Արդարադատության և սոցիալական ոլորտների էլեկտրոնային համակարգերի համակցման արդյունքում ներդրված ծրագիրն ուղղակի ազդեցություն կունենա պետական մարմինների կողմից բնակչությանը մատուցվող ծառայությունների հասանելիության, որակի և արդյունավետության վրա: Ծրագրի մանրամասների վերաբերյալ «Արմենպրես»-ը զրուցել է արդարադատության նախարարի տեղակալ Սուրեն Քրմոյանի հետ:

-Պարոն Քրմոյան, արդարադատության և սոցիալական ոլորտների համակարգերի համակցումը ի՞նչ կտա  ՀՀ քաղաքացիներին: 

–ՀՀ աշխատանքի և սոցիալական հարցերի և Արդարադատության նախարարությունների հետ համատեղ իրականացված աշխատանքների արդյունքում ծննդյան նպաստների դիմումներն ընդունվում են էլեկտրոնային եղանակով` Քաղաքացիական կացության ակտերի գրանցման մարմիններում: Ընդամենը մի քանի տարի առաջ քաղաքացին ստիպված էր մահվան կամ ծննդյան ակտերը գրանցելու և համապատասխան նպաստ ստանալու համար դիմել առողջապահական, արդարադատության մարմիններ, ՀՀ ոստիկանություն, աշխատանքի և սոցիալական հարցերի նախարարություն, ինչը քաղաքացիների համար բարդ և  ժամանակատար, որոշ դեպքերում կոռուպցիոն ռիսկերով համակցված գործընթաց էր: Ծրագրի ներդրման արդյունքում  արդարադատության  և սոցիալական ոլորտների էլեկտրոնային համակարգերի համակցումը կհանգեցնի վարչարարության նվազեցմանը, կոռուպցիոն ռիսկերի նվազեցմանը, պետական մարմինների կողմից մատուցվող ծառայությունների որակի նկատմամբ քաղաքացիների գոհունակության բարձրացմանը, ինչպես նաև ժամանակի խնայողության ապահովմանը: Միաժամանակ, քաղաքացիներին հնարավորություն է ընձեռնվում պետության կողմից մատուցվող ծառայությունները ստանալ մեկ պատուհանից՝ խուսափելով ավելորդ բյուրոկրատական քաշքշուկներից: Ավելի  պարզ ասած` քաղաքացին ՔԿԱԳ մարմիններում գրանցելով ծնունդը նույն մարմնում դիմում կներկայացնի, թե որ հաշվեհամարին կամ բանկի որ մասնաճյուղում է ցանկանում ստանալ երեխայի ծննդյան նպաստը և սահմանված ժամկետում բանկային կազմակերպությունների միջոցով կստանա այն: 

-Ե՞րբ առաջացավ համակարգերը համակցելու գաղափարը, և արդյո՞ք այն նախքան պաշտոնապես ներկայացնելը փորձարկվել էր: 

-Համակարգերի մշակումն իրականացվել է Արդարադատության նախարարությունում իրականացված նորարարական գաղափարների մրցույթում հաղթող ճանաչված առաջարկներից մեկի իրագործման արդյունքում:

Համակցված համակարգը 2017թ. հունիսի 1-ից հաջողությամբ փորձարկվեց  Երևան քաղաքի ՔԿԱԳ երկու տարածքային մարմիններում, իսկ այժմ այն գործում է ՀՀ մարզերի բոլոր ՔԿԱԳ բաժիններում: Բոլոր ՔԿԱԳ տարածքային մարմինների աշխատակիցներն անցել են վերապատրաստում և պատրաստ են էլեկտրոնային եղանակով ընդունել ծննդյան նպաստների դիմումները: 

-Էլեկտրոնային կառավարման համակարգերի ներդրման ուղղությամբ այլ քայլեր առաջիկայում կատարվելո՞ւ են: 

-Արդարադատության նախարարությունը էլեկտրոնային գործիքների ներդրման ջատագովներից է, և դրա վառ օրինակն է 2017–ին ներկայացված Իրավական ակտերի նախագծերի հրապարակման միասնական www.e-draft.am  կայքը, որն ապահովում է նորմատիվ իրավական ակտերի նախագծերի վերաբերյալ առցանց հանրային քննարկում կազմակերպելու և քաղաքացիական հասարակության կողմից ներկայացված առաջարկները ամփոփելու գործուն մեխանիզմ՝ ուղղված  կոռուպցիոն ռիսկերի նվազեցմանը, պետության իրավաստեղծ գործունեությանը հասարակության մասնակցության ապահովմանը, իրավական ակտերի նախագծերի մշակման առավել բաց, թափանցիկ և հաշվետու գործընթացի կազմակերպմանը: Նախարարությունը մշակել է նաև www.e-apostille.am էլեկտրոնային ապոստիլ համակարգը, որի նպատակն է ՀՀ արդարադատության նախարարության և ՀՀ արտաքին գործերի նախարարության կողմից փաստաթղթերի ապոստիլով վավերացման գործընթացի անցում էլեկտրոնային եղանակի: ՀՀ արդարադատության նախարարությունը գործարկել է թեժ գծի www.e-hotline.am կայքը, որի նպատակն է բարձրացնել Նախարարության ստորաբաժանումների կողմից մատուցվող ծառայությունների որակը և լուծել ոլորտային խնդիրները: Նախատեսում է ստեղծել լիցենզիաների էլեկտրոնային միասնական www.e-license.am գրանցամատյան, որի նպատակն է պետական մարմինների կողմից լիցենզիաների գրանցման համար վարվող գրանցամատյանների թվայնացումը և միասնական էլեկտրոնային գրանցամատյանի ներդնումը: Բացի այդ, ներկայում իրականացվում են www.e-notary.am էլեկտրոնային նոտար համակարգի արդիականացման աշխատանքներ, ինչի արդյունքում նոտարիատի բնագավառում քաղաքացիներին մատուցվող ծառայությունների զգալի մասը կմատուցվի էլեկտրոնային եղանակով:

 Այսուհետ 200 հազար դրամից քիչ հարկային պարտավորություն ունեցող տնտեսվարողի նկատմամբ չի հարուցվի վարչական վարույթ և 10-20 հազար դրամի չափով տուգանք` օրենքով սահմանված ժամկետում հարկերն ու տուրքերը չկատարելու դեպքում: «Արմենպրես»-ի փոխանցմամբ` այս մասին լրագրողներին տեղեկացրեց Պետեկամուտների կոմիտեի  Իրավաբանական վարչության պետ Արմեն Մնացականյանը: Նրա խոսքով` ընթացիկ տարում իրականացվել են հարկային վարչարարությունը պարզեցնող մի շարք փոփոխություններ, որոնց մի մասն արդեն ուժի մեջ է, որոշներն էլ առաջիկայում են նախատեսվում:

Բանն այն է, որ մինչ նշյալ փոփոխությունը, հարկերը, տուրքերը և օրենքով սահմանված այլ վճարումները ժամանակակին չկատարելու դեպքում նախատեսված էր վարչական տուգանք 10-20 հազար դրամի չափով: Նույնիսկ 1000 դրամ հարկային պարտավորություն ունենալու դեպքում պետք է նշանակվի վարչական տուգանք: Միաժամանակ այդ արարքի համար յուրաքանչյուր ժամկետանց օրվա համար իրավաբանական անձանց ու անհատ ձեռնարկատերերի նկատմամբ հաշվարկվում են տույժեր վճարման ենթակա գումարի 0.15 տոկոսի չափով:

«Սա շատ հաճախ անձանց մոտ դժգոհություն էր առաջացնում, հարցը քննարկվեց ՊԵԿ-ում, ինչպես նաև վարչապետի հանձնարարական ստացանք, որ այդ վարչարարությունը նվազեցնենք ու ազատականացնենք: Կիրառեցինք վարչարարության մասին օրենքով սահմանված համաչափության սկզբունքը, որը ենթադրում է, որ կատարված իրավախախտման համար նախատեսվող պատասխանատվությունը պետք է համաչափ լինի: Մենք որոշեցինք, որ այսուհետ միատեսակ մոտեցում ցուցաբերվի և վարչական պատասխանատվություն կիրառվի միայն 200 հազար դրամից ավելի ապառքի(հարկային պարտավորության մայր գումարն առանց տույժ, տուգանքների) դեպքում»,-ասաց Արմեն Մնացականյանը:

Պաշտոնյայի տեղեկացմամբ` մեկ այլ փոփոխությամբ նախատեսվում է 2018 թվականից օրացուցային տարվա ընթացքում հարկատուի կողմից առաջին անգամ հարկային հաշվարկներ չներկայացնելու դեպքում որպես վարչական տուգանք կիրառել «նախազգուշացում», իսկ նույն խախտման կրկնվելու դեպքում` արդեն նշանակել վարչական տույժ` տուգանքի տեսքով: Ներկայում այս փոփոխության վերաբերյալ կազմված օրենսդրական նախագիծը գտնվում է շրջանառության մեջ:

Հոկտեմբերի 27-ի ոճրագործությունն ակնհայտորեն հետ է գցել Հայաստանի Հանրապետության զարգացումը: Ազգային ժողովում լրագրողների հետ զրույցում նման կարծիք հայտնեց Ազգային ժողովի փոխնախագահ Էդուարդ Շարմազանովը:

 «Թե սպարապետը, թե Կարեն Սերոբիչը, թե մնացած մեր գործընկերները,  այն քաղաքական և ինտելեկտուալ էլիտան էին, որոնց ծառայությունների, ինտելեկտի, կամքի, նվիրված ոգու ու բարեփոխումների կարիքը մեր ժողովուրդը շատ ուներ: Եթե այս ոճրագործությունը չլիներ, մենք կարող էինք ունենալ շատ ավելի շատ ձեռքբերումներ»,- «Արմենպրես»-ի հաղորդմամբ՝ ընդգծեց Շարմազանովը:

Շարմազանովը նաև հիշեցրեց, որ այդ ժամանակ վարչապետ Վազգեն Սարգսյանը նաև ՀՀԿ-ի առաջնորդն էր՝ ընդգծելով, որ իրենք այդ ժամանակ կորցրին ոչ միայն վարչապետին, սպարապետին, այլ նաև կուսակցության առաջնորդին:

Ազգային ժողովի «Ծառուկյան» խմբակցության պատգամավոր Արգամ Աբրահամյանը  հերքում է իր հոր՝ Հովիկ Աբրահամյանի և ԲՀԿ առաջնորդ Գագիկ Ծառուկյանի հարաբերությունները լարվելու մասին լուրերը: Ազգային ժողովում լրագրողների հետ զրույցում Արգամ Աբրահամյանն ընդգծեց, որ դրանք սխալ տեղեկություններ են: «Իհարկե, ոչ: Դրանք սխալ տեղեկություններ են»,- «Արմենպրես»-ի հաղորդմամբ, նշեց Աբրահամյանը՝ պատասխանելով հարցին, թե Հովիկ Աբրահամյանի և Գագիկ Ծառուկյանի հարաբերությունները լարվելու մասին լուրերն արդյոք համապատասխանո՞ւմ են իրականությանը;

Դիտարկմանը, թե տեղեկություններ կան, որ վերջերս Հովիկ Աբրահամյանը հանդիպում է ունեցել ՀՀ նախկին վարչապետ, Եվրասիական տնտեսական հանձնաժողովի նախագահ Տիգրան Սարգսյանի հետ, Արգամ Աբրահամյանը պատասխանեց, թե տեղյակ չէ, սակայն չբացառեց նաև, որ նման հանդիպում եղել է: «Ես տեղյակ չեմ, բայց հնարավոր է. որ եղել է: Ի՞նչ կա դրանում»,- ասաց պատգամավորը:

Հարցին, թե հնարավո՞ր է, որ Հովիկ Աբրահամյանն առաջիկայում նոր պաշտոն ստանա, Արգամ Աբրահամյանն ասաց տեղյակ չէ, սակայն նշեց, թե դրան խանգարող որևէ հանգամանք չկա:

Պատգամավորը հերքեց նաև լուրերը, թե Հովիկ Աբրահամյանի ընտանեկան բիզնեսները վտանգի տակ են: Նա ընդգծեց, որ Աբրահամյանի ընտանեկան բիզնեսները երբեք էլ վտանգի տակ չեն եղել: