ՀՀ կառավարության եւ ՄԱԿ-ի պարենի եւ գյուղատնտեսության կազմակերպության (ՊԳԿ) միջեւ համաձայնագիրը, որը  շուտով կստորագրվի, թույլ կտա դյուրացնելերկուստեք աշխատանքներն ու ավելի լայնամասշտաբ  ծրագրեր իրականացնել ՊԳԿ-ի միջոցով:

«Արմենպրես»–ի հաղորդմամբ, լրագրողների հետ հանդիպմանը ՀՀ գյուղատնտեսության նախարար Իգնատի  Առաքելյանն ասաց, որ համագործակցության ուղղություններն արդեն նախանշված են: «Դրանք վերաբերում են անասնաբուծությանը, անասնաբուժությանը, բուսասանիտարիային, սննդի անվտանգությանը, կայուն պարենային ապահովության ծրագրերին»,-ասաց նա՝ հավելելով, որ այսօր կազմակերպության հետ բավական լուրջ ծրագրեր են իրականացվում հայկական գենետիկական ռեսուրսները պահպանելու ուղղությամբ: «Հիմա տնկարան ենք հիմնում ֆիլոքսերադիմացկուն հայկական խաղողի տեսակ ստանալու համար, ինչը թույլ կտա պահպանել տեսակն ապագայում»,-նշեց նախարարը:

ՊԳԿ գլխավոր տնօրենի օգնական, Եվրոպայի եւ Կենտրոնական Ասիայի տարածաշրջանային  ներկայացուցիչ Վլադիմիր Ռախմանինն իր խոսքում նշեց, որ  համաձայնագիրը թույլ կտա ավելի ամրապնդել եւ ընդլայնել համագործակցությունը: «Ես շատ շնորհակալ եմ գյուղատնտեսության նախարարությանը արդյունավետ համագործակցության համար: Մենք գյուղատնտեսության նախարարության հետ  մշակում ենք համատեղ ծրագրեր եւ մինչ 2020 թվականը ուրվագծել ենք համագործակցության կոնկրետ ուղղություններ»,-ասաց Ռախմանինը:

Հայաստանը 1993 թվականից անդամակցում է Պարենի եւ գյուղատնտեսության կազմակերպությանը: 2004 թվականից կազմակերպությունն ունի իր մշտական ներկայացուցչությունը Հայաստանում:

«Հայապահպանության գործում նշանակալի ավանդի համար» ամենամյա մրցանակաբաշխությունը կնպաստի սփյուռքում հայկական կառույցների զարգացմանը և հայապահպանության ավելի գործուն աշխատանքին: «Արմենպրես»–ի հաղորդմամբ՝ հոկտեմբերի 18-ին լրագրողների հետ հանդիպմանը նման կարծիք հայտնեց ՀՀ սփյուռքի նախարարության համահայկական ծրագրերի վարչության պետ Գագիկ Գյանջումյանը:

«Մրցանակաբաշխության նպատակը հենց իր անվանման մեջ է: Այն արդեն ունի պատմություն՝ իրականացվում է 2010 թվականից: 7 տարիներին մասնակիցների թիվը և աշխարհագրությունը բավական ընդլայնվել է: Մասնակիցներ ունենք  գրեթե բոլոր մայրցամաքներից: Ամեն տարի սահմանվում են պայմաններ և նոր անվանակարգեր: Այս տարի սահմանել ենք 4 անվանակարգ»,-ասաց Գյանջումյանը:

Անվանակարգերն են. «Մայրենիի պաշտպան», «Լավագույն հայկական կրթօջախ», «Լավագույն երիտասարդական/ ուսանողական կազմակերպություն», «Ազատ Արցախ Մայիս՝ հաղթանակների ամիս» մանկապատանեական ստեղծագործությունների մրցույթ: Կարող է դիմել անվանակարգերի պահանջներին համապատասխանող սփյուռքի ցանկացած կառույց, անհատ: Մասնակիցները պետք է ներկայացնեն իրենց կամ իրենց կառույցի պատմության, հաջողությունների մասին: Արդյունքներն ամփոփվում են դեկտեմբերին, տրվում են հավաստագրեր, դիպլոմներ կամ դրամական խրախուսանք:  «Ամփոփվում են նաև մասնակից անհատների, կառույցների փորձը, առաջարկությունները, որոնք մենք փորձում ենք տարածել նաև մնացած սուբյեկտների վրա»,-նշեց Գյանջումյանը:

Մրցանակաբաշխությունը ՀՀ սփյուռքի նախարարությունն իրականացնում է Ռուսաստանի հայերի միության, ինչպես նաև Համաշխարհային հայկական կոնգրեսի հետ: Տարվա սկզբից տարածաշրջանային վարչությունների, բոլոր կառույցների միջոցով տեղեկացվում է մրցանակաբաշխության մասին, և հիշեցվում են անվանակարգերը: «Ուզում ենք մեկ անգամ ևս համայնքներին տեղեկացնել ու հորդորել՝ ակտիվորեն մասնակցել»,-ասաց Գյանջումյանն ու հավելեց՝ հայտերն ընդունվում են մինչ նոյեմբերի 30-ը:

Նախորդ տարի մրցույթին ներկայացվել են 192 հայտ: Մասնակցել են ավելի քան 700 մարդ: Նախորդ տարվա անվանակարգերն եղել են. «Մայրենիի պաշտպան», «Լավագույն հայկական կրթօջախ», «Հայաստանի և Լեռնային Ղարաբաղի անկախության 25-ամյակին նվիրված լավագույն հրապարակում» սփյուռքի լրատվամիջոցների և «Սիրում եմ քեզ, իմ հայրենիք» մանկապատանեկան ստեղծագործությունների մրցույթներ: 2010-2016-ին մրցանակաբաշխությանը մասնակցել են ավելի քան 700 մասնակից՝ աշխարհի 48 երկրից:

ՀՀ քննչական կոմիտեն երկկողմ փոխըմբռնման հուշագրեր է ստորագրել Ռուսաստանի և Բելառուսի քննչական կոմիտեների հետ: Այդ նպատակով Երևանում են գտնվում ՌԴ և Բելառուսի քննչական կոմիտեների նախագահներ Ալեքսանդր Բաստրիկինը և Իվան Նոսկևիչը:

ՀՀ քննչական կոմիտեի նախագահ Աղվան Հովսեփյանը հուշագրի ստորագրումից հետո նշեց, որ դրանք խորացնելու են երեք երկրների քննչական կոմիտեների միջև համագործակցությունը:

«Երեք պետությունների քննչական կոմիտեների համագործակցությունն այսուհետև իրականացվելու է նոր, ավելի բարձր ձևաչափով: Այդ հուշագրերը կնպաստեն, որ մեր համագործակցությունը թևակոխի մի նոր, ավելի սերտ փուլ, և մեր աշխատակիցները, օգտագործելով հուշագրի դրույթները, ավելի օպերատիվ լուծումներ տան մեր առջև ծառացած հարցերին: Հուշագրերը նաև տարածաշրջանում կստեղծեն յուրահատուկ իրավական դաշտ հանցագործությունների դեմ պայքարի բնագավառում»,-«Արմենպրես»-ի հաղորդմամբ՝ ասաց Աղվան Հովսեփյանը:

Հուշագրի ստորագրումից հետո մեկնարկեց երեք երկրների քննչական կոմիտեների՝ եռակողմ կոլեգիայի երկրորդ նիստը:

ՀՀ քննչական կոմիտեի նախագահ Աղվան Հովսեփյանը տեղեկացրեց, որ նիստում ընդգրկված են համագործակցությանն առնչվող մի շարք հարցեր, այդ թվում՝ նաև ուղղված հետագա մարտահրավերների  կանխագուշակմանը:

«2016 թվականի սեպտեմբերին Մինսկում քննչական կոմիտեների միջև ստորագրվեց փաստաթուղթ եռակողմ  միջազգային իրավական փոխգործակցության մասին: 2017 թվականին ապրիլին Սանկտ Պետերբուրգում կայացավ համատեղ կոլեգիայի առաջին նիստը, որը պատմական նշանակություն ուներ մինչդատական վարույթ իրականացնող մարմինների միջազգային իրավական փոխգործակցության առումով: Կոլեգիայի երկրորդ նիստի անցկացումը ցույց է տալիս երեք երկրների քննչական կոմիտեների միջև համագործակցության բարձր մակարդակը»,- ասաց Աղվան Հովսեփյանը:

ՌԴ քննչական կոմիտեի նախագահ Ալեքսանդր Բաստրիկինը համաձայնեց, որ այն պատմական  իրադարձություն է:

«Վստահ եմ, որ այն նպաստելու է երեք պետությունների, երեք գերատեսչությունների ավելի սերտ համագործակցությանը հանցագործությունների դեմ պայքարում՝ ուղղված մեր քաղաքացիների պաշտպանությանը»,-ընդգծեց պաշտոնյան:

Բելառուսի  քննչական կոմիտեի նախագահ Իվան Նոսկևիչը հույս հայտնեց, որ նիստի շրջանակում կհնչեն կառուցողական և օգտակար առաջարկություններ:

«Թեման շատ արդիական է: Հարցերը՝ կապված մինչդատական վարույթ իրականացնող մարմինների համագործակցության, աշխատանքի արդյունավետության հետ, ընդհանուր են մեր երեք երկրների համար: Նոր ուղղություններով համագործակցության ամրապնդումը մեր կարևոր նպատակներից է»,- նշեց Բելառուսի քննչական կոմիտեի նախագահը՝ իր խոսքում նաև անդրադառնալով կիբեռհանցագործության դեմ առավել արդյունավետ աշխատանք իրականացնելու անհրաժեշտությանը:

Նրա խոսքով՝ այն գլոբալ անվտանգության ներկայիս ամենակարեւոր սպառնալիքներից է: 

Երևանի քաղաքապետ Տարոն Մարգարյանը հանդիպել է Եվրոպայի վոլեյբոլի կոնֆեդերացիայի նախագահ Ալեքսանդր Բորիչիչի գլխավորած պատվիրակության հետ: Հանդիպմանը մասնակցել է նաև Հայաստանի վոլեյբոլի ֆեդերացիայի նորընտիր նախագահ, Երևանի քաղաքապետի խորհրդական Հրաչյա Մուրադյանը:

Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, ողջունելով հյուրերին` քաղաքապետ Տարոն Մարգարյանը նախ համառոտ ներկայացրել է բոլոր այն ծրագրերը, որոնք ուղղված են մայրաքաղաքում մարզական կյանքի աշխուժացմանը:

«Մենք կարևորում ենք Երևանում սպորտի զարգացումն ու տարբեր մարզաձևերի մասսայականացումը, և պետք է նշեմ, որ վերջին տարիներին այդ ուղղությամբ նպատակային հստակ ծրագրեր ենք իրականացրել: Անշուշտ, վոլեյբոլը ևս սիրված մարզաձև է Երևանում, և վստահ եմ, որ Հայաստանի ֆեդերացիայի նոր ղեկավարության հետ համատեղ, Ձեր աջակցության շնորհիվ, կկարողանանք Երևանում այս սպորտաձևում ևս ունենալ շոշափելի առաջընթաց», – ընդգծել է քաղաքապետը:

Շնորհակալություն հայտնելով ջերմ ընդունելության համար` Եվրոպայի վոլեյբոլի կոնֆեդերացիայի նախագահ Ալեքսանդր Բորիչիչն առանձնակի կարևորել է Երևանի քաղաքապետի համագործակցության պատրաստակամությունը՝ նկատելով, որ դա իսկապես կնպաստի կոնֆեդերացիայի կողմից Երևանում նախաձեռնած բոլոր ծրագրերը հաջողությամբ կյանքի կոչելուն:

«Պարոն քաղաքապետ, մենք ևս նպատակ ունենք Երևանում զարգացնել վոլեյբոլը՝ որքան հնարավոր է շատ երեխաներ ներգրավելով մարզաձևում: Ունենք տարբեր նախաձեռնություններ ինչպես դպրոցներում սպորտաձևի զարգացման, այնպես էլ մարզական միջոցառումների կազմակերպման ուղղությամբ: Եվ մեզ համար անչափ կարևոր է վերոնշյալ ծրագրերի իրականացման հարցում Ձեր աջակցությունը, ինչը, համոզված եմ, հնարավորություն կտա կյանքի կոչելու բոլոր այն նախաձեռնությունները, որոնք նախատեսում ենք իրականացնել Երևանում», –  նշել է Ալեքսանդր Բորիչիչը:

Հանդիպման շրջանակում քաղաքապետ Տարոն Մարգարյանն առաջարկել է Հայաստանի ֆեդերացիայի հետ համատեղ քննարկել ու ներկայացնել ծրագրային առաջարկությունների հստակ փաթեթ՝ մեկ անգամ ևս ընդգծելով, որ Երևանի քաղաքապետարանն իր լիազորությունների շրջանակում պատրաստակամ է համագործակցել և աջակցել բոլոր այն նախաձեռնություններին, որոնք ուղղված են Երևանում առողջ ապրելակերպի խթանմանն ու սպորտի մասսայականացմանը: