Հայաստանի Հանրապետության պաշտպանության նախարար Վիգեն Սարգսյանը հայկական բանակում սպորտային վաշտի առկայությունը մեծ խնդիր է համարում: Ազգային ժողովի պաշտպանության և անվտանգության հարցերի մշտական հանձնաժողովում «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ ՀՀ պաշտպանության նախարարը` պատասխանելով ՀՀԿ խմբակցության պատգամավոր Ֆելիքս Ցոլակյանի հարցին` ընդգծեց, որ այդ վաշտում այն քաղաքացիներն են, ովքեր զորակոչվում են զինվորական ծառայության, պետությունը ծախսում է միջոցներ այդ վաշտը պահելու համար, իսկ այդ ծախսերն արդարացված չեն:

«Խոսքը մոտավորապես 100 մարդու մասին է, նրանց սպասարկող սպայական, ենթասպայական հաստիքների քանակը ևս 100 է, ինչը պահանջում է հսկայական ծավալի ծախս և» աշխատավարձի, և» կերակրման, և» կեցության և» հանդերձավորման: Բայց այդ մարդիկ իրենց սպորտային առաջընթացի համար պարբերաբար մարզումների մեջ են` ֆեդերացիաների տրամադրության տակ: Իրենք զորամասում գրեթե չեն լինում ու դա հսկայական ծախս է` բացառապես չարդարացված»,- «Արմենպրես»-ի փոխանցմամբ` ասաց Սարգսյանը:

Նա հավելեց, որ իրենք  հարցը քննարկել ենք Հայաստանի ազգային օլիմպիական կոմիտեի և Հայաստանի ֆուտբոլի ֆեդերացիայի հետ, որոնք հիմնական շահառուներն են այդ սպորտային վաշտ հասկացության և եկել են եզրակացության: «Կառավարության կողմից սահմանված սանդղակով Օլիմպիական խաղերում, Եվրոպայի և աշխարհի առաջնություններում, պատանեկան առաջնություններում առաջինից չորրորդ տեղ գրաված անձինք ստանում են տարկետում` 3 կամ 4 տարի ժամկետով: Այդ ընթացքում արդյունքը կրկնելու դեպքում նորից են ստանում տարկետում, չկրկնելու դեպքում` զորակոչվում ժամկետային զինվորական ծառայության: Կարծում եմ, որ արդար լուծում է: Հույս ունեմ, որ սա կստիպի մեր մարզիկներին ավելի բարձր ցատկել և ավելի արագ վազել»,- եզրափակեց Վիգեն Սարգսյանը:

 Յուրաքանչյուր տարի  3000-4000 ուսանող է զորակոչվում: ՀՀ բոլոր քաղաքացիները պետք է կատարեն իրենց պարտականությունը հայրենիքի առջեւ: «Արմենպրես»-ի հաղորդմամբ, լրագրողների հետ ճեպազրույցում ՀՀ կրթության եւ գիտության նախարար Լեւոն Մկրտչյանն, անդրադառնալով ակադեմիական տարկետման տրամադրման կարգի փոփոխությանը, որպես օրինակ նշեց Իսրայելին, որտեղ այս փոփոխությունները  բավական բարձր արդյունքներ են ցույց տվել կրթական բնագավառում: «Որպես այլընտրանք գոյություն ունի «Պատիվ ունեմ» ծրագիրը, որը հնարավորություն է տալիս երեխաներին ավարտել ուսումը, ստանալ սպայի աստիճան եւ ապա զորակոչվել: Իբրեւ սպա եւ մասնագետ նրանք շատ ավելի օգտակար կլինեն մեր զինված ուժերին»,-ասաց նախարարը՝ հավելելով, որ այն ուսանողներն, ովքեր սովորում են առաջին, երկրորդ կուրսերում, հնարավորություն ունեն երկու տարի վեց ամսով անցնել «Պատիվ ունեմ»-ի ձեւաչափով եւ սպայական աստիճան ստանալ: «Մեզ համար դեռեւս խնդիր է երրորդ եւ չորրորդ կուրսերում սովորող ուսանողների հարցը»,-հավելեց Լեւոն Մկրտչյանը:

 «Զինվորական ծառայության և զինծառայողի կարգավիճակի մասին» օրենքի նախագծով ակադեմիական տարկետման տրամադրման կարգում փոփոխություններ են նախատեսվում: Նախագիծը քննարկվում է ԱԺ պաշտպանության եւ անվտանգության հարցերի հանձնաժողովում:

 Ազգային ժողովի պաշտպանության և անվտանգության հարցերի մշտական հանձնաժողովը քննարկում է «Զինվորական ծառայության և զինծառայողի կարգավիճակի մասին» օրենքի նախագիծը խորհրդարանի լիագումար նիստի օրակարգ ընդգրկելու հարցը: Հիմնական զեկուցող, ՀՀ պաշտպանության նախարար Վիգեն Սարգսյանը նշեց, որ ինչպես «Պաշտպանության մասին» օրենքի նախագծի դեպքում, այս նախագծի ընդունումն էլ հետապնդում է երեք հիմնական նպատակ` սահմանադրական բարեփոխումների գործադրման իրավական հիմքի ապահովում, ոլորը կարգավորող օրենքների կոնսոլիդացում և նոր քաղաքականությունների ներդրում, այդ թվում` «Պատիվ ունեմ» և «Ես եմ» ծրագրերի իրականացումն ապահովելու իրավական դաշտի ստեղծում:

«Այս օրենքի նախագիծը իր մեջ ներառում է պաշտպանության ոլորտի քաղաքականության այսօր գործող երեք օրենքներ` «Զինապարտության մասին» օրենքը, «Զինծառայողների և նրանց ընտանիքի անդամների սոցիալական ապահովման մասին» օրենքը և «Զինվորական ծառայություն անցնելու մասին» օրենքը: Օրենքը կարգավորում է Հայաստանի Հանրապետության պաշտպանությանը մասնակցելու, սահմանադրական պարտականության շրջանակներում քաղաքացիների զինվորական ծառայության նախապատրաստության, զինվորական ծառայության և պահեստազորային պատրաստականության կազմակերպման և իրականացման, ինչպես նաև զինծառայողների, նրանց ընտանիքների անդամների ու զինծառայողներին հավասարեցված անձանց իրավական և սոցիալական երաշխիքների հետ կապված հարաբերությունները»,- «Արմենպրես»-ի փոխանցմամբ` նշեց նախարարը:

Օրենքի նախագծի ընդունմամբ ակնկալվում է ապահովել խաղաղ և պատերազմի ժամանակ Հայաստանի Հանրապետության զինված պաշտպանության արդյունավետությունը, բարձրացնել քաղաքացիների վստահությունը պարտադիր զինվորական ծառայության և պահեստազորային պատրաստության գործընթացի նկատմամբ, քաղաքացիների մոտ խթանել պարտադիր և պայմանագրային զինվորական ծառայություն անցնելու կամարտահայտման դրսևորումը, նպաստել «Ազգ-Բանակ» գաղափարախոսության ամբողջական իրացմանը:

Անդրադառնալով օրենքի նախագծի ընդունման անհրաժեշտությանը` Վիգեն Սարգսյանն ընդգծեց, որ Գործող «Զինվորական ծառայություն անցնելու մասին» ՀՀ օրենքով սահմանվում են զինվորական ծառայության տեսակները` պայմանագրային, պարտադիր և պահեստազորային, սակայն հիմնական կարգավորում տրվում է պայմանագրային զինծառայություն անցնելու հարաբերություններին, իսկ զորակոչի միջոցով իրականացվող պարտադիր զինվորական ծառայության և պահեստազորում ծառայության հետ կապված հարաբերությունները գրեթե կարգավորված չեն: Գործող «Զինծառայողների և նրանց ընտանիքների անդամների սոցիալական ապահովության մասին» ՀՀ օրենքով սահմանվող հարաբերություններն ընդգրկում են զինվորական ծառայության մեջ գտնվող անձանց, նրանց ընտանիքների անդամների և նրանց հավասարեցված անձանց իրավական և սոցիալական երաշխիքները, որոնք առանձին օրենքի տեսքով կարգավորման անհրաժեշտությունն արդեն իսկ արդիական չէ: Արդյունքում, ժամանակի հրամայական է դարձել վերը նշված օրենքներով կարգավորվող հարաբերությունները սահմանել նորովի և մեկ միասնական օրենքի տեսքով:

 Best of British Education կրթական ցուցահանդեսը Հայաստանում հնարավորություն կընձեռի ծանոթանալու բրիտանական որակյալ կրթություն ստանալու հնարավորություններին: «Արմենպրես»-ի հաղորդմամբ՝ հոկտեմբերի 23-ին լրագրողների հետ հանդիպմանն այս մասին ասացին կազմակերպիչները:

«Հայաստանում Մեծ Բրիտանիայի դեսպանատունը շատ ուրախ է Բրիտանական խորհրդի հետ համատեղ կազմակերպելու ցուցահանդես, որի շրջանակում կներկայացվեն Մեծ Բրիտանիայում  և Հայաստանում բրիտանական որակյալ կրթություն ստանալու և զարգացնելու հնարավորությունները: Այն հիանալի հնարավորություն է ինչպես Հայաստանի դպրոցականների և երիտասարդների, այնպես էլ տարբեր ոլորտների մասնագետների համար»,-ասաց Հայաստանում Միացյալ Թագավորության դեսպան Ջուդիթ Ֆարնուորթը ու առանձնացրեց ցուցահանդեսի շրջանակում ներկայացվելիք երկու ՝  Chevening կրթաթոշակի և John Smith Fellowship ծրագրերը:

 Chevening կրթաթոշակի ծրագիրը հնարավորություն է ընձեռում հայաստանցի ուսանողներին իրենց մագիստրոսական կրթությունն անվճար ստանալ բրիտանական լավագույն համալսարաններում: Կրթաթոշակի շրջանակներում ֆինանսավորվելու է ուսանողների ինչպես կրթության ողջ վճարը, այնպես էլ կեցության և ուղևորության ծախսերը: Իսկ John Smith Fellowship ծրագրով նախատեսված կրթաթոշակն ուղղվում  է սկսնակներին: Այն հնարավորություն է ընձեռում 4 շաբաթ ուսուցում անցնել բրիտանական պետական և մասնավոր կառույցներում: Հայտագրումների փուլն արդեն բաց է:

«Հայաստանում գտնվելու երկու տարիներին նկատել եմ, որ այստեղ բարձր են գնահատում կրթությունը: Եվ բրիտանական բուհերը ևս շահագրգռված են հայկական բուհերի հետ համագործակցությունն ամրապնդելու հարցում: Նաև ուրախ եմ, որ հետաքրքրված է ՀՀ կրթության և գիտության նախարարությունը՝ օգտագործելու բրիտանական փորձը՝ դպրոցներում անգլերենի ուսուցումը բարելավելու համար»,-ընդգծեց դեսպանը:

Ցուցահանդեսը կազմակերպվում է մի շարք միջոցառումների շրջանակում, որով տոնում ենք Բրիտանիայի և Հայաստանի միջև դիվանագիտական հարաբերությունների հաստատման 25-ամյակը:  «Պատահական չէ, որ կազմակերպել ենք մի շարք մշակութային և կրթական ծրագրեր: Մենք համոզված են, որ կրթության և մշակույթի միջոցով կարող ենք վստահություն սերմանել երկու երկրներին միջև և խրախուսել համագործակցությունը: Best of British Education-ն այդ ծրագրերից հերթականն է»,-նշեց Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:

Ցուցահանդեսին ներկայացվելու են շատ ծրագրեր՝ բրիտանական խորհրդի անգլերենի ուսուցման և դասավանդման ծրագրերը, անգլերենի իմացության IELS, APTIS թեստերը, Դիլիջանի միջազգային դպրոցը, Քեմբրիջի միջազգային դպրոցը, Հայաստանում բրիտանական միջազգային դպրոցը և այլն:

Ներկայացված են լինելու տարբեր կազմակերպություններ, որոնք Հայաստանում ներկայացնում են կրթական տարբեր ծրագրեր, թեստեր, որակավորումներ: Կառաջարկվեն տարբեր ռեսուրսներ, որոնք երեխաները կարող են օգտագործել անգլերենը բարելավելու համար: Կլինեն նաև կազմակերպություններ, որոնք կներկայացնեն վերապատրաստման ծրագրեր անգլերենի ուսուցիչների համար:

Բրիտանական կրթական ծրագրերի ցուցահանդեսը տեղի կունենա հոկտեմբերի 25-ին «Արմենիա Մարիոթ» հյուրանոցում: