ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում քննվող քրեական գործով 3 անձի մեղադրանք է առաջադրվել` «Դիլիջան ազգային պարկ»-ի տարածքում տեղի ունեցած հանցավոր արարքների համար։ Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

Ավելի վաղ տեղեկացրել ենք, որ 2017 թվականի հոկտեմբերի 13-ին՝ ժամը 20:50-ի սահմաններում, մի խումբ անձինք հարձակվել են «Դիլիջան ազգային պարկ» ՊՈԱԿ-ի Շամախյան տեղամասում «Պանտերա սիքյուրիթի» ՍՊ ընկերության պահնորդական ծառայություն իրականացնող երկու աշխատակիցների վրա, հրկիզել ընկերության հսկիչ անցագրային հենակետ հանդիսացող վագոն-տնակը և դիմել փախուստի:

Դեպքի առթիվ հարուցված քրեական գործով ՀՀ ՔԿ Տավուշի մարզային քննչական վարչության Դիլիջանի քննչական բաժնում ձեռնարկված անհրաժեշտ մեծածավալ քննչական գործողությունների արդյունքում փաստական տվյալներ են ձեռք բերվել՝ ենթադրյալ հանցագործություն կատարած, այդ թվում՝ անշարժ հենակետը հրկիզած անձանց ինքնության վերաբերյալ:

Այսպես՝ նախնական քննության տվյալներով՝ 2017 թվականի հոկտեմբերի 13-ին մի խումբ անձինք մոտեցել են «Դիլիջան ազգային պարկ»-ի տարածքում պահնորդական ծառայություն իրականացնող ընկերության անշարժ հենակետ հանդիսացող վագոն-տնակին և իրենց դժգոհությունը հայտնել ուղեփակոցի տեղադրման վերաբերյալ, քաշել տեղում պահնորդական ծառայություն իրականացնող անձանցից մեկի օձիքից: Այնուհետև միջադեպի մասնակից անձանցից երկուսը փայտ են վառել և մուտքի դռնից գցել վագոն-տնակի մեջ՝ այդ կերպ ուրիշի գույքը դիտավորությամբ վնասելով կոպիտ կերպով խախտելով հասարակական կարգը:

Ձեռք բերված ապացույցների համակցությամբ՝ հոկտեմբերի 27-ին 3 անձի մեղադրանք է առաջադրվել՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով: Եվս մեկ անձի մեղադրանք էր առաջադրվել ավելի վաղ։

Այսպիսով՝ հոկտեմբերի 30-ի դրությամբ, քրեական գործի շրջանակներում մեղադրանք է առաջադրվել 4 անձի՝ մի խումբ անձանց կողմից դիտավորությամբ հասարակական կարգը կոպիտ խախտելու համար, որոնցից 3-ի նկատմամբ որպես խափանման միջոց է ընտրվել կալանավորումը, մեկի նկատմամբ՝ ստորագրություն չհեռանալու մասին։

Քրեական գործով էական նշանակություն ունեցող մի շարք հանգամանքներ պարզելու նպատակով նշանակվել է դատահրդեհատեխնիկական, դատաքիմիական, դատաշինարարական և դատաապրանքագիտական համալիր փորձաքննություն, որի եզրակացությունը դեռևս չի ստացվել:

Նախաքննությունը շարունակվում է: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

 ՀՀ մարդու իրավունքների պաշտպան Արման Թաթոյանն այսօր ընդունել է Հայաստանում Ֆրանսիայի արտակարգ և լիազոր դեսպան Ժոնաթան Լաքոտին: Այս մասին «Արմենպրես»-ին տեղեկացրին Մարդու իրավունքների պաշտպանի աշխատակազմից:

Արման Թաթոյանը դեսպանին է ներկայացրել Մարդու իրավունքների պաշտպանի գործունեության առաջնահերթությունները, ինչպես նաև «Մարդու իրավունքների պաշտպանի մասին» ՀՀ սահմանադրական օրենքի նոր կարգավորումները և դրանց կիրառման ուղղությամբ տարվող աշխատանքները: 

Հանդիպման ընթացքում դեսպանը հետաքրքրվել է Հայաստանում մարդու իրավունքների զարգացումների առնչությամբ ձեռնարկվող քայլերի վերաբերյալ, ինչպես նաև կարևորել է Պաշտպանի հաստատության դերը երկրում մարդու իրավունքների պաշտպանության հարցում: 

Հանդիպման ավարտին կողմերն իրենց պատրաստակամությունն են հայտնել ամրապնդել և ընդլայնել ձևավորված համագործակցությունը:

Արարատի մարզի Նոր Խարբերդ գյուղի Անտառային փողոցի տներից մեկի բակում հոկտեմբերի 30-ին օձ է նկատվել, որին բռնելու և անվտանգ տարածք տեղափոխելու համար անհրաժեշտ է եղել փրկարարների օգնությունը: Ինչպես «Արմենպրես»-ին տեղեկացրին արտակարգ իրավիճակների նախարարությունից, դեպքի վայր է մեկնել մեկ մարտական հաշվարկ:

Փրկարարները հայտնաբերել են գյուրզա տեսակի օձ և տեղափոխել անվտանգ տարածք:

Դեռահասների 65 տոկոսն օրվա մեջ մի քանի անգամ օգտագործում է քաղցրավենիք, իսկ 30 տոկոսը` քաղցր գազավորված ըմպելիք: Այս մասին վկայում են «Դպրոցահասակ երեխաների առողջության վարքագծի հետազոտության» արդյունքները:

«Արմենպրես»–ի մամուլի սրահում հրավիրված ասուլիսում Արաբկիր բժշկական  համալիր– Երեխաների և դեռահասների առողջության ինստիտուտի դեռահասների  առողջության ծրագրերի համակարգող Մարինա Մելքումովան նշեց, որ դեռահասների սննդակարգում բանջարեղենի օգտագործման տոկոսը ցածր է, կազմում է 25-30 տոկոս:

«Այստեղ մեծ դեր պետք է ունենա ընտանիքը: Մենք տեսնում ենք, որ շատ դեպքերում փոքր տարիքի երեխաներն արդեն սովոր են քաղցր գազավորված ըմպելիքի օգտագործմանը: Գոյություն ունի սննդի 5 խումբ, որից 4-ը պետք է ամեն օր օգտագործել` ձավարեղեն, կաթնամթերք, մսամթերք, միրգ-բանջարեղեն: 5-րդ խմբում մտնում է քաղցրավենիքը, որը պետք է օգտագործել չափավոր ու ոչ ամեն օր»,-ասաց նա` ավելացնելով, որ այսօր շատ ծնողներ երեխային քաղցրեղեն են խոստանում ինչ-որ բան անելու դիմաց:

Արաբկիր բժշկական համալիր–Երեխաների և դեռահասների առողջության  ինստիտուտի Հանրային առողջության ծրագրերի համակարգող, «Մանկական բժիշկների հայկական ասոցիացիա»-ի գործադիր տնօրեն   Եվա   Մովսեսյանի  խոսքով, սխալ, ոչ ռացիոնալ սննդակարգը կարող է նպաստել մեծահասակ տարիքում քրոնիկ հիվանդությունների զարգացմանը:

«Դրանք բազմաթիվ են`շաքարային դիաբետ, ավելցուկային քաշ, ճարպակալում: Պետք է հասկանալ, որ ավելցուկային քաշը, ճարպակալումը պարզապես կիլոգրամի ավելացում կամ էսթետիկ փոփոխություն չէ: Դա իրականում լուրջ խնդիր է, հանգեցնում է նյութափոխանակության խանգարման, սիրտ-անոթային հիվանդությունների զարգացման: Բացի դրանից, ապացուցված է, որ սխալ սննդակարգը և ցածր ֆիզիկական ակտիվությունը նպաստում են քաղցկեղի որոշ տեսակների զարգացմանը»,-ասաց Եվա Մովսեսյանը` նշելով, որ ճարպակալումը նաև շատ դեռահասների մոտ հոգեբանական խնդիր է առաջացնում:

Ուսումնասիրությունների համաձայն` դեռահաս տղաների շրջանում ավելցուկային քաշ ունի 14 տոկոսը, իսկ աղջիկների մոտ` 5 տոկոսը: Մասնագետները նշում են, որ աղջիկների շրջանում մեկ այլ խնդիր կա, շատերը կարծում են, որ իրենք ունեն ավելցուկային քաշ, այնինչ, դա այդպես չէ, և նրանք սկսում են դիետաներ պահել, փորձել նիհարել, ինչը դեռահաս շրջանում անթույլատրելի է:

Մասնագետների խոսքով, սխալ սննդակարգը կարող է օստեոպորոզ հիվանդության պատճառ դառնալ: Երբ քիչ է օգտագործվում կալցիումով, D վիտամինով հարուստ սնունդը, դրան գումարվում է ցածր ֆիզիկական ակտիվություն, արդյունքում, երեխան հայտնվում է ռիսկի գոտում:

Մարինա Մելքումովան ևս մեկ խնդրի մասին բարձրաձայնեց: Երեխաների 50 տոկոսը չի նախաճաշում: Այս ցուցանիշով Հայաստանն աշխարհի երկրների շարքում հետին դիրքերում է: Հարցումները ցույց են տալիս, որ առաջին իսկ դասամիջոցին երեխաները շտապում են բուֆետ, իսկ այնտեղ առողջ սնունդը քիչ է, քանի որ շատ դեպքերում դրանց պահպանման համար պայմաններ չկան:

Երեխաների շրջանում բավական ցածր է ֆիզիկական ակտիվության ցուցանիշը: Սպորտով զբաղվողները քիչ են, ֆիզկուլտուրայի դասերին էլ չեն սիրում այցելել: Հարցումները ցույց են տալիս, որ դեռահասների 75 տոկոսը հեռուստացույցի առջև անցկացնում է օրվա մեջ 2 ժամից ավելի: Ստացվում է մի պատկեր, երբ երեխան մի քանի ժամ դպրոցում անցկացնելուց հետո, գալիս է տուն, կրկին նստակյաց է, լրացուցիչ պարապում է, երկար ժամանակ է անցկացնում համակարգչի, հեռուստացույցի առջև: Արդյունքում՝ հայտնվում են ռիսկի գոտում:

Մայրաքաղաքում հոկտեմբերի 27-29-ը ծնվել են 190 երեխա: Ինչպես «Արմենպրես»–ին տեղեկացրին Երևանի քաղաքապետարանի աշխատակազմի առողջապահության վարչությունից, երեխաներից 97-ը աղջիկ են, 93-ը` տղա:

ՀՀ ԲՆ բնապահպանության և ընդերքի տեսչական մարմինը ՀՀ վայրի բնության եւ մշակութային արժեքների պահպանման հիմնադրամի (FPWC) հետ համագործակցության շրջանակում Հրազդանի կիրճում գտնվող «Արջանոց» ռեստորանային համալիրի տարածքում պահվող երկու արջերը կտեղափոխվեն ՀՀ Արարատի մարզի Ուրցաձոր համայնքում գտնվող Կովկասյան կենսաբազմազանության ապաստարան: 

«Արմենպրես»–ի հաղորդմամբ`օրերս բրիտանական «The Daily mail»-ն անդրադարձել է Հայաստանում ժամանցի վայրերում պահվող արջերի խնդրին` հրապարակելով Հրազդանի կիրճում գտնվող ռեստորանային համալիրներից մեկում պահվող արջերի լուսանկարները: Պարբերականը նշել էր, որ Հայաստանի ժամանցի վայրերում պահվող արջերը գտնվում են անմխիթար եւ սոված պայմաններում: