Արտաքին աղբյուրներից իրականացվող նպատակային վարկային ծրագրերի գծով վարկային, դրամաշնորհային և ՀՀ կառավարության համաֆինանսավորման գումարները ՀՀ 2017թ. պետբյուջե նախատեսելու և համապատասխան վերաբաշխումներ իրականացնելու անհրաժեշտությամբ պայմանավորված՝ կառավարությունը համապատասխան որոշում ընդունեց:

«Արմենպրես»-ի փոխանցմամբ, ՀՀ Ջրային տնտեսության պետական կոմիտեի նախագահ Արսեն Հարությունյանը նշեց, որ արտաքին աղբյուրներից ստացվող նպատակային վարկային ծրագրեր իրականացնող ԾԻԳ-երի կանխատեսվող կատարողականներից ելնելով առկա է վարկային, դրամաշնորհային և համաֆինանսավորման լրացուցիչ պահանջ: Այդ առումով էլ վերաբաշխումներ իրականացնելու անհրաժեշտություն է առաջացել Եվրասիական զարգացման բանկի աջակցությամբ իրականացվող ոռոգման համակարգերի զարգացման, Գերմանիայի զարգացման վարկերի բանկի աջակցությամբ կյանքի կոչվող Ախուրյան գետի ջրային ռեսուրսների ինտեգրված կառավարման և այլ ծրագրերի բնականոն ընթացքն ապահովելու համար:

 ՀՀ կառավարությունը մասնակի կփոխհատուցի սոցիալական աջակցության ստացող՝ ՀՀ սահմանամերձ համայնքների 5-12-րդ դասարանների սովորողների դասագրքերի վարձավճարների և ՀՀ բարձրագույն ուսումնական հաստատություններում սովորող ուսանողների ուսման վարձավճարները: «Արմենպրես»-ի փոխանցմամբ, որոշման նախագիծը ներկայացրեց ՀՀ կրթության և գիտության նախարար Լևոն Մկրտչյանը: ՀՀ սահմանամերձ համայնքների 5-12-րդ դասարանների սովորողների դասագրքերի վարձավճարների փոխհատուցման համար հատկացվեց 26582.6 հազար դրամ, իսկ ուսանողների ուսման վարձավճարների մասնակի փոխհատուցումը կազմակերպելու համար՝ 76836.7 հազար դրամ:

 ‹‹Մշակույթների երկխոսություն›› կազմակերպության նախաձեռնությամբ հոկտեմբերի 25-ին Երեւանում առաջին անգամ մեկնարկեց Գեղարվեստական տպագրության միջազգային բիենալե, որը տեղի կունենա Նորարար փորձառական արվեստի կենտրոնում (ՆՓԱԿ / ACCEA):

Այսօր թվային տեխնոլոգիաների միջոցով գեղարվեստական տպագրության նմուշի ստեղծումը դյուրին գործընթաց է, մինչդեռ դասական եղանակով տպագրական տախտակի (կլիշեի) պատրաստումը խրթին է եւ ժամանակատար: Այնուամենայնիվ, որքան էլ զարմանալի է, որոշ արվեստագետներ շարունակում են հրաժարվել թվային տեխնոլոգիաների ընձեռած հնարավորություններից եւ նախընտրում են աշխատատար` վտանգավոր թթուների, թունավոր լուծիչների, յուղային հիմքով տպագրական ներկերի կիրառմամբ ուղեկցվող ավանդական եղանակները: Թերեւս, գեղարվեստական տպագրության հմայքն ու էությունը թաքնված են այդ երկարատեւ եւ դժվարին գործընթացներում:

Գեղարվեստական տպագրության Առաջին միջազգային բիենալեի նպատակը ավանդական գեղարվեստական տպագրության ոլորտում առկա մերօրյա զարգացումները, միտումների ուսումնասիրությունն ու բացահայտումն է, ինչպես նաեւ դասական, այսօր հազվադեպ հանդիպող տեխնիկաների եւ արդի գաղափարների միախառնման եւ միահյուսման մշտադիտարկումը:

Բիենալեին կներկայացվի 227 արվեստագետների 447 աշխատանք` 50 երկրներից:  Միջազգային ժյուրիի կազմում են անվանի մասնագետներ Գերմանիայից, Էստոնիայից, Շվեյցարիայից, Լեհաստանից եւ Հայաստանից  /Ինգա Հեամեգի (Էստոնիա), Ախիմ Կյոնեկե (Գերմանիա), Մաթեուշ Օտրեբա (Լեհաստան), Ալեքսանդրա Շտեհելի (Շվեյցարիա), Սոնա Հարությունյան (Հայաստան)/ :

Բիենալեի կազմկոմիտեի կողմից սահմանվել են գլխավոր, առաջին, երկրորդ, երրորդ մրցանակներ: Լավագույն աշխատանքները կարժանանան նաեւ Բիենալեի պատվոգրերի:

Երեւանյան բիենալեն վստահաբար տարածաշրջանում գեղարվեստական տպագրությամբ զբաղվող արվեստագետների համար միջազգային նոր հարթակ կդառնա եւ կխթանի ոլորտի մասնագետների, ուսանողների, արվեստասեր հանրության հետաքրքրությունը դեպի արվեստի այս ճյուղը:

 «Նռան հատիկ» մանկապատանեկան թատերական 17-րդ հանրապետական փառատոնի նպատակներից մեկը տաղանդավոր և գործունյա թատերախմբերը բացահայտելն ու նրանց համար փորձի փոխանակման հարթակ ստեղծելն է: Փառատոնն այս տարի կրում է «Արևը բոլորինն է» խորագիրը: Այն կանցկացվի հոկտեմբերի 30-ից նոյեմբերի 4-ը: Այս մասին հոկտեմբերի 26-ին լրագրողների հետ հանդիպմանը խոսեցին փառատոնի կազմակերպիչներն ու աջակիցները:

«Թատերասերները ներկայացումները կարող են դիտել Հ. Թումանյանի անվան պետական տիկնիկային թատրոնում և Անանիա Շիրակացու անվան ճեմարանում: Մեկ բեմադրություն կցուցադրվի Խամաճիկների պետական թատրոնում: Փառատոնին այս տարի մասնակցում են 40 թատերախումբ՝ 42 ներկայացմամբ: Մասնակիցների թվում են նաև հաշմանդամություն և մտավոր խնդիրներ ունեցող երեխաներ, որոնք առանց բարդույթների բեմ են բարձրանում և սիրով խաղում: Խաղացանկում ընդգրկվել են Վիլյամ Շեքսպիրի, Վիլյամ Սարոյանի, Գրիմ եղբայրների, Հանս Քրիստիան Անդերսենի ստեղծագործությունների հիման վրա բեմադրված գործեր»,-«Արմենպրես»–ի հաղորդմամբ` նշեց «Նախաբեմ» կրթամշակութային  ասոցիացիա»  հասարակական կազմակերպության նախագահ Գարիկ Ղազարյանը: Նա շեշտեց, որ փառատոնը մրցութային չէ և չունի ժյուրի:

Փառատոնի նախագահ Արուսյակ Մանթաշյանի խոսքով`  փառատոնին 12 նոր թատերախմբեր են միացել Գեղարքունիքի, Լոռու, Արմավիրի, Արարատի, Տավուշի մարզերից և Երևանից: «Մեր փառատոնի առաջնային նպատակներից մեկն այն է, որ «Թատրոն» առարկան ընդգրկվի դպրոցում դասավանդվող առարկաների ցանկում, որ դպրոցական նստարանից երեխաները լավ գրականություն կարդան, գրական հայերենով խոսեն»,-ընդգծեց նա:

«Համոզված եմ, որ սա մեծ տոն է ոչ միայն մանուկների, այլև հասուն թատերասերների համար, որոնք կարող են հիշել իրենց մանկությունը, պատանեկությունը: Տարիների ընթացքում փառատոնն ընդլայնել է իր աշխարհագրությունը` ներառելով Հայաստանի գրեթե բոլոր մարզերը: Հուսանք` հաջորդ տարի մեզ կմիանա նաև Սյունիքի մարզը»,-ասաց ՀՀ մշակույթի նախարարության  աշխատակազմի ժամանակակից արվեստիվարչության գլխավոր մասնագետ Նաիրա Հայրապետյանը:

«Նախաբեմ» կրթամշակութային ասոցիացիա» հասարակական կազմակերպության պատվավոր նախագահ ռեժիսոր և դերասան Երվանդ Մանարյանն ասել է, որ փառատոնն արդեն հասուն և գեղեցիկ պատանի է:

 «Նռան հատիկ» մանկապատանեկան թատերական 17-րդ հանրապետական փառատոնն իրականանում է ՀՀ մշակույթի նախարարության աջակցությամբ և «Նախաբեմ» կրթամշակութային ասոցիացիա» հասարակական կազմակերպության նախաձեռնությամբ:

«Նախաբեմը» ստեղծվել է 2001 թվականին թատրոնի նվիրյալների նախաձեռնությամբ: Կազմակերպության նպատակն է աջակցել մանկապատանեկան թատերական արվեստի զարգացմանն ու ավանդույթների ձևավորմանը, համախմբել և համակարգել Հայաստանում գործող թատերական մանկապատանեկան խմբերը, աջակցել նորերի ստեղծմանն ու կայացմանը:

Երևանի թատրոնի և կինոյի պետական ինստիտուտի (ԵԹԿՊԻ) ուսանողները «Սահմանի հեքիաթը» ծրագրի շրջանակներում հոկտեմբերի 25-ին Իջևանում խաղացին «Շունն ու կատուն» երաժշտական ներկայացումը (ռեժիսոր՝ արվեստի վաստակավոր գործիչ Վիգեն Ստեփանյան): Ներկա էր նաև Տավուշի թեմի առաջնորդ Տեր Բագրատ եպիսկոպոս Գալստանյանը: Այս մասին «Արմենպրես»-ին տեղեկացրին Հայաստանի երիտասարդական հիմնադրամի հասարակայնության հետ կապերի ծառայությունից:

Հայաստանի երիտասարդական հիմնադրամի և ԵԹԿՊԻ ուսանողական խորհրդի համագործակցությամբ իրականացված ծրագրի շրջանակներում բուհի 4-րդ կուրսի՝ Արամ Սուքիասյանի արվեստանոցի ուսանողները երաժշտական ներկայացմամբ հանդես եկան Իջևանի մշակութային պալատում: Իջևանի 7-16 տարեկան 280 պատանիներ հնարավորություն ունեցան դիտելու թատերական ներկայացումը:

ՀԵՀ հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը փաստեց՝ դեռ իրավիճակն այպիսին է, որ ծրագրերի մեծամասնությունն իրականացվում է Երևանում. «Այդ ծրագրերը հիմնադրամի աջակցությամբ իրականացվում են մեր բուհերի և ՀԿ-ների միջոցով, որոնք ակտիվ են Երևանում, բայց շատ դժվարությամբ են հասնում մարզեր: Մենք ուզում ենք, որ այդ գործընթացը տեղափոխվի մարզեր: Շատ ծրագրեր արդեն տեղափոխել ենք և փոքր քայլերով նաև մշակութային որոշ նախագծեր ենք տեղափոխում մարզեր՝ հատկապես սահմանամերձ հատված, որտեղ, կարճ ձևակերպմամբ ասեմ, զբաղմունքի, զբաղվածության խնդիր կա: Ուստի այդ խնդրի լուծումը մենք կոմպենսացնում ենք մշակութային նախաձեռնություններով, նշված ծրագիրն էլ դրանց շարքում է»:

«Սահմանի հեքիաթը» ծրագրի ղեկավար, ԵԹԿՊԻ-ի ուսանողական խորհրդի նախագահ Հարություն Հարությունյանը վստահեցրեց, որ իրենց հիմնական նպատակն է սահմանամերձ բնակչությանը հաղորդակից դարձնել կրթությանն ու մշակույթին. «Շատ կտրված են ամեն ինչից, մանավանդ՝ երեխաները: Իսկ եթե ուզում ենք ամուր պահել սահմանը, պետք է թիկունքը լինի կրթված ու զարգացած: Երեխաները մեղավոր չեն, որ ապրում են սահմանամերձ գյուղերում»:

Հարություն Հարությունյանը տեղեկացրեց, որ ծրագրի շրջանակներում դեկտեմբերին նախատեսվում են նաև տոնածառային ներկայացումներ Իջևանի երեխաների համար: