Գեղարքունիքի մարզում պետական միջոցներով շարունակվում են Սեւանա լճի մակարդակի բարձրացման հետեւանքով Դրախտիկ-Շորժա-Վարդենիս մայրուղու փլվածքի վերականգնման աշխատանքները:

Ինչպես «Արմենպրես»-ին տեղեկացրեց շինարարական աշխատանքներն իրականացնող «Ճամբարակի ՃՇՇՁ» ընկերության տնօրեն Արարատ Քոչարյանը, վերականգնվող փլվածքի երկարությունը 200 մետր է, խորությունը՝ մոտ 15 մետր: Փլվածքի վերականգնման եւ մայրուղու անվտանգության ապահովման համար պետբյուջեից հատկացվել է 98 միլիոն դրամ: Շինարարական աշխատանքները կավարտվեն նոյեմբերի վերջերին:

«Փլվածքը վերականգնվում է գաբիոնային շարվածքով՝ մետաղական ցանցավանդակների մեջ քարեր լցնելով: Նախատեսված է տեղադրել 4770 հատ գաբիոն, որոնցից 3600-ն արդեն շարված են, կամ՝ կատարված է աշխատանքների մոտ 85 տոկոսը: Նախ փորում ենք հիմքը, որտեղ լցնում ենք մեծ ապառաժներ, որոնց վրա էլ շարվում են գաբիոնները: 200 մետրից 59 մետրը շարվելու է 8 մետր բարձրությամբ եւ 4 մետր լայնությամբ, մնացած 141 մետրը՝ 3,5 մետր բարձրությամբ եւ 3 մետր լայնությամբ:

Ցանցավանդակները գործվում են ցինկապատ մետաղալարով, որի ձեռքբերման համար որոշակի դժվարություններ առաջացան, եւ կարճ ժամանակով մեր աշխատանքները դադարեցին, սակայն հիմա ունենք բոլոր անհրաժեշտ միջոցները՝ շինարարությունը ժամանակին ավարտելու համար: Շինարարության ընթացքում գրանցվել են ուժեղ ալեկոծություններ, որոնց փորձությանը դիմացել են մեր շարած պատնեշները»,-ասաց Արարատ Քոչարյանը:

Գեղարքունիքի մարզում պետական միջոցներով մինչեւ տարեվերջ բնակարաններ կհատկացվեն 39 զոհված եւ վիրավոր ազատամարտիկների ընտանիքների:

Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի առողջապահության եւ սոցիալական ապահովության վարչության սոցիալական ապահովության բաժնի վարիչ Սուրիկ Խաչատրյանը, արդեն մարզպետարանի կողմից ուսումնասիրվել եւ ՀՀ ՊՆ բնակարանային հանձնաժողով են ներկայացվել 33 զոհված եւ 6 հաշմանդամ ազատամարտիկների կարիքավոր ընտանիքների փաստաթղթերը:

«Մեր ունեցած նախնական տվյալներով՝ բնակարան ձեռք բերելու համար անհրաժեշտ գումարն արդեն հատկացվել է այդ ընտանիքներին սերտիֆիկատների տեսքով: Համաձայն սահմանված կարգի՝ կարիքավոր ընտանիքը մարզի տարածքում գտնում է վաճառքի ենթակա բնակարան, ապա պետության կողմից լիազորված ներկայացուցչի միջնորդությամբ պայմանագիր է կնքվում բնակարան գնողի եւ վաճառողի միջեւ, եւ վաճառողի հաշվեհամարին է փոխանցվում պահանջվող գումարը:

Կարծում եմ, որ մինչեւ տարեվերջ մեր կողմից ներկայացված բոլոր կարիքավոր ազատամարտիկների ընտանիքները ձեռք կբերեն բնակարաններ»,-նշեց Սուրիկ Խաչատրյանը:

Բեռնափոխադրող, իրավաբանական, հարկային և բիզնես խորհրդատվություն մատուցող 4 ընկերություն Հայաստանի զարգացման հիմնադրամի տրամադրած ցանկով 2 ամսից մինչև անժամկետ անվճար և զեղչով ծառայություններ կմատուցեն արտահանող և ներդրող ընկերություններին։ «Փրո Թաքս», «ԷյԷմ», «Սթեփ Քոնսալթինգ», «Օնեքս» ընկերությունների ներկայացուցիչների հետ փոխըմբնման հուշագրերը ՀԶՀ անունից ստորագրել է Հետսպասարկման թիմի ղեկավար Հայկ Միրզոյանը։ Այս մասին «Արմենպրես»-ին տեղեկացրին Հայաստանի զարգացման հիմնադրամի լրատվական ծառայությունից:

Խորհրդատվական ընկերությունների ցանկը համալրվում է։ Ոլորտի այլ կազմակերպություններ ծրագրին միանալու համար կարող են դիմել հիմնադրամ։ Ներկայում քննարկումներ ու բանակցություններ են ընթանում տասնյակից ավելի ընկերությունների հետ։

«Փրո Թաքս» ընկերությունն առանց ժամանակի սահմանափակման անվճար խորհրդատվություն կտրամադրի բոլոր տեսակի հարկային և հաշվապահական հարցերով,  առնվազն 2 ամիս անվճար հաշվապահական ծառայություններ կմատուցի՝ նկատի ունենալով հանգամանքը, որ նորաստեղծ ընկերությունների շահութաբերությունն առաջանում է ժամանակի ընթացքում։

«ԷյԷմ իրավաբանական ընկերությունը» առանց ժամկետի սահմանափակման անվճար խորհրդատվություն կտրամադրի բիզնես միջավայրի, ընկերության ստեղծման հետ կապված խնդիրների, սեփականատերերի իրավունքների և պարտականությունների վերաբերյալ, կառաջարկի հարկային օրենսդրության ուսումնասիրություն և լավագույն լուծումներ։ Մի շարք այլ ծառայությունների համար սահմանում է 20 տոկոս զեղչ։

«Սթեփ Քոնսալթինգ» ընկերությունը 2 ամիս անվճար բիզնես խորհրդատվություն կապահովի շրջանառության, հաշիվների դուրսգրման, արտահանումների պարբերականության, արտասովոր գործարքների, ռիսկերի կառավարման վերաբերյալ, կպատրաստի միջազգային փոխանցումներ, վճարային հանձնարարականներ, կվերլուծի հաշիվները, բանկային շարժերը և այլն։

«Օնեքս» ընկերությունը կիրականացնի ՓՄՁ արտադրանքի «Էքսպրես» և «էկոնոմ» կարգերով առաքումներ` բացառիկ զեղչերով։ Աշխատանքներում կներգրավի ռուսաստանյան գործընկերոջը, որը շուկայի խոշոր բեռնափոխադրող ընկերություններից է։

Արտահանող և ներդրող ընկերությունները ծառայություններից կօգտվեն՝ ՀԶՀ տրամադրած ցանկից ընտրելով ցանկացած ընկերություն։  

«Այս նախաձեռնությամբ դյուրացնում ենք ելքն ու մուտքը։ Սա արդյունավետ է հատկապես նոր արտահանողների և ներդրողների համար։ Պոտենցիալ ներդրողները, որ ամբողջական պատկերացում չունեն հարկային, հաշվապահական, օրենսդրական դաշտից, երկիրը ճանաչելու փուլում կկարողանան անվճար սպասարկում ստանալ։ Իսկ արտադրողները, որ նոր են փորձում հարթել ճանապարհները դեպի օտարերկրյա շուկաներ, հիմնադրամի ու գործընկերների հետ ավելի հեշտությամբ կանեն դա»,- նշել է Հայաստանի զարգացման հիմնադրամի գործադիր տնօրեն Արմեն Ավակ Ավակյանը։  

Անվիճելի պարտավորությունների դեպքում հարկային մարմինը իրավունք կունենա առանց ծանուցման կատարել արտադատական կարգով բռնագանձում: «Արմենպրես»–ի փոխանցմամբ` լրագրողների հետ հանդիպմանն այս մասին հայտարարեց ՀՀ ԿԱ ՊԵԿ իրավաբանական  վարչության պետ Արման Մնացականյանը:  Նրա խոսքով` բազմաթիվ են դեպքերը, երբ այս կամ այն հարկ վճարողը սահմանված ժամկետում չի կատարում անվիճելի հարկային պարտավորությունները, որոնք վերջիններիս կողմից ներկայացված հաշվարկ-հաշվետվությունների արդյունքում են ձևավորվում: «Հարկային մարմինն էլ պարտավորված է ձեռնարկելու որոշակի գործողություններ այդ գումարները հարկադիր կարգով գանձելու համար: Ըստ սահմանված կարգի` անձին պետք է նախապես ծանուցել այդ մասին, հրավիրել նրան լսումների, ստանալ բացատրություններ, հետո գանձման որոշում կայացնել, որը ևս ծանուցվի նրան: Բազմաթիվ են դեպքերը, որ անձինք խուսափում են ծանուցվելուց, գործընթացը փակուղի է մտնում, և հարկային մարմինը չի կարողանում կատարել իր գործառույթները»,- ասաց Արման Մնացականյանը:

Շրջանառության մեջ դրված օրենսդրական նախագծով նախատեսվում է նման անվիճելի պարտավորությունների դեպքում հարկային մարմնին թույլ տալ առանց ծանուցման գործողություններ կատարել, քանի որ այդ մասին հարկ վճարողն ինքն արդեն տեղյակ է:

Արման Մնացականյանը տեղեկացրեց նաև, որ նախատեսվում է այդ միջոցները ավտոմատ կերպով գանձել հարկ վճարողի բանկային միջոցներից, սակայն օրենսդրական այս նախաձեռնությունը դեռ քննարկման փուլում է և պետք է անցնի հանրային լսումներ:

Հայաստանի պաշտպանության նախարար Վիգեն Սարգսյանը համոզված է, որ սպարապետ Վազգեն Սարգսյանը հպարտ կլիներ այն առաջընթացով, որ այս տարիների ընթացքում արձանագրել է Հայաստանի Հանրապետությունը: «Ես դժվարանում եմ ասել, թե ինչ կփոխվեր, սակայն վստահ եմ՝ եթե Վազգեն սպարապետն այսօր լիներ, հպարտ կլիներ այն առաջընթացի համար, որ ապրել է Հայաստանի Հանրապետությունը, հպարտ կլիներ տեսնել մեր բանակը, մեր զինված ուժերը, իսկ մենք շատ ավելի ամուր կլինեինք՝ ունենալով ազգային այդպիսի գործչի տեսլականը և մասնակցությունը մեր երկրի կայացմանը: Սակայն, ցավոք, պատմությունը եթե-ներ չի սիրում»,- «Արմենպրես»-ի փոխանցմամբ՝ Եռաբլուր զինվորական պանթեոնում սպարապետ Վազգեն Սարգսյանի հիշատակին հարգանքի տուրք մատուցելուց հետո լրագրողների հետ զրույցում ասաց ՀՀ պաշտպանության նախարարը:

Նա հավելեց, որ քաղաքական ահաբեկչությունը ցանկացած պետության համար հսկայական հարված է՝ ցավով նկատելով, որ մեր երիտասարդ պետությունը ևս զերծ չմնաց այդ փորձությունից, որ իրենց նորագույն պատմության մեջ տեսել են ամենատարբեր երկրներ՝ Միացյալ Նահանգներից մինչև Եգիպտոս, Հնդկաստանից մինչև Նորվեգիա:

Հարցին՝ ո՞ւմ էր ձեռնտու հոկտեմբերի 27-ը՝ հաշվի առնելով, որ կան տարբեր վարկածներ, Վիգեն Սարգսյանը պատասխանեց. «Ես վարկածներ երբեք չեմ մեկնաբանել: Եթե դուք մի փոքր ուսումնասիրեք իմ շփումը հանրության հետ, կտեսնեք, որ ես վարկածներ մեկնաբանելու մեծ սիրահար չեմ: Ես կարծում եմ, որ ցանկացած հանցագործություն պետք է պարզաբանեն քննիչները, համապատասխան մարմինները: Հոկտեմբերի 27-ն ունեցել է նման փուլ իր վայրիվերումներով, և ես առիթ չունեմ մեր դատական համակարգի գնահատականին չվստահելու»:

Հոկտեմբերի 27-ի ոճրագործության 18-րդ տարելիցի կապակցությամբ Հայաստանի Հանրապետության պաշտոնատար անձինք, զինվորականներ, արցախյան ազատամարտի մասնակիցներ, Երկրապահ կամավորական միության անդամներ՝ ՀՀ պաշտպանության նախարար Վիգեն Սարգսյանի և ԵԿՄ նախագահ Մանվել Գրիգորյանի գլխավորությամբ Եռաբլուր զինվորական պանթեոնում հարգանքի տուրք են մատուցել հոկտեմբերի 27-ի ոճրագործությանը զոհ գնացած սպարապետ Վազգեն Սարգսյանի հիշատակին: