Քոնեակը 2017 թուականի առաջին 9 ամիսներուն ամենաշատ արտադրուած ոգելից խմիչքն է Հայաստանի մէջ:

Ազգային վիճակագրական ծառայութեան տուեալներով` այս տարուան Յունուար-Սեպտեմբեր ամիսներուն 21,134 միլիոն լիթր քոնեակ արտադրուած է, ինչ որ 56,5 %-ով աւելի է 2016-ի նոյն ժամանակահատուածի 13,503 միլիոն լիթրէն:

Աճած է նաեւ գինիի (36%-ով), գարեջուրի (10%-ով), եւ շամփայնի (11%-ով) արտադրութիւնը: Յունուար-Սեպտեմբերին այս խմիչքներու արտադրութեան ծաւալները կազմած են համապատասխանաբար` 5,872 միլիոն լիթտ, 17,766 միլիոն լիթր եւ 320,800 լիթր:

Նախորդ տարուան նոյն ժամանակահատուածի համեմատ 29%-ով նուազած են օղիի արտադրութեան ծաւալները: 2016-ին արտադրուած է 5,603 միլիոն լիթր, իսկ 2017-ին` 3,945 միլիոն լիթր:

Ուիսքիի արտադրութիւնը նոյնպէս նուազած է` նախորդ տարուան 9 ամիսներուն 1,083 միլիոն լիթրի փոխարէն այս տարի 876,000 լիթր կազմելով:

Հայաստանի կառավարութիւնը «Տիզնիլենտ» (Disneyland) եւ «Եունիվըրսըլ» (Universal) ընկերութիւններու փորձագէտները Հայաստան հրաւիրած է Վանաձորի մէջ «Տիզնիլենտ»-ի նման վայրի մը նախագիծի իրագործման աշխատանքներուն համար: Այդ վայրը պիտի կոչուի «Նոյլենտ»: Այս մասին յայտարարեց վարչապետ Կարէն Կարապետեան:

«Նախագծի աշխատանքները սկսած են մէկ տարի առաջ, մեկնարկել է 100 մլն. դոլարի ներդրումային ծրագիրը արդիւնաբերութեան եւ գիւղատնտեսութեան ոլորտներուն մէջ եւ հիմա իտալացի լաւագոյն խորհրդատուներ կ’օգնեն մեզի Վանաձորի զարգացման հայեցակարգը մշակելու գործին մէջ», ըսաւ վարչապետը:

Վերջինս նաեւ յայտնեց, որ կառավարութիւնը ներկայիս կը քննարկէ ենթակառուցային կարելի լուծումները, որոնք կրնան առաւել գրաւիչ դարձնել Վանաձորի մէջ հիմնադրուող ձեռնարկը:

Պաշտօնական այցով Նոյեմբեր 9- ին Հայաստան ժամանած Մոլտովայի նախագահ Իկոր Տոտոն կնոջ` Կալինա Տոտոնի հետ միասին այցելեց Հայոց Ցեղասպանութեան զոհերու յիշատակը յաւերժացնող Ծիծեռնակաբերդի յուշահամալիր:

Մոլտովայի նախագահին եւ առաջին տիկնոջը կ՛ուղեկցէր Երեւանի քաղաքապետ Տարօն Մարգարեանը:

Ինչպէս կը տեղեկացնէ «Արմենփրես»-ը, Մոլտովայի նախագահը ծաղկեպսակ դնելով յուշահամալիրին, ապա ծաղիկներ խոնարհելով անմար կրակին մօտ՝ յարգեց 20-րդ դարասկիզբի մեծագոյն ոճիրի` Հայոց ցեղասպանութեան զոհերու յիշատակը:

 Այնուհետեւ ան այցելեց Հայոց ցեղաասպանութեան թանգարան, ծանօթացաւ ցուցանմուշներուն, իսկ թանգարանի յուշամատեանին մէջ մասնաւորաբար գրեց. «Իմ վրաս խոր տպաւորութիւն եւ հոգիիս մէջ անջնջելի հետք ձգեցին պատմական փաստաթուղթերը, լուսանկարները եւ ողբերգական դէպքերու ականատեսներու վկայութիւնները, որոնք աւելի քան 100 տարի առաջ բաժին հասան հայ ժողովուրդին: Անոնք կը պահուին թանգարանին, ինչպէս նաեւ իւրաքանչիւր հայու սրտին մէջ: Սրտանց եւ անկեղծօրէն հայ ազգին կը մաղթեմ խաղաղութիւն, բարութիւն, համերաշխութիւն եւ բարկեցութիւն»:

Թանգարանին կից պուրակին մէջ նախագահը տնկեց խորհրդանշական եղեւնի:

ՀՀ պաշտպանութեան նախարարութիւնն ու «Արար» հիմնադրամը իրականացուցած են համատեղ փորձնական ծրագիր` մարտական դիրքերէն մէկը լիարժէք կահաւորելով եւ ամրացնելով, կը հաղորդէ “Մեդիամասք”-ը:

Ծրագրի ծիրէն ներս տեղադրուած է արեւային կայան, բնական կազի մասնաւոր համակարգ, ինչպէս նաեւ դիրքի տարբեր հատուածներու մէջ կիրառուած են նոր գիտարուեստական լուծումներ:

ՀՀ պաշտպանութեան նախարար Վիգէն Սարգսեան Նոյեմբեր 8-ին ծանօթացած է նշուած մարտական յենակէտին եւ խրամախորշերու մէջ իրականացուած կահաւորման եւ վերամշակեցման աշխատանքներուն:

Հիմնադրամը նշած է, որ ծրագրի նպատակն է դիրքին մէջ իրականացուած լուծումները կիրառկել տարբեր մարտական դիրքերու մէջ՝ զինծառայողներու անվտանգութիւնը եւ մարտունակութիւնը բարձրացնելու նպատակով:

Նախագահ Սերժ Սարգսեանի հրաւէրով այսօր տիկնոջ հետ պաշտօնական այցով Հայաստանի Հանրապետութիւն ժամանած է Մոլտովայի Հանրապետութեան նախագահ Իկոր Տոտոն:

Հանրապետութեան նախագահի նստավայրին մէջ նախագահ Սերժ Սարգսեանն ու տիկին Ռիտա Սարգսեանը  դիմաւորած են նախագահ Իկոր Տոտոնը եւ տիկին Կալինա Տոտոնը: Դիմաւորման պաշտօնական արարողութենէն ետք կայացած է նախագահներ Սերժ Սարգսեանի եւ Իկոր Տոտոնի առանձնազրոյցը:

Ողջունելով գործընկերը Հայաստանի մէջ` Սարգսեան նշած է, որ Մոլտովայի նախագահը ցանկալի հիւր է մեր երկրին մէջ եւ բարձր գնահատած է անոր պաշտօնական այցը, որ կը կայանայ Հայաստանի եւ Մոլտովայի միջեւ դիւանագիտական յարաբերութիւններու հաստատման 25-ամեակին:

«Ասիկա շատ լաւ առիթ է՝ վերլուծելու այն աշխատանքը, որ մենք կատարած ենք այս 25 տարիներու ընթացքին եւ նախանշելու հեռանկարները: Կ’ուզեմ շեշտել, որ մեր միջպետական յարաբերութիւնները կառուցուած են ապահովապէս ամուր հիմքերու վրայ: Ես ուղղակի վստահ եմ, որ Ձեր այցը շատ լաւ խթան պիտի հանդիսանայ մեր յարաբերութիւններու աշխուժացման: Մենք մեծապէս շահագրգռուած ենք անով, ինչպէս նաեւ ոլորտներու` քաղաքական, տնտեսական ու մարդասիրական սերտ համագործակցութեամբ: Փոխգործակցութեան որեւէ սահմանափակում չունինք ինչպէս երկկողմ, այնպէս ալ բազմակողմ ձեւաչափերու մէջ: Բարով եկած էք: Սա Ձեր առաջին պաշտօնական այցն է, եւ յոյսով եմ, որ նման այցեր կ՛ըլլան ամէն տարի»,-ըսած է Սերժ Սարգսեան:

Նախագահ Տոտոն շնորհակալութիւն յայտնած է Սերժ Սարգսեանին այս հրաւէրին համար եւ իր պաշտօնական այցը համարած պատմական` նկատի առնելով, որ երկու երկիրներու միջեւ դիւանագիտական յարաբերութիւններու հաստատումէն անցած 25 տարիներու ընթացքին սա Մոլտովայի Հանրապետութեան նախագահի առաջին այցն է Հայաստան:

«Այս ընթացքին չէ եղած ո՛չ աշխատանքային, ո՛չ պաշտօնական այց, այդ իսկ պատճառով, հաշուի առնելով մեր պատմական ընդհանուր կապերը, ընդհանուր շահերը եւ՛ ԱՊՀ շրջանակներու մէջ եւ ԱՊՀ տարածքին նոր համարկումի նախագիծերուն՝ ես որոշեցի գալ: Այո՛, 25 տարիներու ընթացքին մենք շատ համաձայնագիրներ ստորագրած ենք: Ունինք տասնհինգ համաձայնագիր, այժմ եւս կը պատրաստուին եօթը: Մենք խօսելու բան ունինք, կան որոշակի արդիւնքներ, կան, ի հարկէ, հեռանկարներ: Ես յոյս ունիմ՝ Ձեզի հետ շատ մանրակրկիտ քննարկել ձեր աշխատանքի փորձը ԵԱՏՄ ծիրէն ներս: Գիտեմ, որ մօտակայ ժամանակներս կը ծրագրէք ստորագրել Եւրոմիութեան հետ համագործակցութեան մասին համաձայնագիր: Կը կարծեմ, որ այնպիսի երկիրները, ինչպիսիք են` Մոլտովան եւ Հայաստանը, դատապարտուած են լաւ յարաբերութիւններ ունենալ բոլորին հետ` ե՛ւ Արեւմուտքի, ե՛ւ Արեւելքի: Մեզի համար արդիական է  ձեր փորձը ե՛ւ ԵԱՏՄ-ի մէջ գտնուելու ե՛ւ Եւրոմիութեան հետ համաձայնագիր կնքելու:

«Դուք գիտէք, որ Մոլտովայի մէջ հայկական համայնք կայ, որուն հետ մենք լաւ կը համագործակցինք: Հոն կարճ ժամանակուան ընթացքին արդէն հայերը իրենք զիրենք ապահով եւ հանգիստ կը զգան, ինչպէս իրենց տան մէջ:

«Ես կը ցանկամ Ձեզ շնորհակալութիւն յայտնել, որ առաջին անգամ շատ լուրջ քայլ կատարուած է երկկողմ յարաբերութիւնները խորացնելու համար: Նկատի ունիմ Հայաստանի դեսպանութեան բացումը Քիշնեւի մէջ անցած տարեվերջին: Եւ այս տարի մենք շատ աշխոյժ սկսանք համագործակցիլ դեսպանին հետ: Այս ամէնը ցոյց կու տայ, որ մենք յաջորդաբար կ’անցնինք մեր երկկողմ յարաբերութիւններու նոր մակարդակը»,- ըսած է Մոլտովայի նախագահ Իկոր Տոտոն: