Հինգշաբթի,  12 Հոկտեմբեր  2017-ի երեկոյեան, մայրաքաղաք՝  Պէյրութի  ամենահռչակաւոր գրախանութներէն՝  «Լիպրերի Անթուան»ի մէջ, ի ներկայութիւն   Լիբանանի մէջ  օտար պետութիւններու դեսպաններու, դիւանագէտներու, պետական անձնաւորութիւններու, դրամատուներու տնօրէններու, դասախօսներու, մտաւորականներու եւ  բարեկամներու, լիբանանահայ   ծանօթ  տնտեսագէտ՝  Մկրտիչ Պուլտուքեան  ընթերցասէր  հասարակութեան մակագրեց  իր   նոր  գիրքը՝ «Armenian Bankers  In The Ottoman Empire»:  

            Արխիւային նիւթերով հարուստ, բծախնդրութեամբ պատրաստուած  այս ուսումնասիրութիւնը կը ներկայացնէ՝  Թուրքիոյ տնտեսական բարգաւաճման մէջ   հայ   սեղանաւորներու դերակատարութիւնը, անոնց  նախաձեռնութիւնները, մուծած նորարարութիւնները եւ ներդրումները,  հայ  ժողովուրդին հանդէպ թուրք իշխանութիւններու անմարդկային  արարքները, ֆիզիքական  հաշուեյարդարին  զուգահեռ, յափշտակուած  դրամագլուխը:

            Գիրքին  նախաբանին մէջ  Մկրտիչ Յ. Պուլտուքեան  հայ  երիտասարդութեան կը թելադրէ՝ խոր  գիտակցութեամբ  ուսումնասիրել   թուրքերու կողմէ  հայ ժողովուրդէն  յափշտակուած  դրամագլուխը եւ  աննահանջ շարունակել պահանջատիրական  պայքարը:

            Անգլերէն  հրատարակութիւնը,  լիբանանահայ  ծանօթ տնտեսագէտ,  տնտեսական հարցերու  մեկնաբան, տնտեսական    բազմաթիւ գիրքերու եւ ուսումնասիրութիւններու հեղինակ, դասախօս՝ Մկրտիչ Յակոբ Պուլտուքեանի՝ «Հայ Սեղանաւորներ Միջին Արեւելքի Տարածքին,  Պոլիսէն մինչեւ  Պէյրութ» ( 2012)  արժէքաւոր ուսումնասիրութեան անգլերէն  տարբերակն է,  որոշակի  փոփոխութիւններով եւ լրացումներով: Գիրքին արաբերէն լեզուով հրատարակութիւնը լոյս տեսաւ 2015-ին, որուն յաջորդեց փայլուն  շնորհանդէս մը «Biel»ի մէջ:

            Արդէն իսկ պատրաստութեան վրայ  է՝  սոյն աշխատութեան  թրքերէն տարբերակը: 

            Մկրտիչ Յակոբ Պուլտուքեան՝  ծանօթ  հեղինակութիւն մըն է  միջազգային տնտեսագիտութեան  մէջ: Ան  երկար տարիներ  վարած է  Լիբանանի Կեդրոնական Դրամատան  փոխկառավարիչի  պաշտօնը (1985-1990): Բազմիցս  Լիբանանը ներկայացուցած է  Միջազգային  Ելեւմտական Հիմնարկին (IMF ) եւ  տնտեսական միջազգային այլ կառոյցներու  մէջ: Ան, մինչեւ օրս կը մասնակցի  տնտեսական   միջազգային խորհրդաժողովներու, իբրեւ դրամատուներու խորհրդատու եւ  հմուտ տնտեսագէտ: 

Բռնցքամարտի Հայաստանի մեծահասակների առաջնությունը կմեկնարկի հոկտեմբերի 23-ին:

«Արմենպրես»–ի փոխանցմամբ` հոկտեմբերի 23-ին «Դինամո» մարզական համալիրում կմեկնարկի Հայաստանի բռնցքամարտի մեծահասակների առաջնությունը: Երկրի տարբեր մարզերից և Արցախից շուրջ 100 մարզիկ 10 քաշային կարգերում կպայքարեն Հայաստանի չեմպիոնի կոչման համար: 
Հոկտեմբերի 23-ին տեղի կունենա վիճակահանությունն ու մարզիկների կշռման արարողությունը, իսկ մենամարտերը  կմեկնարկեն հոկտեմբերի 24-ին: Եզրափակիչ մենամարտերը տեղի կունենան հոկտեմբերի 28-ին:

Երևանի քաղաքապետ Տարոն Մարգարյանը ներկա է գտնվել «Երևանում ֆրանսիական ուռուցքաբանական կենտրոն»-ի բացման արարողությանը: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, բժշկական նոր կենտրոնի հանդիսավոր բացման պատիվը վերապահվել է Երևանի քաղաքապետ Տարոն Մարգարյանին և ֆրանսահայ հայտնի բժիշկ-ուռուցքաբան, դոկտոր, կենտրոնի բժշկական մասի ղեկավար Նորբերտ Ավետյանին:

«Նորման» հիմնադրամի և Նորբերտ Ավետյանի նախաձեռնությամբ մայրաքաղաքում բացված կենտրոնը Հայստանում կիրականացնի քաղցկեղով հիվանդների` եվրոպական չափանիշներին համապատասխան բուժում՝ կիրառելով նաև անվանի բժիշկ Նորբերտ Ավետյանի մասնագիտական մեթոդները: Առանձնակի կարևորելով Երևանում նման կենտրոնի հիմնումը` միջոցառման բանախոսները նկատել են, որ առողջական ծանր այս հիվանդությամբ տառապող անձինք բուժման նպատակով արտերկիր մեկնելու անհրաժեշտություն այլևս չեն ունենա, ինչն, անշուշտ, ինչպես ֆինանսական, այնպես էլ լեզվի չիմացության հետ կապված որոշակի խնդիրներ է միշտ ստեղծել: Նաև նշվել է, որ Հայաստանից ժամանած մեծ թվով հայերի Փարիզում ընդունած բժիշկն այսուհետ մասնագիտական իր հմտությունները կիրացնի հենց հայրենիքում:

Քաղաքապետ Տարոն Մարգարյանը պատասխանատուների ուղեկցությամբ շրջել է կենտրոնում, ծանոթացել ստեղծված պայմաններին ու հնարավորություններին: Նշվել է, որ կենտրոնն ապահովված է բարձրակարգ բուժծառայություններ մատուցելու համար անհրաժեշտ ժամանակակից տեխնիկական սարքավորումներով: Հարկ է նշել, որ կենտրոնը նպատակ ունի նաև օժանդակել քաղցկեղով հիվանդ ունեցող խոցելի ընտանիքներին՝ աջակցելով նրանց ֆինանսական միջոցների հայթայթման հարցում:

ՀՀ հատուկ քննչական ծառայությունում ՀՀ ոստիկանության ներքին անվտանգության վարչությունից ստացված նյութերի հիման վրա հարուցված քրեական գործի նախաքննությամբ բացահայտվել են ֆինանսական խախտումների և չարաշահումների մի շարք դեպքեր: Ինչպես «Արմենպրես»-ին տեղեկացրին ՀՔԾ լրատվական ծառայությունից, պարզվել է, որ ոստիկանության Արարատի մարզային վարչության տարբեր ստորաբաժանումների չորս հաշվապահներ պատշաճ կարգով չեն կատարել իրենց պարտականությունները, թույլ են տվել ֆինանսական խախտումներ, ինչպես նաև, չարաշահելով պաշտոնեական դիրքը, յուրացման եղանակով հափշտակել են իրենց վստահված խոշոր չափերով գումարներ:

Այսպես, ՀՀ ոստիկանության Արարատի մարզային վարչության ֆինանսական խմբի և նույն վարչության Արարատի բաժնի գլխավոր հաշվապահներ Արուս և Վեհանուշ Ասատրյանները, իրենց գործընկերներին «լավություն» անելու և նրանց օգտակար լինելու անձնական շահագրգռվածությունից ելնելով, մասամբ էլ սխալ հաշվարկների պատճառով, 2014 թվականի հունվարի 1-ից մինչև 2017 թվականի փետրվարն ընկած ժամանակահատվածում պետական բյուջեից ավել գումարներ են պահանջել և ոստիկանության Արարատի մարզային վարչության մի շարք աշխատակիցների հաշվին առանց օրինական հիմքերի որպես աշխատավարձ փոխանցել շուրջ 8 մլն ՀՀ դրամի չափով ավել գումարներ: Հետագայում, երբ նշված աշխատակիցները վերադարձրել են ստացած գումարների մի մասը, հաշվապահները դրանք չեն մուտքագրել Արարատի մարզային վարչության դրամարկղային հաշվին և ծախսել են իրենց անձնական կարիքների համար:

Ի դեպ, նույն ժամանակահատվածում կատարված սխալ հաշվարկների հետևանքով ոստիկանության մի շարք աշխատակիցների էլ շուրջ 1,5 մլն դրամի չափով պակաս գումար է վճարվել:

Բացի այդ, ՀՀ հատուկ քննչական ծառայությունում կատարված նախաքննության ընթացքում ձեռք բերված բավարար ապացույցների հիման վրա պարզվել է, որ ֆինանսական չարաշահումներ են կատարվել նաև ոստիկանության Արարատի մարզային վարչության Արտաշատի և Մասիսի բաժինների հաշվապահներ Լարիսա Մանասյանի ու Նինա Ավանեսովայի կողմից: Վերջիններս նույնպես յուրացնելու եղանակով գումարներ են հափշտակել պետբյուջեից: Մասնավորապես, Լ. Մանասյանն ու Ն. Ավանեսովան շահադիտական նպատակով պետական բյուջեից ավել գումարներ են պահանջել և որպես դրամական օգնություն փոխանցել իրենց հաշվին:

ՀՀ ոստիկանության աշխատակիցների ապօրինի գործողությունների հետևանքով պետբյուջեին պատճառված շուրջ 8մլն ՀՀ դրամի գույքային վնասը նախաքննության ընթացքում ամբողջությամբ վերականգնվել է:

Վերը նշված հանցավոր արարքների կատարման համար Արուս Ասատրյանին և Վեհանուշ Ասատրյանին մեղադրանքներ են առաջադրվել ՀՀ քրեական օրենսգրքի 179-րդ հոդվածի 2-րդ մասի 1-ին և 3-րդ կետերով, 308-րդ հոդվածի և 315-րդ հոդվածի 1-ին մասերով, իսկ Լարիսա Մանասյանին ու Նինա Ավանեսովային՝ ՀՀ քրեական օրենսգրքի 179-րդ հոդվածի 2-րդ մասի 1-ին կետով:

Քրեական գործի նախաքննությունն ավարտվել է: Գործը մեղադրական եզրակացությամբ հանձնվել է դատավարական հսկողություն իրականացնող դատախազին` այն հաստատելու և դատարան ուղարկելու համար:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով: