Հայաստանի և Եվրոպական Միության միջև կնքվելիք համաձայնագրում ատոմակայանի փակման մասին ուղղակի խոսք չկա: Հոկտեմբերի 20-ին լրագրողների հետ հանդիպմանն այս մասին ասաց ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը: «Այնտեղ խոսք կա ատոմակայանի գործող էներգաբլոկի ապագործարկման մասին այն համատեքստում, որ Հայաստանի էներգետիկ անվտանգությունը ենթադրում է ատոմային էներգիայի խաղաղ պայմաններով զարգացման հնարավորություն»,- «Արմենպրես»-ի փոխանցմամբ` ընդգծեց Մանուկյանը:

Անդրադառնալով այս հարցում կառավարության դիրքորոշմանը` նախարարն ընդգծեց, որ այն հստակ է. «Մենք բազմիցս այդ մասին հայտարարել ենք և շարունակում ենք հայտարարել, որ ատոմակայանի գործող էներգաբլոկի ռեսուրսն անվերջ չէ: Այն կաշխատի այնքան, որքան կունենա ռեսուրս և այդ ռեսուրսը կբավարարի բլոկն անվտանգ և հուսալի շահագործելու համար: Դրանից հետո այն կապագործարկվի և փոխարենը կկառուցվի նոր էներգաբլոկ: Սա ակնհայտ է, սա կառավարության դիրքորոշումն է, որովհետև ատոմային էներգետիկայի խաղաղ նպատակներով զարգացումը մեր կառավարության գերակայություններից է»,– մանրամասնեց Աշոտ Մանուկյանը:

Նախարարն ընդգծեց, որ նոր ատոմակայանի կառուցումը Հայաստանի համար խնդրահարույց չէ: Նա վստահություն հայտնեց, որ Հայաստանը պետք է նոր ատոմակայան կառուցի` հավելելով, որ բոլորովին այլ հարց է, թե քանի մեգավատ հզորությամբ ու ինչ տեխնոլոգիայով այն կկառուցվի: «Երկու հարցի պատասխանն էլ մենք կտանք առաջիկա երկու տարիների ընթացքում: Առաջիկա երկու տարիներին մենք կունենանք գիտականորեն հիմնավորված և ՄԱԳԱՏԷ-ի մեր գործընկերների կողմից հաստատված գնահատականը, թե ևս որքան ժամանակ կարող ենք շահագործել գործող կայանը: Երկու տարվա ընթացքում մենք կունենանք նաև փոքր մոդուլային ռեակտորների փորձարկման արդյունքները և կհասկանանք, թե ինչ նոր տեխնոլոգիաներ կան աշխարհում, որոնցով մենք կարող ենք կառուցել ատոմակայանը»,– նշեց Մանուկյանը:

 Աշխարհում ֆիքսված ու շարժական ինտերնետի արագությունը չափագրող ամենահայտնի Ookla իռլանդական ընկերությունը Ucom-ին շնորհել է «Հայաստանում ամենաարագ շարժական ցանց 2017» մրցանակը: «Արմենպրես»-ի փոխանցմամբ՝ լրագրողների հետ ճեպազրույցում Ucom ընկերության գլխավոր տնօրեն Հայկ Եսայանը տեղեկացրեց, որ 2016-ի տվյալները համադրելով 2017-ի տվյալների հետ՝ Հայաստանը բարելավել է իր դիրքը ավելի քան 50 հորիզոնականով, ինչը Ucom 4G+/LTE Advanced շարժական ցանցի ներդրման արդյունքն է:

«Այս մրցանակը մեր վերջին մեկ տարվա աշխատանքն է, երբ անցյալ տարի սեպտեմբերին սկսեցինք 4G+ ծառայությունները մատուցել Հայաստանում՝ սկսելով Երևանից, և այսօր արդեն ամբողջ Հայաստանի տարածքում ենք հասանելի: Ամենակարևորն ու ուրախալին այն է, որ դա ոչ միայն Ucom ընկերության ձեռքբերումն է, այլ Հայաստանի դիրքերն են բարելավվել»,-ասաց Հայկ Եսայանը: Նա շեշտեց, որ այս արագությունները չեն կարող իջնել, քանի որ իրենք անդադար կատարում են ցանցի վերազինման աշխատանքներ, ամեն օր նոր բազային կայաններ են ավելանում Հայաստանի տարբեր տարածքներում: Ըստ պաշտոնական արդյունքի՝ Ucom-ի շարժական ինտերնետի արագության ցուցանիշը երկու անգամ գերազանցում է մրցակիցների ցուցանիշները:

Հայկ Եսայանի խոսքով՝ բնակչության գրեթե 80 տոկոսը կարող է 4G, 4G+ ծառայությունից օգտվել ու մինչև ապրիլ 88 տոկոս բնակավայրերն ամբողջությամբ պատված կլինեն այդ ցանցով ու բնակչության 98 տոկոսը այդ պարագայում կունենա նշյալ ծառայությունները:

«4G+-ի արագություններն այնպիսին են, որ մենք այսօր մինչև 250 մեգաբիթ արագություն ենք ապահովում, դա բավականին բարձր է: Ամենակարևորն այն է, որ աշխատող ցանցում միջին արագությունը 30 մեգաբիթից ավելի է: Մաքսիմալ HD որակով ֆիլմ դիտելու համար 2 մեգաբիթ արագություն է անհրաժեշտ, շատ բարձր HD-ն՝ 9-10 մեգաբիթ, այսինքն` մենք գրեթե 10 անգամ ավելի ինտերնետ ենք տալիս»,-նշեց Հայկ Եսայանը:

Ookla ընկերությունն իր Speedtest հավելվածի միջոցով հավաքագրել ու վերլուծել է 2017 թվականին շարժական ինտերնետից օգտվողների արագության չափման արդյունքները: Speedtest-ի կայքում տեղակայված տեղեկատվության հիման վրա տեսանելի է աշխարհի 121 երկրների տեղակայումն ըստ շարժական ինտերնետի արագության: Աշխարհագրական առումով Speedtest-ը հաշվարկում է միայն այն ցանցերի տվյալները, որոնց ծառայությունները հասանելի են զգալի թվով հաճախորդների:

Հայաստանի բասկետբոլի ֆեդերացիայի փոխնախագահ Արա Պողոսյանի կարծիքով, Հայաստանի նորաստեղծ առաջնությունը կարող է մեծ հետաքրքրություն առաջացնել երկրպագուների շրջանում:

«Մի քանի տարի առաջ փորձ եղել է մի քանի թիմով առաջնություն անցկացնել, բայց ոչ այս մակարդակով և մասշտաբով: Առաջնության կարող էին մասնակցել  8-9 թիմ: Ցանկացողներ շատ կային, բայց մենք բարձրակարգ խաղացողներ քիչ ունենք. 7 թիմն էլ կարծես շատ է: Մի քանի թիմեր դրսից խաղացողներ կունենան. ինչը և հույս է տալիս, որ նորմալ մակարդակ կլինի: Լիահույս եմ, որ մի քանի տուրից հետաքրքրությունը կմեծանա Հայաստանի առաջնության նկատմամբ, և թիմերն էլ ավելի կուժեղանան: Նույնիսկ օգնում ենք թիմերի, որոնք հագուստի և գույքի խնդիր ունեն` հովանավորներ գտնելով»,–«Արմենպրես»-ի հետ զրույցում ասաց բասկետբոլի ֆեդերացիայի փոխնախագահը:

Խոսելով առանձին թիմերի մասին` Պողոսյանը շեշտեց, որ գովել է «Շիրակ»-ի բասկետբոլային թիմ ստեղծելը: «Արցախում ևս հետաքրքրված են, և մենք ամեն ինչ արեցինք, որ խաղերն Արցախում անցկացվեն»,-ասաց ֆեդերացիայի փոխնախագահը: 

Հոկտեմբերի 21-ին մեկնարկում է տղամարդկանց Ա լիգայի կանոնավոր առաջնությունը, որին կմասնակցեն հետևյալ 7 ակումբները. «Ուրարտու» (Երևան), ՖԻՄԱ (Երևան), «Շիրակ» (Գյումրի), «Արթիկ» (Արթիկ), «Ինժեներ» (Երևան), «Արցախ» (Ստեփանակերտ), «Գրանդ սպորտ» (Երևան):

Հոկտեմբերի 21-ին կայանալիք մեկնարկային խաղում «Ուրարտուն» Օլիմպավանում հյուրընկալելու է ՖԻՄԱ-ին: Հանդիպումը սկսվելու է 20:00-ին: 1-ին տուրի մյուս հանդիպումները կկայանան հոկտեմբերի 22-ին: Այդ օրը «Շիրակը» կհյուրընկալի «Ինժեներին», իսկ «Արթիկը»՝ «Արցախին»: Հանդիպումները կսկսվեն 16:00-ին: