Ամերիաբանկը ՓՄՁ-ների և ֆիզիկական անձանց համար մինչև տարեվերջ գործող վարկավորման հատուկ առաջարկներով է հանդես գալիս: Լրագրողների հետ հանդիպմանը Ամերիաբանկի Մանրածախ գործառնությունների գծով տնօրեն Արման Բարսեղյանը ներկայացրեց վարկային նոր արշավի մանրամասները: Նրա խոսքով` 2017-ի առաջին ինն ամիսներին մակրոտնտեսական երկու հիմնական պարամետրերի` փոխարժեքի (համեմատաբար կայուն ժամանակաշրջան)  ու տոկոսադրույքի (նվազման միտում) հետ կապված իրավիճակը նախադրյալներ է ստեղծել ակտիվ տնտեսական գործունեության ու տնտեսական աճի համար: «Այդ համատեքստում մենք վերանայել ենք վարկային մեր տոկոսադրույքները մի փոքր այլ մոտեցմամբ: Ոչ թե գնացել ենք տոկոսադրույքների պարզ նվազեցման ճանապարհով, այլ դրանց մակարդակը կապել ենք հաճախորդի ռիսկայնության հետ: Եվ երկու արշավները, մի դեպքում ՓՄՁ-ների, մյուս դեպքում հիփոթեքային վարկերը ֆիզիկական անձանց համար, ներկայում ուժի մեջ են ու մինչև տարեվերջ ուժի մեջ են լինելու»,-«Արմենպրես»-ի փոխանցմամբ` ասաց Արման Բարսեղյանը: 

Ինչպես տեղեկացրեց բանկի ներկայացուցիչը, իրենք առանձնացրել են երեք պարամետր (եկամտի չափ, վարկ/գրավ հարաբերակցություն և վարկավորման ժամկետ), որի հիման, գնահատելով ռիսկը, դուրս է բերվում համապատասխան տոկոսադրույքը:  Հետևաբար, այն հաճախորդները, որոնք այդ երեք պարամետրերով կհամարվեն ցածր ռիսկային, կստանան ավելի ցածր տոկոսադրույքով վարկեր: Բարձր ռիսկայնությանն էլ կհամապատասխանեն ավելի բարձր տոկոսադրույքով վարկեր: «Այս մոտեցման ամենակարևոր հանգամանքն այն է, որ պահպանում ենք արդարության, իսկ բանկի տեսանկյունից` ռիսկի և հատույցի համարժեքության սկզբունքը»,-նշեց Արման Բարսեղյանը:

 Վարկային առաջարկները գործում են երեք արժույթների դեպքում էլ: Սակայն, ինչպես Արման Բարսեղյանն ասաց, իրենք խրախուսում են հայրենական արժույթով վարկավորումը: «Արշավի շրջանակներում համադրելով ներկայացված երեք ցուցանիշները` ՓՄՁ-ն կարող է վարկավորվել ՀՀ դրամի դեպքում անգամ 10.5 տոկոսով, ԱՄՆ դոլարի դեպքում` 6.5, եվրոյի դեպքում`5 տոկոսով: Ֆիզիկական անձանց դեպքում ՀՀ դրամով վարկերը կարող են սկսվել ընդհուպ մինչև 10 տոկոսից, ԱՄՆ դոլարով` 7 տոկոսից, եվրոյի դեպքում` 5 տոկոսից»,-նշեց Ամերիաբանկի ներկայացուցիչը: 

Ինչ վերաբերում է վարկերի առավելագույն չափին, ապա Արման Բարսեղյանի խոսքով, եթե հաճախորդի վարկունակությունն ու վճարունակությունը բավարար է, իրենք պատրաստ են դիտարկել ցանկացած արժողության վարկի տրամադրման հարցը: «Բայց օրինակ բոլորս էլ հասկանում ենք, որ ՓՄՁ վարկերի դեպքում մեր բանկի պարագայում խոսքը գնում է ոչ ավելի, քան 300 հազար դոլար արժողությամբ վարկերի մասին»,-ավելացրեց նա:

Հաշվի առնելով հանրության շրջանում վարկային նոր առաջարկների նկատմամբ հետաքրքրությունն ու կարևորությունը` Ամերիաբանկի ֆեյսբուքյան էջում հոկտեմբերի 26-ին`ժամը 20:00-21:00-ը, կկազմակերպվի հարց ու պատասխան: Այս թեմային վերաբերող բոլոր հարցերին կպատասխանի Ամերիաբանկի Մանրածախ վարկավորման վարչության ղեկավար Իրինա Աբրահամյանը:

Տեղական ինքնակառավարման համակարգում տեղեկատվական ժամանակակից տեխնոլոգիաների կիրառումը կնպաստի ՏԻՄ-երի թափանցիկության, հրապարակայնության և հաշվետվողականության բարձրացմանը:

«Արմենպրես»–ի հաղորդմամբ՝ Երևանում մեկնարկել է «Նորարարությունները և տարածքային զարգացումը որպես Արևելյան գործընկերության երկրների աճի գործոններ» խորագրով համաժողովը:

ՀՀ տարածքային կառավարման և զարգացման նախարար Դավիթ Լոքյանը համաժողովի ընթացքում շնորհակալություն հայտնելով գործընկերներին արդեն երկու իրար հաջորդող տարիներին CORLEAP-ի կոնֆերանսը  Հայաստանում կազմակերպելու համար՝ նշեց, որ  այն լուրջ ոգևորություն է առաջ բերում Հայաստանի համայնքներում:

«Կարծում եմ, Արևելյան գործընկերության լավագույն ձևաչափերից մեկն է, որը շատ ինտենսիվ նպաստում է մեր երկրում տարածքային և համայնքային գործընթացին: Մենք Հայաստանի Հանրապետությունում տեղական և տարածքային մարմիններում իրականացնում ենք խոշորածավալ բարեփոխումներ և այդ բարեփոխումներում մեր կողքին կանգնած են Եվրամիության մեր գործընկերները: Մենք այսօր խոշորածավալ բարեփոխումներ ենք իրականացնում: Արդեն 1 շաբաթից մեր երկրում շուրջ 350  համայնքում ընթանալու են ընտրություններ, որի արդյունքում կառավարման օպտիմալացման փոփոխություն ենք իրականացնելու համայնքներում և ունենալու ենք միավորված համայնքներ: Դրանք իրենց գործառույթները կանոնակարգելու են, օպտիմալացնելու եկամուտներն ու ծախսերը, բերելու են այնպիսի վիճակի, որը ծառայությունների մատուցման նոր հնարավորություն է  ապահովելու բնակիչների համար»,- ընդգծեց Լոքյանը և նշեց, որ այս պրոցեսում, բացի Եվրամիությունից, իրենց կողքին է նաև ԱՄՆ ՄԶԳ-ն, որն, իր կարծիքով, ամենակարևոր, ամենալուրջ դերակատարումն  ունի այս բարեփոխումների ողջ ընթացքում:

Նախարարի խոսքով՝ այս կոնֆերանսով սկիզբ է դրվում մի շատ կարևոր պրոցեսի, որը Եվրամիության շատ երկրներ անցել են, բայց ժամանակն է, որ Հայաստանը նույնպես իր տեղական իշխանություններում ունենա էլեկտրոնային կառավարում:

«Բոլորիս համար հասկանալի է, որ այն ձևով, որով մենք մինչ այժմ աշխատել ենք, դրանք փոքր արդյունավետություն ունեն, և ինֆորմացիայի ցանկացած բլոկ դժվար  հասանելի է և՛ բարձրագույն իշխանությունների, և՛ հասարակության համար,  և՛ համայնքի բնակիչների համար: Էլեկտրոնային կառավարումն այսօր դառնում է մեր կառավարության հիմնական նպատակներից մեկը: Մեզ անհրաժեշտ է, որպեսզի մենք տեղական ինքնակառավարման համակարգում ունենանք ժամանակակից տեխնոլոգիայով ապահովված կենտրոններ, որոնք առցանց կհեռարձակեն ամբողջ ինֆորմացիան, որը կա համայնքում՝ սկսած ավագանու նիստերից, ընդունված որոշումներից և վերջացրած նրանով, թե տվյալ պահին համայնքում ինչպիսի իրավիճակ է տիրում: Այժմ մենք որոշում ենք ընդունել, որ առաջիկա 1-2 տարվա ընթացքում պետք է հասնենք շատ բարձր մակարդակի՝ մեր համայնքներում ունենալով լավ համակարգեր»,- ասաց Դավիթ Լոքյանը:

Նա նշեց մի ուրախացնող հանգամանք՝ իրենք, ՀՀ աշխատանքի և սոցիալական հարցերի նախարարության հետ համատեղ, սկսել են մի գործընթաց, որով համայնքներում ստեղծվելու են սոցիալական ծառայությունների օղակներ: Դրանք իրենցից ենթադրում են ամբողջական օղակներ, որոնք շատ կարճ ժամանակից հետո փոխանցվելու են համայնքներին, որպեսզի համայնքն ինքը կառավարի և ինքը  աշխատի:

«Շուրջ երկու տասնյակի չափով այդպիսի կենտրոնների աշխատանքները սկսված են, վերջին մի քանի օրում մենք լրացուցիչ ևս 23 այդպիսի կենտրոններ ստեղծելու խնդիր ենք լուծել երկրում: Կարծում եմ, որ այդ կենտրոնները փոխանցվելով համայնքներին, միանալու են մեր համայնքային ինֆորմացիոն կենտրոններին, և այս պրոցեսը դառնալու է մեկ ամբողջություն տեղական և տարածքային խնդիրների լուծումը հեշտացնելու համար»,- ընդգծեց ՀՀ տարածքային կառավարման և զարգացման նախարարը:

Հայաստանում ԵՄ պատվիրակության ղեկավար, արտակարգ և լիազոր դեսպան Պյոտր  Սվիտալսկին իր հերթին շեշտեց, որ համաժողովը վկայում է այն մասին, որ Հայաստանը Արևելյան գործընկերության շրջանակներում ակտիվ մասնակցություն ունի:

«Հայաստանում նման համաժողովների անցկացումը շատ կարևոր է: Մենք հավատում ենք, որ Արևելյան գործընկերությունը  Բրյուսելում կայանալիք հաջորդ գագաթնաժողովի ժամանակ նոր որակների կարող է հասնել: Գործիքներից մեկը, որը կօգնի արևելյան գործընկերությանը նոր թեմատիկայով լցվել մինչև 2020 թվականը արդյունքների հասնելու երևույթն է: Դրանք ներառում են գործողությունների լայն շրջանակ` արևելյան գործընկերության 4 հիմնական հենասյուները: Բոլոր այս նպատակները ենթադրում են բոլոր շահառուների ակտիվ մասնակցություն` ներառյալ տեղական և տարածքային ինքնակառավարման մարմինների մասնակցությունը, քանի որ ռեգիոնալ և տեղական իշխանությունները ամենամոտն են կանգնած մարդկանց առօրյա խնդիրներին: Մենք հավատում ենք , որ Բրյուսելում կայանալիք հաջորդ գագաթնաժողովին CORLEAP-ի դերն անչափ կարևոր կլինի: Տարածքային և տեղական ինքնակառավարման մարմինների բարեփոխումների առումով մի շարք կարևոր քայլեր են արվել՝ տարածքային զարգացման ռազմավարությունն է մշակվել, համայնքային կենտրոնների բացման գործընթացն է իրականացվում, ինչպես նաև տեղական զարգացման ռազմավարություններ են մշակվում և ընդունվում»,- ասաց Սվիտալսկին:

Նրա պնդմամբ՝ տեղական ինքնակառավարման մարմինները Հայաստանում կարող են ավելի հզոր լինել, ավելի շատ պատասխանատվություն ունենալ ու ավելի շատ ռեսուրսներ կառավարել: ԵՄ-ն փորձում է հնարավորինս աջակցել ՏԻՄ  հզորացմանը տարբեր միջոցներով, դրանցից մեկը, իհարկե, փորձի փոխանակումն է:

«Ես շատ ուրախ եմ, որ մեր տարածքային զարգացման պիլոտային ծրագիրը, որը ներառում է մի քանի տեղական համայնքներ, կոնկրետ գաղափարներ և ծրագրեր  է ներառում: Արդեն սկսվել է պիլոտային ծրագիրը: Ես բավականին լավատես եմ : Մենք Շատ կարևոր հարցեր ենք այստեղ քննարկելու, որոնք կապված են տեղական ինքնակառավարման մարմինների  դերի տնտեսական զարգացման խթանման գործի հետ: Սա շատ կարևոր հարց է արևելյան ընկերակցության բոլոր երկրների համար:  ԵՄ–ում մենք կարող ենք հպարտորեն նշել, որ երկու կարևոր նախաձեռնություն դարձել են հաջողության պատմություններ.  քաղաքապետերի կոնվենցիան և հիմա արդեն Արևելյան գործընկերությունում երեք քաղաքներից մեկը ներառված է դրանում: Հայաստանում 17 մասնակից ունենք այս նախաձեռնությանը, որը կապված է  կայուն էներգետիկայի գործողություններին, որի մեջ ընդգրկված են կես միլիոն ՀՀ քաղաքացի: Տարածաշրջաններում հաջող կերպով իրականացվում են էներգետիկայի կայուն ծրագրեր: Դեռևս մենք առաջարկներ ընդունում ենք 10-միլիոնանոց  ծրագրի համար: Այս առաջարկների հրավերը նպաստում է էներգետիկայի արդյունավետության հետ կապված 20 նպատակներին»,- նշեց Հայաստանում ԵՄ պատվիրակության ղեկավարը:

Գդանսկի քաղաքապետ, Ռեգիոնների եվրոպական կոմիտեի և CORLEAP-ի անդամ Պավել Ադամովիչը հետաքրքիր քննարկման ակնկալիքով տեղեկացրեց, որ CORLEAP-ի մեսիջն է տեղական ժողովրդավարության ու բնակչության և տեղական իշխանությունների համագործակցության մակարդակի բարձրացումը և ապակենտրոնացման օրակարգի ձևավորումը:

ՀՀ ԱԳ նախարար Էդվարդ Նալբանդյանը ելույթ է ունեցել ԵԱՀԿ Միջերկրածովյան համաժողովին: Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից: Ներկայացնում ենք ելույթն ամբողջությամբ:

«Պարո՛ն նախագահող,
Հարգելի՛ գործընկերներ,
Տիկնա՛յք և պարոնա՛յք,

Ցանկանում եմ շնորհակալություն հայտնել նախարար Ալֆանոյին և նրա թիմին այս համաժողովի կազմակերպման համար։

Քաջ հայտնի է, որ ԵԱՀԿ տարածքի և Միջերկրածովյան տարածաշրջանի անվտանգությունը փոխկապակցված է, և վերջին զարգացումները կրկին անգամ ապացուցում են այս իրողությունը։ Միգրանտների և փախստականների աննախադեպ մեծ արտահոսքը Միջերկրածովյան տարածաշրջանից և Մերձավոր Արևելքից, հատկապես Սիրիայից և Իրաքից, տարածաշրջանային սերտ համագործակցության անհրաժեշտություն են առաջացնում՝ ուղղված անվտանգության հետ կապված այնպիսի խնդիրների լուծմանը, ինչպիսիք են, ի թիվս այլոց, ահաբեկչության դեմ պայքարը, թրաֆիքինգի կանխարգելումը, փախստականների նկատմամբ պատշաճ վերաբերմունքը և այլն։

Միայն Սիրիայից Հայաստանն ապաստան է տվել ավելի քան 22000 փախստականների` այդպիսով դառնալով բնակչության թվի հարաբերակցությամբ սիրիացի փախստականներ ընդունած երրորդ պետությունը Եվրոպայում: Սա մի շարք խնդիրների առջև կանգնեցրեց մեր երկիրը, որը մոտ անցյալում արդեն իսկ հարյուր հազարավոր փախստականներ էր ընդունել Ադրբեջանից։ Սիրիահայ փախստականներից շատերը ժառանգներ են նրանց, ովքեր Հայոց ցեղասպանությունից հետո ապաստան էին գտել Սիրիայում: Հարյուր տարի անց նրանք կրկին ստիպված են թողնել իրենց բնակության վայրերը: Հայ ժողովուրդը գիտի, թե ինչ է նշանակում լինել փախստական և ընդունել փախստականների:

Հայաստանի կառավարությունն էական ջանքեր է գործադրում փախստականներին օգնելու և նրանց ինտեգրումը դյուրացնելու ուղղությամբ: Փախստականներին տրամադրվում է լայն աջակցություն այնպիսի հարցերում, ինչպիսիք են կացության իրավունքի ստացման արագացված գործընթացը, քաղաքացիության ընդունման դյուրացումը, բուժօգնությունը, կեցության հասանելիությունը, կրթաթոշակները, պարզեցված ընդունելությունը կրթական հաստատություններում և մուտքը աշխատաշուկա, ճկուն հարկման մեխանիզմները և գրավիչ գործարար միջավայրը: Շնորհակալ ենք Հայաստանին տրամադրված որոշակի միջազգային աջակցության համար և ակնկալում ենք այս առումով շարունակական համագործակցություն:

Հայաստանը նաև փորձել է աջակցության ձեռք մեկնել Սիրիայում օգնության կարիք ունեցողներին՝ տրամադրելով շարունակական մարդասիրական օգնություն: Հալեպում ՀՀ գլխավոր հյուպատոսությունը միակ դիվանագիտական ներկայացուցչությունն է, որը, չնայած բարդ պայմաններին, երբևէ չի դադարեցրել իր գործունեությունը:

Անկասկած, միգրանտների և փախստականների մեծ հոսքերին համապարփակ արձագանքելու համար անհրաժեշտ է պայքարել այս երևույթի սկզբնաղբյուրների դեմ, ինչպիսիք են ահաբեկչությունը և ինքնության հողի վրա իրականացվող հանցագործությունները: Հայաստանը ԵԱՀԿ-ում առաջիններից մեկն էր, որ բարձրաձայնեց այս հարցը և հանդես եկավ այս առնչությամբ ԵԱՀԿ հանձնառություններն ամրապնդելու նախաձեռնությամբ: Ահաբեկչության վերաբերյալ Համբուրգի նախարարական հռչակագրում ամրագրված ԵԱՀԿ հանձնառություններից են անհատների և համայնքների, ներառյալ կրոնական հողի վրա իրականացվող, հալածանքների դատապարտումը, ահաբեկչական գործողությունների մասնակիցներին պատասխանատվության ենթարկելը, օտար վարձկանների, զենքերի և ահաբեկչական գործունեության հետ կապված ֆինանսների անդրսահմանային տեղաշարժի կանխարգելումը: Համոզված ենք, որ այս ուղղությամբ ԵԱՀԿ ջանքերը պետք է շարունակվեն:

Տիկնա՛յք և պարոնա՛յք,

Կցանկանայի տեղեկացնել ձեզ, որ ս.թ. նոյեմբերի 22-ին Երևանում կայանալու է «Քրիստոնյաների և այլ կրոնական խմբերի դեմ ատելության հողի վրա հանցագործությունների հակազդեցություն և կանխարգելում» ԵԱՀԿ համաժողովը: Միջերկրածովյան մեր գործընկերներին ենք հրավիրում նաև մասնակցելու ու ներդրում ունենալու այս միջոցառմանը:

Տիկնա՛յք և պարոնա՛յք,

Միջերկրական ծովը պատմականորեն հանդիսացել է ոչ թե Եվրոպան, Աֆրիկան և Մերձավոր Արևելքը բաժանող բնական պատնեշ, այլ իր հյուրընկալ ափերին ծաղկող բազմաթիվ քաղաքակրթությունները, այդ թվում՝ հայկականը, միմյանց կապող կամուրջ: Մեր խորին համոզմունքն է, որ այս ավանդույթները պետք է առավել ամրապնդվեն»: 

Ռուսաստանի Դաշնության եւ Հայաստանի Հանրապետության տրանսպորտի նախարարներ Մաքսիմ Սոկոլովն ու Վահան Մարտիրոսյանը փորձարկեցին Ռուսաստանից բերված նոր էլեկտրագնացքը, որը նախատեսված է շահագործման Երեւան-Գյումրի ուղղությամբ:

ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը լրագրողների հետ զրույցում նշեց, որ գնացքը փորձարկման փուլում է, որպեսզի հասկանալի լինի, թե ռելիեֆային պայմաններում ինչ խնդիրներ կառաջանան եւ արդյոք գնացքի մոդեռնիզացման կարիք կլինի՞:

«Շնորհավորում եմ բոլորիս նման էլեկտրագնացք ունենալու կապակցությամբ: Իհարկե, ընտրված է Երեւան-Գյումրի ուղղությունը, որովհետեւ ուղեւորափոխադրումների մեծ մասն այսօր իրականացվում է դեպի Գյումրի:  Բացի դրանից, Կառավարությունը ծրագիր ունի՝ կապված Գյումրիում զբոսաշրջության զարգացման հետ: Մենք հայտարարել էինք, որ այն կսկսի գործել փետրվարին, սակայն հուսանք, որ դա տեղի կունենա ավելի շուտ»,-«Արմենպրես»–ի հաղորդմամբ՝ ասաց նա:

Անդրադառնալով գնային քաղաքականությանը՝ նախարարը նշեց, որ այն լինելու է  ճկուն:

«Ինչպես տեսնում ենք, երկու վագոններում տարբեր կարգեր են, այսինքն՝ համապատասխանաբար տարբեր գներ կլինեն»-ընդգծեց Վահան Մարտիրոսյանը՝ հավելելով, որ կրճատվելու է նաեւ երթևեկության տեւողությունը:

ՌԴ տրանսպորտի նախարար Մաքսիմ Սոկոլովն իր հերթին ասաց, որ գնացքը բավականին հարմարավետ է, համապատասխանում է ժամանակակից բոլոր չափանիշներին:

«Այս տարվա ամռանը, Հայաստան այց էր կատարել «Ռուսական երկաթուղիներ» ընկերության առաջին փոխնախագահ Ալեքսանդր Միշարինը: Այդ այցի շրջանակում ՀՀ վարչապետի հետ հանդիպմանը քննարկվել էր «Հարավկովկասյան երկաթուղու» շարժակազմի արդիականացման հարցը: Դրանից հետո ՀՀ տրանսպորտի եւ կապի նախարարը զանգահարեց ինձ եւ խնդրեց արագացնել խնդրի լուծման գործընթացը: Ինչպես տեսնում եք, էլեկտրագնացքը Հայաստանում է, այդ կապակցությամբ ես ցանկանում եմ շնորհակալություն հայտնել երկաթուղայիններին: Շնորհակալություն եմ հայտնում թիմային աշխատանքի համար: Նշեմ, որ կոնսեսիոն կառավարման տարիների ընթացքում ներդրումների հիմնական մասը կատարվել է երկաթգծերի վերակառուցման, կայարանների արդիականացման, նոր շարժակազմի ձեռք բերման ուղղությամբ»,-նշեց նա:

Ռուսաստանից բերված նոր գնացքն ունի երկու վագոն` ընդհանուր 129 նստատեղով, օդափոխման, մանրէազերծման, հակահրդեհային համակարգեր, վթարային ելքի պատուհաններ, տեղեկատվություն ներկայացնող էկրաններ, կահավորված է հարմարավետ աթոռներով: Էլեկտրագնացքը հարմարավետ է բոլորի, այդ թվում՝ հենաշարժական խնդիրներ ունեցող ուղեւորների համար։

Մխիթարյան միաբանությունում տեղի են ունենում մշակութային ժառանգության թվայնացման աշխատանքներ:

«Արմենպրես»–ի հաղորդմամբ՝ հոկտեմբերի 24-ին «Վենետիկի Մխիթարյան միաբանություն-300» խորագրով միջազգային գիտաժողովում լրագրողների հետ ճեպազրույցում այս մասին ասաց ՀՀ սփյուռքի նախարար Հրանուշ Հակոբյանը:

«Թվայնացման աշխատանքներն իրականացվում են ՀՀ նախագահ Սերժ Սարգսյանի հովանու ներքո: Կարծում եմ` թվայնացնելով դրանք, կարելի է փրկել խունացումից, նաև ավելի հեշտությամբ տեղափոխել Հայաստան` Մատենադարան և կատարել աշխատանքներ»,-ասաց Հրանուշ Հակոբյանը:

Մխիթարյան միաբանությունում կուտակված է մեծ ժառանգություն՝  հատկապես ձեռագիր մատյանների տեսքով: Նախարարի կարծիքով՝ մոտ 5000 օրինակ ձեռագիր մատյանների ուսումնասիրությունն ու տպագրությունը ներկայումս շատ կարևոր է: Ամեն օր միաբանություն են այցելում զբոսաշրջիկներ, ծանոթանում նյութերին: Իսկ այնտեղ հավաքված նյութերը ոչ միայն հայկական, այլ նաև համամարդկային նշանակություն ունեցող արժեքներ են:

«Վենետիկի Մխիթարյան միաբանություն-300» խորագրով միջազգային գիտաժողովում ըստ ուղղությունների կվերլուծեն միաբանության թողած հսկայածավալ ժառանգությունը:  «Արմենպրես»–ի հաղորդմամբ՝ Մխիթարյան միաբանության հաստատման 300-ամյակին նվիրված միջոցառումների շրջանակում  հոկտեմբերի 24-ին կայացած երկօրյա գիտաժողովի բացմանը լրագրողների հետ զրույցում այս մասին ասաց ՀՀ սփյուռքի նախարար Հրանուշ Հակոբյանը:

«Մխիթարյան միաբանությունում կուտակված են գիտական, կրթական, մշակութային հսկայածավալ նյութեր: Գումարելով այս համաժողովը` մենք փորձելու ենք ըստ ուղղությունների որոշակիորեն վերլուծել այն գիտական ժառանգությունը, որ թողել են Մխիթարյան հայրերը: Ուղղություններից առաջինը լեզվագիտության, բանասիրության ոլորտն է: Ամենաանաղարտ արևմտահայերենը պահպանել և զարգացրել են Մխիթարյան հայրերը»,-ասաց նախարարը:

Երկրորդ ուղղությունը պատմությունն է: Պատմական խոր վերլուծություններ են կատարել Մխիթարյանները:

Երրորդ ուղղությունը մշակույթն է: Մշակույթը եղել է Մխիթարյանների գլխավոր զենքը, որի միջոցով նրանք ներթափանցել են Եվրոպա:

«Կարևոր են նաև տասնյակ հատորներ թողած հետազոտողների ուսումնասիրությունները: Ունենք բազմաթիվ նյութեր, որոնք դեռ չի ուսումնասիրել ոչ մի գիտնական»,-նկատեց Հրանուշ Հակոբյանն ու ընդգծեց` անհրաժեշտ է տասնյակ նման գիտաժողովներ գումարել:

«Սուրբ Ղազար կղզին հայ ժողովրդի համար մեծ նշանակություն ունի Մխիթարյան միաբանության շնորհիվ: Միաբանությունն իր գործունեությունը ծավալում է գրեթե բոլոր հայկական գաղթօջախներում: Երջանիկ և երախտապարտ եմ, որ Մայրավանքի հիմնադրման տարելիցի արարողությունը մեծ շուքով տոնվում է Հայաստանում պետական լայն մասնակցությամբ»,-ասաց Վենետիկի Մխիթարյան միաբանության քահանայապետական պատվիրակ Լևոն արք. Զեքիյանն ու հավելեց՝ հոբելյանական տարում իրենց առաքելությունը մեծ ժառանգությունն ըստ արժանվույն պահպանելն է:

Գիտությունների ազգային ակադեմիայի նախագահ Ռադիկ Մարտիրոսյանի կարծիքով՝ Մխիթարյան միաբանությունը սխրանք է գործել և սերունդներին փոխանցել է հայ ժողովրդի մշակույթի, պատմության արդյունքները, ինչպես նաև հարստացրել դրանք:

ԵՊՀ ռեկտոր Արամ Սիմոնյանը շեշտեց այն հանգամանքը, որ չկա մի ոլորտ, որտեղ Մխիթարյաններն իրենց խոսքն ասած չլինեն:

Գիտաժողովում զեկուցումներով հանդես կգան գիտական կառույցների ներկայացուցիչներ: