ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում ձեռնարկված ակտիվ  քննչական և դատավարական այլ գործողությունների արդյունքում  պարզվել են «Դիլիջան ազգային պարկ»-ի տարածքում պահնորդական ծառայություն իրականացնող ընկերության անշարժ հենակետ հանդիսացող վագոն-տնակը հրկիզած անձանց ինքնությունը։ Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

Ավելի վաղ տեղեկացրել ենք, որ 2017 թվականի հոկտեմբերի 13-ին՝ ժամը 20:50-ի սահմաններում, մի խումբ անձինք հարձակվել են «Դիլիջան ազգային պարկ» ՊՈԱԿ-ի Շամախյան տեղամասում «Պանտերա  սիքյուրիթի» ՍՊ ընկերության պահնորդական ծառայություն իրականացնող երկու աշխատակիցների վրա, հրկիզել ընկերության հսկիչ անցագրային հենակետ հանդիսացող վագոն-տնակը և դիմել փախուստի:

Կատարված մեծածավալ քննչական գործողությունների արդյունքում փաստական տվյալներ են ձեռք բերվել, որ հրկիզմանն անմիջական մասնակցություն է ունեցել երկու անձ, պարզվել է նրանց ինքնությունը, որոնցից մեկն այսօր ձերբակալվել է՝ հրկիզելու եղանակով ուրիշի գույքը դիտավորյալ ոչնչացնելու կասկածանքով, իսկ մյուսին հայտնաբերելու և վարույթն իրականացնող մարմնին ներայացնելու վերաբերյալ հանձնարարություն է տրվել ոստիկանության համապատասխան ստորաբաժանումներին։

Բացի այդ, ևս մեկ անձ ձերբակալվել է՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված արարք կատարելու կասկածանքով (խուլիգանություն, որը կատարվել է մի խումբ անձանց կամ կազմակերպված խմբի կողմից): Եվս մեկին հոկտեմբերի 19-ին էր մեղադրանք առաջադրվել՝ ՀՀ  քրեական օրենսգրքի 258-րդ հոդվածի 3-րդ մասի 1-ին կետով, և նրա նկատմամբ որպես խափանման միջոց էր ընտրվել կալանավորումը:

Նախաքննությունը շարունակվում է։ Քննություն է տարվում՝ դեպքին մասնակից բոլոր անձանց ինքնությունը պարզելու, նրանցից յուրաքանչյուրի գործողություններն անհատականացնելու  ուղղությամբ։ 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Մարտիրոս Սարյանի տուն-թանգարանի 50-ամյակի կապակցությամբ հոկտեմբերի 26-ին Ա. Բաբաջանյանի անվան ֆիլհարմոնիայի փոքր դահլիճում տեղի կունենա հոբելյանական համերգ, որին կմասնակցեն անհատ կատարողներ, պարային խմբեր և երգչախմբեր: Կանցկացվի նաև գիտաժողով, որտեղ կքննարկվեն Սարյանի արվեստին վերաբերող մի շարք հարցեր: Այս մասին «Արմենպրես»–ի թղթակցին պատմեց թանգարանի գլխավոր ֆոնդապահ Սոֆյա Սարյանը:

 «Կայանալիք գիտաժողովին կմասնակցեն հյուրեր Ռուսաստանի այն թանգարաններից, որտեղ ցուցադրված են մեծ նկարչի ստեղծագործությունները: Դրանք են Մոսկվայի Տրետյակովյան պատկերասրահը, Արևելյան արվեստի թանգարանը, Թատերական թանգարանը, Սանկտ Պետերբուրգի Ռուսական թանգարանը: Հայաստանից ներկա կլինեն մասնակիցներ Հայաստանի ազգային պատկերասրահից, Ե. Չարենցի անվան գրականության և արվեստի թանգարանից, Ռուսական արվեստի թանգարանից: Հրավիրել ենք նաև արվեստաբանների, որոնք կխոսեն Սարյանի ինքնատիպ կտավների առանձնահատկությունների մասին»,-նշեց նա:

Խոսելով թանգարանի այցելուների քանակի մասին` Սոֆյա Սարյանն ասաց, որ թանգարանի վերանորոգումից հետո նրանց թիվը կրկնապատկվել է: Այդ կապակցությամբ մեր տնօրինությունը մի շարք ծրագրեր է կյանքի կոչում: «Մեզ մոտ գործում է մանկական ստուդիա, իրականացվում են կրթական ծրագրեր, պարբերաբար համերգային երեկոներ են տեղի ունենում, արվեստի պատմության վերաբերյալ դասախոսություններ»,-ընդգծեց Սոֆյա Սարյանը: Նա հավելեց, որ նոր գրադարան ունեն, որը հարուստ է կերպարվեստին, գրականագիտությանը երաժշտագիտությանը, արվեստի տարբեր ոլորտներին վերաբերող գրքերով: Դրանց որոշակի մասը պատկանում է Սարյանի ընտանիքին:

XX դարի մեծանուն նկարիչ Մարտիրոս Սարյանի (1880-1972) տուն-թանգարանը ստեղծվել է  Երևանում Հայաստանի կառավարության հատուկ որոշմամբ, բացվել է 1967 թվականի նոյեմբերի 26-ին՝ գեղանկարչի կենդանության օրոք:

Թանգարանի կերպարվեստի ֆոնդի ստեղծման հիմքը դարձան նկարչի նվիրաբերած 50  ստեղծագործությունները: Հետագայում ֆոնդերն ընդլայնվել ենգնումների և նվիրատվությունների  շնորհիվ: Մ.Սարյանի տուն-թանգարանի ցուցադրությունը ներկայացնում է նկարչի ստեղծագործական  բոլոր շրջաններն ու ժանրերը՝ սկսած 16 տարեկանում կատարած առաջին գծանկարներից մինչև կյանքի  վերջին ամիսներին ստեղծված աշխատանքները: 300-ից ավելի ստեղծագործությունից կազմված  մշտական ցուցադրությունը կազմակերպված է թանգարանի երեք հարկերում ժամանակագրական   կարգով:   
Այն ընդգրկում է հայտնի աշխատանքներ Սարյան ընտանիքի հավաքածուից:Այցելուները  հնարավորություն ունեն նաև այցելել այս մշակութային օջախիսրբավայրը՝ Վարպետի արվեստանոցը: 

Բարև ձեզ, «Արմենպրես» պետական լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:

Հայաստանն ու Խորվաթիան զարգացնում ու ակտիվացնում են տնտեսական և արդյունաբերական համագործակցությունը: Այսօր՝ հոկտեմբերի 26-ին, կայանալիք ՀՀ կառավարության նիստին գործադիրը կքննարկի «Հայաստանի և Խորվաթիայի կառավարությունների միջև տնտեսական համագործակցության մասին» համաձայնագրի կնքման առաջարկությունը:Այս և 2 տասնյակ այլ հարցեր ներառված են նիստի օրակարգում:

Այսօր խորհրդարանը կշարունակի իր աշխատանքները: Պատգամավորների օրակարգում կլինի «Պաշտպանության մասին» օրենքի նախագիծը, որն առաջին ընթերցմամբ քննարկման է ներկայացրել ՀՀ պաշտպանության նախարար Վիգեն Սարգսյանը:

Հայաստանում են ռուս գործարարները, մասնավորապես, Ռուսաստանի Կուրգանի, Վլադիմիրի և Տամբովի մարզերից ժամանած ընկերությունների  ներկայացուցիչները: Երևանում կազմակերպվող Հայ-ռուսական բիզնես ֆորումի շրջանակում գործընկերներ կփնտրեն Հայաստանի և Ռուսաստանի գործարարները: Բիզնես ֆորումն անցկացվում է Երևանի առևտրաարդյունաբերական պալատի և «ԻՎԵՆՍԵՆԹՐ» միջոցառումների սպասարկման կենտրոնի կողմից:

Միջազգային և անվտանգության հարցերի հայկական ինստիտուտում տեղի կունենա «Հայաստան-ԵՄ. ի՞նչ կա Հայաստան-ԵՄ համաձայնագրում (ՀԸԳԳ) ու դրա ստորագրումից անդին» խորագրով փորձագիտական քննարկում: Այն կընթանա փորձագիտական ճեպազրույցի ձևաչափով՝ առանց գլխավոր բանախոսների: Քննարկման մասնակիցները կանդրադառնան Հայաստանի և ԵՄ-ի միջև նոյեմբերի 24-ին Բրյուսելում ստորագրվելիք Համապարփակ և ընդլայնված գործընկերության համաձայնագրի տարբեր բաժիններում ամրագրված համագործակցության ու գործընկերության նպատակներին ու գործողությունների ծրագրին:

Այսօր նախատեսված Երևան-Աստանա-Բիշքեկ-Մինսկ տեսակամուրջի շրջանակում կամփոփվեն Եվրասիական միջկառավարական խորհրդի նիստի արդյունքները: Հոկտեմբերի 25-ին Երևանում կայացել է Եվրասիական միջկառավարական խորհրդի նիստը Եվրասիական տնտեսական միության անդամ երկրների կառավարությունների ղեկավարների մասնակցությամբ:

Ավետիք Իսահակյանի անվան կենտրոնական գրադարանում տեղի կունենա «Նռան հատիկ» փառատոնի մեկնարկային ասուլիսը։ Կմասնակցեն «Նախաբեմ» կրթամշակութային ասոցիացիա» ՀԿ նախագահը, «Նռան հատիկ» հանրապետական մանկապատանեկան թատերական փառատոնի պատվավոր նախագահ և Իսահակյանի անվան գրադարանի տնօրենը և այլք:

Հոկտեմբերի 26-ից-նոյեմբերի 3-ըկանցկացվի «Yerevan Jazz Fest 2017»-ը  փառատոնը: «Yerevan Jazz Fest 2017»-ը նվիրված է հայտնի Zildjian բրենդի հիմնադիր Ավեդիս Զիլիդջյանին, ով սկիզբ է դրել համաշխարհային ճանաչում ունեցող հարվածային գործիքների ծնծղաների արտադրությանը: Փառատոնն անցկացվում է ՀՀ վարչապետ Կարեն Կարապետյանի հովանու ներքո: Մինչ փառատոնը հրավիրված ասուլիսին հանրահայտ կոմպոզիտոր, գործիքավորող, երաժիշտ Մարկուս Միլլերը, Լևոն Մալխասյանը, Արտո Թունջբոյաջյանը և այլք կներկայացնեն մանրամասներ:

Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:

Պոլսոյ Պապը ալի պողոտայի առաջին գրավաճառը եղած է՝ հայ Առաքել Թոզլուեան: Այս մասին՝ ըստ «Էրմէնիհապեր»-ի՝ կը գրէ թրքական «Birgün» թերթի կայքի սիւնակագիր՝ Ռէֆիք Տուրպաշ «Պապը ալիի առաջին գրավաճառը» խորագիրով իր յօդուածին մէջ:

            Առաքել Թոզլուեան էֆենտին Պապը ալիի մէջ իր գրախանութը հիմնած է 1875-ին եւ ժամանակի հետ սկսած է զբաղիլ նաեւ հրատարակչութեամբ: 1884-ին հրատարակուած է «Առաքելի գրադարան»-ի գրացուցակը, որ առաջինն էր իր տեսակին մէջ: Գրքոյկի նպատակն էր` ընթարցասէր հասարակութեան համար հեշտացնել իրեն անհրաժեշտ գիրքերու որոնումը:

            Աղբիւրին համաձայն` Պապը ալիի մէջ ընդհանրապէս սկզբնական շրջանի բոլոր գրավաճառները եղած են հայերը: Հայերու շնորհիւ է, որ գիրքը դարձած է առուծախի առարկայ, վաճառուած սրճարաններու, խանութներու եւ այլ մարդաշատ վայրերու մէջ:

            Առաքել էֆենտին հրատարակած է օսմանեան շրջանի գրողներէն՝ Ահմէթ Ռասիմի, Հալիթ Զիայի շարք մը ստեղծագործութիւնները: Աւելի ուշ Մուալլիմ Նաճիի հետ ձեռնամուխ եղած է դասագիրքերու հրատարակման, որոնք տպագրուած են 100-աւոր օրինակներով: 1891-94 թուականներուն Առաքել Թոզլուեան «Գրպանի գիրք» ձեւաչափով շարք մը վէպեր հրատարակած է:

            Որոշ աղբիւրներու համաձայն, դեռ Առաքել Թոզլուեանէն առաջ Թորոս անունով մարդ մը Պապը ալիի մէջ գրախանութ բացած է, սակայն գործերը այնքան ալ յաջող չեն ընթացած, ան ստիպուած եղած է գիրքերը պարկերը լեցնելով վաճառել ու հեռանալ: Այնուամենայնիւ, որպէս Պապը ալիի առաջին գրավաճառ յայտնի է Առաքել Թոզլուեան: Վերջինիս մասին կենսագրական տուեալները քիչ են: Յայտնի է, որ Առաքել էֆնտին ծագումով Կեսարիայէն եղած է: