբեջանի նախագահների՝ հոկտեմբերի 16-ին Ժնևում ընթացող բուն հանդիպմանը, ապա Ալեքսանդր Մանասյանը նշեց, որ վճռական ճեղքումների ականատես չենք լինելու, Ադրբեջանը մնում է իր դիրքերին, Հայաստանն էլ պաշտպանում է իր շահերը:

«Հանդիպմանը, կարծում եմ, կխոսվի անվտանգության հարցերից: Լուրջ ակնկալիքներ ունենալ պետք չէ, սակայն այս հանդիպումներն անհրաժեշտ են, որ ԵԱՀԿ Մինսկի խմբի շրջանակում բանակցային գործընթացը կանգ չառնի»,-հավելեց քաղաքագետը:

Գյուղատնտեսության նախարարությունը 2018 թվականին իրականացնելու է ծրագրեր, որոնք նպատակաուղղված կլինեն մսի և կարագի գների բարձրացման հետ կապված խնդիրների լուծմանը։ 
«Արմենպրես»–ի հաղորդմամբ՝ այս մասին լրագրողների հետ զրույցում ասաց ՀՀ գյուղատնտեսության  փոխնախարար Արմեն Հարությունյանը։
«Ծրագրերից մեկը տոհմային անասնապահության զարգացումն է, որի շրջանակում մեր միջազգային գործընկերների հետ քննարկում ենք Հայաստանի մի քանի մարզերում տոհմային կայաններ ստեղծելու հարցը։ Դրա շնորհիվ կբարելավվի ցեղատեսակը, ավելի որակյալ կենդանիներ կարտադրվեն Հայաստանում և կբաշխվեն գյուղացիական տնտեսությունների միջև»,- նշեց Արմեն Հարությունյանը։ 
Նրա խոսքով՝ պլանավորվում է սկսել կենդանիների համարակալման հաշվառման աշխատանքները, որոնց կհետևի անասնաբուժության տեսանկյունից շատ կարևոր խնդիրներ լուծող սպանդանոցային ենթակառուցվածքների զարգացումը։ 
«Կերի արտադրությունը անասնապահության զարգացման ոլորտում հիմնական խոչընդոտներից մեկն է։ Վերջին տարիներին կառավարության օժանդակությամբ և միջազգային կազմակերպությունների հետ համագործակցությամբ ստեղծվել են 19 անասնաբուժական և գյուղի աջակցության կենտրոններ։ Այնտեղ մատուցվում են տարբեր ծառայություններ, անասունների արհեստական սերմնավորում է իրականացվում, որի շնորհիվ բարելավվում են կաթնատվությունն ու մսային հատկանիշները»,- ասաց ՀՀ գյուղատնտեսության փոխնախարարը։ 
Գերատեսչությունը միտված է խթանել սննդի անվտանգությունն ու առողջ ապրելակերպը։ 
«Այն ռեսուրսները, որոնք այսօր սպառվում են, շատ նպատակային են, բայց պետք չէ ակնկալել, որ մոտակա մեկ տարվա ընթացքում պարենային ապահովության մակարդակով էական զարգացում կլինի։ Ապագա երկու-երեք տարիների համար, այդ բոլոր ծրագրերի հաշվին, մենք ունենք մոտ 5-10 տոկոսով ավելացնելու խնդիր, որը բավականին մեծ արդյունք կունենա»,- ընդգծեց Արմեն Հարությունյանը։ 
Եթե 2018  թվականին հնարավոր լինի խթանել անասնապահության զարգացումը, առաջարկի բարձրացման հետ մեկտեղ կնվազեն նաև գները։

«Հայաստանի զարգացման նախաձեռնություններ» (IDeA) հիմնադրամի «Տաթևի վերածնունդ» ծրագրի նախաձեռնությամբ հոկտեմբերի 16-ին Տաթևի վանական համալիրի բակում տեղի ունեցավ Հայաստանի պետական ազգային ակադեմիական երգչախմբի համերգը։

Ինչպես «Արմենպրես»-ին տեղեկացրին Հիմնադրամից, երգչախմբի գեղարվեստական ղեկավար և գլխավոր դիրիժոր,  Հայաստանում ԽՍՀՄ միակ ժողովրդական արտիստ Հովհաննես Չեքիջյանի  ղեկավարությամբ երգչախումբը  կատարեց Կոմիտասի, Եկմալյանի, Մոցարտի, Վերդիի և Չայկովսկու ստեղծագործությունները։

«Տաթևը զարմանահրաշ կառույց է։ Բազմիցս մասնավոր այցով եղել եմ Տաթևում, բայց այս անգամ, ի ուրախություն ինձ, այստեղ ելույթ ունեցանք մեր երգչախմբով։ 1111-ամյա իր բարձունքից մեզ նայող Տաթևի վանքը ջերմությամբ հյուրընկալեց  մեզ։ Խորհրդանշական է, որ հոկտեմբերի 16-ին լրանում է «ՏաԹևեր» ճոպանուղու գործարկման յոթերորդ տարեդարձը»,- ասել է մաեստրո Հովհաննես Չեքիջյանը։

Երգչախմբի համերգը մեկն է այն միջոցառումներից, որոնք ուղղված են Տաթևում հոգևոր ու մշակութային կյանքի վերածննդին։ Համերգին ներկա էին Տաթևի վանքի հարակից համայնքների բնակիչները, բազմաթիվ հյուրեր ու զբոսաշրջիկներ Հայաստանից և արտերկրից։

«Եթե պատմության էջերն ուսումնասիրենք՝ կտեսնենք, որ 1111 տարեկան Տաթևի վանքը եղել է հայ հոգևոր երաժշտության դարբնոցը։ Հայաստանի պետական ազգային ակադեմիական երգչախմբի համերգը Տաթևի վանքի բակում հայ հոգևոր երաժշտության դարավոր ավանդույթների պահպանման ու շարունակության լավագույն օրինակն է», – նշել է Տաթևի վանքի վանահայր Տեր Միքայել Վարդապետ Գևորգյանը:

«Երգչախմբի համերգը ինքնատիպ մի փորձ էր նույն տարածության մեջ հանդիպեցնելու մեր մշակույթի անցյալն ու ներկան․ կազմակերպել Տաթևի վանքի բակում մաեստրո Չեքիջյանի ղեկավարած երգչախմբի համերգը։  Թե՛ Տաթևը, թե՛ երգչախումբը  հոգևոր և մշակութային բացառիկ արժեքներն են ոչ միայն հայերի համար։ Այս ձայները հնչել են աշխարհի լավագույն բեմերից, իսկ Տաթևը և «Տաթևի վերածնունդ» ծրագիրը կարողացել են համախմբել տարբեր ազգությունների ու դավանանքի մարդկանց։ Ի վերջո, այս «հանդիպումը» վաղ թե ուշ պետք է կայանար։ Այս համերգը լավ առիթ էր, որպեսզի վանքի հարակից համայնքների բնակիչներն ու հյուրերը հաղորդակցվեն կենդանի լեգենդի՝ մաեստրո Չեքիջյանի և նրա ղեկավարած երգչախմբի արվեստի հետ»,- ասել է IDeA հիմնադրամի մշակութային ծրագրերի ղեկավար Էլեոնորա Մալխասյանը։