«Պաշտպանության մասին» նոր օրենքի նախագծով կարգավորվում են զինված ուժերի գործողություններին կամավորականների մասնակցության հետ կապված հարցերը: Ազգային ժողովի պաշտպանության և անվտանգության մշտական հանձնաժողովում «Պաշտպանության մասին» օրենքի նախագծի քննարկման ժամանակ այս մասին ասաց ՀՀ պաշտպանության նախարար Վիգեն Սարգսյանը: «Զինված ուժերում մասնակցության կամավորությունը շատ հարազատ է մեր ժողովրդին, և այս տարիների մեր բանակաշինությունը, նաև ապրիլյան գործողությունների փորձը ցույց են տվել, որ կամավորական շարժումը մեծ ներուժ ունի և պետք է լիարժեք իրավական կարգավորման հիմքով տեղ գտնի օրենսդրության մեջ: Մենք այս նախագծում նման տեղ թողել ենք` նախատեսելով, որ կամավորական սկզբունքով կարող են պահեստազորային նախապատրաստում անցնել այն քաղաքացիները, ովքեր ենթակա չեն պարտադիր հաշվառման պահեստազորում»,- «Արմենպրես»–ի փոխանցմամբ` նշեց Սարգսյանը:

Նրա գնահատմամբ` կամավորականությունը չպետք է խանգարի սահմանադրական պարտականության կատարմանը: «Եթե քաղաքացին զինապարտ է որպես պահեստազորում հաշվառված անձ, նա պետք է առաջնորդվի ոչ թե կամավորականության սկզբունքով, այլ իր զինկոմիսարիատի կողմից իրեն տրված առաջադրանքով ներկայանա նշված վայր նշված օրը: Սակայն մենք ունենք տարիքային խմբեր, զորակոչի և հաշվառման ոչ ենթակա խմբեր, որոնք կարող են կամավորականության սկզբունքով համալրել համապատասխան ստորաբաժանումները: Մեր դիրքորոշումը մեկն է`  որ կամավորականությունն ավարտվում է զինկոմիսարիատի դռան մոտ: Այն պահին, երբ քաղաքացին ներկայացել է, բանակը պարտավոր է նախանշել նրա ծառայության վայրը, ստեղծել պայմաններ, ապահովել երաշխիքներ, տալ իրավական կարգավորում, որպեսզի քաղաքացին լիարժեք օգտվի զինված ուժերի մասնակցի կարգավիճակից և դրանից բխող բոլոր հետևանքներից»,- պարզաբանեց Վիգեն Սարգսյանը:

Ազգային ժողովի պաշտպանության և անվտանգության մշտական հանձնաժողովը քննարկում է «Պաշտպանության մասին» օրենքի նախագիծը խորհրդարանի լիագումար նիստերի օրակարգ ընդգրկելու հարցը: Հիմնական  զեկուցող, ՀՀ պաշտպանության նախարար Վիգեն Սարգսյանն ընդգծեց, որ արդեն առիթ ունեցել է օրենքի նախագիծը ներկայացնել հանրային քննարկումների, խորհրդարանական լսումների ընթացքում` հիշեցնելով, որ այն քննարկվել է նաև ազգային անվտանգության խորհրդի նիստում, այնուհետև` կառավարությունում: «Այս օրենքի նախագիծը երեք հիմնական նպատակ է հետապնդում: Առաջինը սահմանադրական փոփոխություններից հետո առաջացած նոր իրավահարաբերությունների, իշխանությունների ճյուղերի փոխհարաբերությունների արտացոլումն է օրենսդրական դաշտում այնպես, որ դրանց կիրառումը հնարավոր դառնա մինչև 2018 թ. ապրիլի սկիզբը: Երկրորդը ոլորտը կարգավորող օրենքների կոնսոլիդացումն է, որովհետև տարիների ընթացքում ոլորտը կարգավորող բազմաթիվ օրենքներ են ընդունվել` երբեմն միմյանց հակասող, կրկնող: Այս պարագայում դաշտը վերանայելու անհրաժեշտություն կար: Երրորդը նոր քաղաքականությունների ներդրման համար իրավական հիմքերի ստեղծումն է»,- «Արմենպրես»–ի հաղորդմամբ` մանրամասնեց նախարարը:

Նա հավելեց, որ ՀՀ նախագահի 2016 թ. փետրվարի 10-ի հրամանագրով և կառավարության 2016 թ. մարտի 10-ի որոշումով սահմանվել էր որոշակի ժամանակացույց, ըստ որի Սահմանադրությունից բխող փոփոխությունները պետք է տեղայնացվեին օրենսդրական ակտերում և ներկայացվեին կառավարության և Ազգային ժողովի քննարկմանը: «Պաշտպանության նախարարության մասով կային 9 օրենսդրական ակտ, որոնք վերանայման կարիք ունեին: Որպես ժամկետ սահմանված էր ընթացիկ տարվա դեկտեմբեր ամիսը, սակայն, հաշվի առնելով այս ոլորտների կարևորությունը և ոլորտում անորոշության անթույլատրելիությունը, պաշտպանության նախարարության պաշտոնը ստանձնելուց հետո սահմանել եմ նոր ժամանակացույց, և պլանավորել էինք, որ արդեն այս տարվա աշնանը նախագծերը պետք է ուղարկվեն Ազգային ժողով: Կան նախագծեր, որոնք դեռևս Ազգային ժողովում չեն քննարկվել, սակայն գտնվում են խորհրդարանում, և այդ առումով մենք ժամանակացույցից առաջ ենք ընկել»,- մանրամասնեց նախարարը:

Վիգեն Սարգսյանն ընդգծեց, որ «Պաշտպանության մասին» օրենքի նախագիծը իր մեջ ներառում է գործող 4 օրենքների կարգավորումներ, որոնք են «Զորահավաքային նախապատրաստության և զորահավաքի մասին» օրենքը, «Պաշտպանության մասին» օրենքը, «Պաշտպանության նպատակով տրանսպորտային միջոցների օգտագործման մասին» օրենքը և «Զինապարտության մասին» օրենքի առաջին գլխի դրույթները: «Այս առումով կարող ենք ասել, որ սա բավականին լուրջ կոնսոլիդացնող օրենքի նախագիծ է պաշտպանական ոլորտի քաղաքականությունը համադրելու տեսանկյունից:

Օրենքի նախագիծը ենթադրում է կառավարման համակարգի համապատասխանեցումը Սահմանադրության պահանջներին, պաշտպանության նախարարության և գլխավոր շտաբի գործառույթների հստակեցում, հիմնական հասկացությունների հստակեցում և համապատասխանեցում միմյանց և գործող օրենսդրության այլ նորմերին, քաղաքացիների զինապարտության և զինվորական հաշվառման գործընթացը կարգավորող նորմեր, որոնք առաջին անգամ սահմանվում են «Պաշտպանության մասին» օրենքում, ինչը զգալիորեն բարձրացնում է գործընթացի պատշաճ կարգավորման և բոլոր դերակատարների պատասխանատվության մակարդակը: «Սույն օրենքը կարգավորում է Հայաստանի Հանրապետության պաշտպանության կազմակերպման իրավական հիմքերը, պաշտպանության ոլորտում պետական և տարածքային կառավարման, տեղական ինքնակառավարման մարմինների, պաշտոնատար անձանց, անկախ կազմակերպական իրավական ձեւից կազմակերպությունների, զինված ուժերի և այլ զորքերի գործունեությունը, Հայաստանի Հանրապետության պաշտպանությանը մասնակցելու գործընթացում քաղաքացիների իրավունքները և  պարտականությունները, ինչպես նաեւ զորահավաքային նախապատրաստության և զորահավաքի անցկացման հետ կապված հարաբերությունները»,- ընդգծեց Սարգսյանը:

Դվինի հնավայրի համար ծրագիր կազմելու, ֆինանսավորում ստանալու և գիտական մասնագետների միջոցով այն ներկայանալի դարձնելու համար կառավարության ուշադրությունը կհրավիրեն խնդրին: «Արմենպրես»–ի հետ զրույցում ՀՀ տարածքային կառավարման և զարգացման նախարար Դավիթ Լոքյանն ասաց, որ Արարատի մարզպետի հետ պայմանավորվել են խնդիրը ներկայացնել առաջիկա մեկ ամսում:

«Կարծում եմ, Դվինի հնավայրի համար պետք է համապետական ծրագիր ստեղծենք: Հատկապես, երբ համայնքների համար գերակայություն ենք հռչակել զբոսաշրջությունը: Մարզերի ռազմավարության հիմնական ուղղություններից գլխավորը, գյուղատնտեսության հետ, նաև տուրիզմն է: Ունենալ այսպիսի պատմական վայր և այն չշահագործել այնպես, որ եկամուտ բերի երկրին և շրջակա բնակչությանը, ցավալի է: Մենք Արարատի մարզպետի հետ պայմանավորվեցինք, որ խնդիրը առաջիկա մեկ ամսում կփոխանցենք կառավարության քննարկման դաշտ»,-ասաց Լոքյանն ու հավելեց՝ կարծում եմ, կառավարության առաջնային ծրագրերից մեկն էլ կարող է սա դառնալ:

Նախարարը նկատեց Դվինի հնավայրը անհրաժեշտ կերպով ներկայանալի դարձնելու խնդիրը: «Հունաստանում կամ Իտալիայում այսպիսի վայրերում միլիոնավոր մարդիկ են այցելում: Մենք առանձնապես բան չունենք անելու, անհրաժեշտ է պարզապես այն ներկայացնել»,-ասաց նախարարն ու հավելեց՝ պետք են համապատասխան ծրագիր, ֆինանսավորում և գիտական մասնագետների աշխատանք:

Արարատի մարզպետի տեղակալ Աշոտ Վարդանյանի խոսքով՝ իրենք ևս աշխատանքներ են իրականացնում այդ ուղղությամբ: «Մեկ ամիս առաջ առաջարկություն ենք ներկայացրել ՀՀ մշակույթի նախարարություն՝ հնավայրի տարածքում ցուցանակներ տեղադրելու համար: Այցելուների մեծ հոսք է լինում հնաբերդ, սակայն ոչ մի տեղեկություն չկա գրված, ցուցանակները կօգնեն ծանոթանալ մանրամասներին»,-ասաց Վարդանյանն ու հավելեց՝ զբոսաշրջիկների մեծ հոսք է լինում հատկապես երեկոյան ժամերին, երբ վերադառնում են Խոր Վիրապից:

Մարզպետ Արամայիս Գրիգորյանի կարծիքով, հնաբերդն առանձնահատուկ է այն առումով, որ մարզում զարկ է տալիս զբոսաշրջությանը: «Այս տարի ասֆալտապատել ենք դեպի հնաբերդ բերող ճանապարհը, որպեսզի հյուրերը հեշտությամբ գան և տեսնեն պատմամշակութային այս կենտրոնը: Կփորձենք հաջորդ տարի ևս ասֆալտապատման աշխատանքներ կատարել»,-եզրափակեց մարզպետը:

Հայկական ակնաբուժության նախագծի (ՀԱՆ) և «Ucom» Հիմնադրամի համագործակցությամբ արդեն երկրորդ տարին է, ինչ հանրապետության բոլոր մարզերի բնակիչներն ակնաբուժական անվճար ծառայություններ են ստանում: Այժմ ծրագիրն ընթանում է Շիրակի մարզում: Արթիկում կայանած Աչքի շարժական հիվանդանոցում շարունակվում են խորացված հետազոտությունները, լազերային միջամտությունները, վիրահատությունները, մարզի դպրոցներում՝ ակնային զննումները եւ աչքի խնամքի վերաբերյալ հանրային կրթության դասերը:

Ինչպես տեղեկացնում է «Արմենպրես»-ը, ընթացող աշխատանքներին ծանոթանալու նպատակով Շիրակի մարզ այցելեցին Հայկական ակնաբուժության նախագծի հիմնադիր նախագահ Ռոջեր Օհանիսյանը, ՀԱՆ հայաստանյան գրասենյակի տնօրեն Նունե Եղիազարյանը, «Ucom» ընկերության գլխավոր տնօրեն Հայկ Եսայանը եւ «Ucom» Հիմնադրամի տնօրեն Նարինե Սուվարյանը:

«Այս տարի մենք առանձնահատուկ ուշադրություն ենք դարձնում շաքարախտային դիաբետով հիվանդներին: Յուրաքանչյուր մարզ այցելելիս մենք հորդորում ենք, որ նրանք անպայման ակնային հետազոտություն անցնեն, քանի որ նրանց մոտ դիաբետիկ ռետինոպաթիայի վտանգը մեծ է: Հայաստան ենք բերել հատուկ սարքավորումներ, որոնցով ակնային զննում են անցնելու շաքարային դիաբետով բոլոր հիվանդները: Առաջին սարքավորումները Գյումրիում են», – ասաց Հայկական ակնաբուժության նախագծի հիմնադիր նախագահ Ռոջեր Օհանիսյանը:

«Ucom» Հիմնադրամի համագործակցությամբ 2017թ. ընթացքում արդեն «Լույս հայի աչքերին» ծրագրի շրջանակներում Կոտայքի եւ Գեղարքունիքի մարզերում 4.600-ից ավելի մարդ ակնային զննում է անցել, շուրջ 2200-ը՝ խորացված հետազոտություն Աչքի շարժական հիվանդանոցում, կատարվել է շուրջ 750 վիրահատություն եւ 280 լազերային միջամտություն: Ուրախ եմ, որ մեր համագործակցությունը շարունակվում է, եւ այդպիսով աչքի լույս ենք պարգեւում սոցիալապես անապահով մեր հայրենակիցներին», – ասաց Հայկական ակնաբուժության նախագծի հայաստանյան գրասենյակի տնօրեն Նունե Եղիազարյանը:

«Տարիներ շարունակ Հայաստանի տարբեր մարզերում այս ծրագիրն իրականացնելու ընթացքում մշտապես ոգեշնչվել ենք հազարավոր մարդկանց շնորհակալական խոսքերից: Ucom-ը որպես ծրագրի աջակից խիստ կարևորում է այն, որ սոցիալապես խոցելի անձինք հնարավորություն ունեն անվճար օգտվելու ակնաբուժական ժամանակակից ծառայություններից և արդյունքում՝ վերականգնելու իրենց աչքի լույսը», – ասաց «Ucom» ընկերության գլխավոր տնօրեն Հայկ Եսայանը:

Գյումրի այցելությամբ ավարտվեց նաեւ Տեսողության համաշխարհային օրվան նվիրված միջոցառումների շաբաթյակը: Այդ ընթացքում Հայկական ակնաբուժության նախագիծը կազմակերպեց հանրային իրազեկման միջոցառում, որի ժամանակ այցելուներին տրամադրվեցին առավել մեծ տարածում ունեցող ակնային հիվանդությունների մասին տեղեկատվական թերթիկներ, ինչպես նաև բաժանվեցին այդ հիվանդությունների նախանշանները նմանակող հատուկ ակնոցներ՝ որոնք կրելով քաղաքացիները մի փոքր տարածք պետք է անցեին քայլելով։ Իրազեկման միջոցառման մասնակիցները պատասխանեցին տեսողության հետ կապված հարցերի և հնարավորություն ունեցան համտեսելու տեսողության համար օգտակար մթերքներով պատրաստված ուտեստներ։ Հանրապետության մի շարք դպրոցներում ակնային զննումներ եւ տեսողության բաց դասեր անցկացվեցին՝ երեխաներին ծանոթացնելու աչքի խնամքի կանոններին: Դպրոցներում բաժանվեց «Ucom» Հիմնադրամի հետ իրականացվող ծրագրի շրջանակներում ՀԱՆ-ի հեղինակած «Տեսունիկի տեսողության խաղը» մանկական գիրքը, որը ՀՀ կրթության եւ գիտության նախարարության կողմից հաստատվել է որպես ուսումնաօժանդակ ձեռնարկ եւ այսուհետ կտարածվի հանրապետության բազմաթիվ դպրոցներում:

Զբոսաշրջության պետական կոմիտեն մի շարք ծրագրեր և ռազմավարություններ է մշակել և մշակում, որոնք կնպաստեն զբոսաշրջության վիճակագրության բարելավմանը։ 
«Արմենպրես»–ի հետ զրույցում այս մասին ասաց ՀՀ տնտեսական ներդրումների և զարգացման   նախարարության Զբոսաշրջության պետական կոմիտեի նախագահ Զարմինե Զեյթունցյանը։ 
«Մեր առջև լուրջ խնդիր ենք դրել, որպեսզի բարելավենք զբոսաշրջային վիճակագրությունը։ Այսօր մենք ունենք դետալիզացված վիճակագրություն և շարունկում ենք աշխատել այդ ուղղությամբ և, կարծում եմ, մինչև տարեվերջ կամ հունվար ամսվա սկիզբը կունենանք ավելի դետալիզացված վիճակագրություն»,- նշեց Զարմինե Զեյթունցյանը։ 

Նրա խոսքով՝ զբոսաշրջային ապրանքի մասին շատ են խոսում, մինչդեռ բազմաթիվ հուշարձաններ այսօր ընդամենը հուշարձաններ են։ Կոմիտեի նպատակներից է՝ ստեղծել ինտեգրացված զբոսաշրջային ապրանք։ 
«Մենք ունենք 25 000 հուշարձան և 960-ից ավելի համայնք։ Այժմ մշակում ենք մեծ քաղաքների (Գյումրի, Վանաձոր և այլն), ինչպես նաև ամենահայտնի զբոսաշրջային վայրերի (Գառնի, Գեղարդ, Զվարթնոց, Արենի) զբոսաշրջության հայեցակարգերը»,- ընդգծեց Զբոսաշրջության պետական կոմիտեի նախագահը։ 
Նա տեղեկացրեց, որ մշակվել և Կառավարությանն է ներկայացվել «Հայաստանը՝ առաջին քրիստոնյա երկիր» ռազմավարությունը, և հիմա կարող են արդեն մշակել նաև երթուղիներ։ Զեյթունցյանի խոսքով՝ շատ կարևոր է նաև մասնավորի հետ աշխատելը։ 

Մշակվում է նաև «Ռուսական հետք» ծրագիրը, որն արվում է Տուրիզմի ինստիտուտի տնօրեն Ռոբերտ Մինասյանի հետ, քանի որ դա եղել է նրա գաղափարներից։ 
«Շատ շուտով մենք այդ ծրագիրը կներկայացնենք ռուսական շուկային։ Ծրագրում ընդգրկելու ենք ամբողջ Հայաստանի ճարտարապետական այն հուշարձանները, այն վայրերը, որտեղ տեղի են ունեցել պատմական իրադարձություններ, որոնք կապված են ռուսների հետ, այն եկեղեցիները, պահպանվող այն նյութերը, ինչպիսիք են Գյումրու Սև բերդի արխիվային ձեռագրերի հետաքրքիր հավաքածուն։ Գյումրու Ալեքսանդրի այգում առաջին ծառը տնկել է Ռուսաստանի կայսրը կայսրուհու համար։ Այդ ծառն, իհարկե, այսօր չկա, բայց պարզ է, որ զբոսաշրջությունը հիմնվում է այդպիսի պատմությունների վրա։ Ծրագրում կա նաև Պասկևիչի կամուրջը, ինչպես նաև այն կետը, որտեղ Պուշկինը հանդիպել է այն սայլին, որը բերել է Գրիբոյեդովի դին»,- ներկայացրեց Զարմինե Զեյթունցյանը։ 
Հունվար ամսին Գյումրիում անցկացվելու է շատ հետաքրքիր միջոցառում, որտեղ բազմաթիվ ռուս զբոսաշրջիկներ են գալու և հատուկ հագուստներով լոգանք են ընդունելու սառը ջրի մեջ։ 
ՄԱԿ-ի համաշխարհային զբոսաշրջության կազմակերպության և BISEC-ի հետ համատեղ քննարկվել է Հայաստանի ներգրավվածությունը «Մետաքսի ճանապարհ»-ի շրջանակում։ Քննարկման ժամանակ Հայաստանը իր վրա է վերցրել «Գինու զբոսաշրջություն մետաքսի ճանապարհին» զբոսաշրջային արդյունքի ռազմավարությունը և մարքեթինգային քաղաքականությունը մշակելու նախաձեռնությունը։

Զբոսաշրջության պետական կոմիտեի նախագահի խոսքով՝ իրենք Հայաստանն աշխարհին ցանկանում են ներկայացնել որպես գինու հայրենիք։ 
«Զբոսաշրջային արդյունքի զարգացման առումով շատ կարևոր ենք համարում փառատոնները։ Դրանք աշխարհում լայնորեն հայտնի են որպես զբոսաշրջության լավագույն ձևեր։ Փորձում ենք մեր փառատոնների մակարդակը տարեցտարի ավելի բարձրացնել, որպեսզի ոչ միայն Հայաստանում գտնվող զբոսաշրջիկը ցանկանա ներկա լինել այդ փառատոնին, այլև հատուկ դրա համար գա մեր երկիր։ Նմանատիպ հաջողություն գրանցվել է «Արենու գինու փառատոն»-ի ժամանակ»,- տեղեկացրեց Զեյթունցյանը։ 
Նա նշեց, որ սկսել են ռեգիոնալ զբոսաշրջային ապրանքի ձևավորման համար աշխատանքներ իրականացնել։ Վրաստանի զբոսաշրջության գործակալության հետ մշակել են մի ծրագիր, որի շրջանակում զբոսաշրջային օպերատորների մի խումբ է եկել Հայաստան։ Շուտով Հայաստանից այդպիսի մի խումբ կգնա նրանց երկիր՝ ծանոթանալու Վրաստանի տեսարժան վայրերին և փորձելու ստեղծել սիներգիա՝ այնպիսի ապրանք, որը հիմնված է երկրների տարբերությունների վրա, և դրանք միավորելով ստացվում է մի արդյունք, որի շնորհիվ զբոսաշրջիկը ունենում է անմոռանալի տպավորություններ։ 
«Մենք հստակ աշխատում ենք մի քանի շուկաների՝ Ռուսաստանի, Իրանի, Պարսից ծոցի երկրների, Արևմտյան և Արևելյան Եվրոպայի այն երկրների հետ, հատկապես որոնց հետ մենք ունենք ուղիղ չվերթներ։ Այստեղ ընդգրկված է նաև մեր ներքին շուկան, ինչպես նաև Գերմանիան, քանի որ այն ամենամեծ զբոսաշրջային շուկան է Եվրոպայում»,- շեշտեց Զարմինե Զեյթունցյանը։ 
Հայաստանի մասին ֆիլմ է նկարահանվել և այժմ նկարվում են դրա տարբեր տարբերակները։ Լինելու է փոքրիկ՝ 45 վայրկյան տևողությամբ ֆիլմաշար, հատուկ զբոսաշրջային ուղղությունների մասին՝ կրոնական թեմայով, էկոզբոսաշրջության, գինու մասին և այլն։ 

«2018 թվականին նախատեսում ենք որոշակի ֆինանսական միջոցներ հատկացնել տուրապրանքի  համար՝ ստեղծել հատուկ տիպի մարքեթինգային հուշանվերների ցանց, որպեսզի զբոսաշրջիկը կարողանա ամբողջական տպավորություն ստանա։ Տուրապրանքի մեջ ցանկանում ենք, բացի տեսարժան վայրերից, ընդգրկել նաև հարևան գյուղը, այնտեղի մշակույթը, նիստն ու կացը»,- տեղեկացրեց Կոմիտեի նախագահը։ 
Ստեղծվել է Հայաստանի զբոսաշրջային կայքը՝ armenia.travel, որն այսօր արդեն աշխատանքային փուլից մտել է օգտագործման փուլ։ Նրա խոսքով՝ կայքը կդառնա Հայաստանի հիմնական գործիքը, որի շնորհիվ հնարավոր կլինի հասանելի լինել այն զբոսաշրջիկին, ով դեռ մտածում է որևէ տեղ հանգստանալու մասին։ 
Շուտով կստեղծվեն զբոսաշրջային տեղեկատվական կենտրոններ Սուրգուտ և Եկատերինբուրգ քաղաքներում մեր հովանավորների շնորհիվ։ Հայաստանի հիմնական շուկաներում՝ Ռուսաստանում և Իրանում իրականացվում է շատ թիրախավորված մարքեթինգային քաղաքականություն։ 
Զարմինե Զեյթունցյանն առաջիկայում մեկնելու է Գերմանիա՝ Բեռլին և Շտուտգարտ, որտեղ ունենալու է շնորհանդես, հրավիրվել են 200 տուրօպերատոր, Հայաստանից նույնպես կլինեն։ Շնորհանդեսի ժամանակ տեղի կունենա B2B (բիզնեսը բիզնեսի համար) ձևաչափով հանդիպում։ Նոյեմբերի վերջին նա մեկնելու է Հնդկաստան, և անտեղ երեք քաղաքներում նմանատիպ շնորհանդեսներ են իրականացվելու։ 
«Նախատեսվում է ավելի ագրեսիվացնել թվային մարքեթինգի քաղաքականությունը բոլոր այն շուկաներում, որոնց մենք ցանկանում ենք հասնել։ Հաջորդ տարի ցանկանում ենք մեր աչքի առաջ ունենալ Չինական, Հնդկական և Ճապոնական շուկաները, որոնք մեզ համար շատ հետաքրքիր են։ Ես ունեմ մի սկզբունք՝ չմտնել քաոսային շուկա, և մինչ այժմ այդ շուկաներ մտնելը շատ շուտ էր։ Պետք է ուսումնասիրել տվյալ շուկան, հասկանալ այն, հետո մտնել, ինչպես Ռուսաստանի և Իրանի դեպքում է»,- տեղեկացրեց Զարմինե Զեյթունցյանը և, եզրափակելով խոսքը, ասաց, որ նպատակ կա Հայաստանը ցույց տալ աշխարհին իր ողջ կոլորիտով։

Լիլիթ Դեմուրյան