Վարչապետ Կարէն Կարապետեան երէկ ընդունած է կառավարութեան շէնքին առջեւ «Զինուորական ծառայութեան եւ զինուորի կարգավիճակի մասին» օրինագիծին դէմ բողոքի ցոյց իրականացնող ուսանողներու  ներկայացուցիչները: Հանդիպումին ներկայ եղած են նաեւ Հայաստանի Հանրապետութեան պաշտպանութեան նախարար Վիգէն Սարգսեան եւ կրթութեան ու գիտութեան նախարար Լեւոն Մկրտչեան:

Ուսանողներէն Դաւիթ Պետրոսեան հանդիպումէն ետք լրագրողներուն յայտնեց, որ իրենք նախապէս այդպէս չէին պայմանաւորուած հանդիպումի ձեւաչափին մասին: Նախապէս պայմանաւորուածութիւնը եղած է հանդիպիլ միայն վարչապետին հետ, սակայն անոր հետ եղած են նաեւ պաշտպանութեան եւ կրթութեան ու գիտութեան նախարարները:

Վարչապետին եւ նախարարներուն հետ ուսանողները համաձայնութեան չեն եկած: Ուսանողները պիտի շարունակեն իրենց դասադուլը:

Ուսանողները յայտնեցին, որ վարչապետ Կարապետեան առաջարկած է գրաւոր առաջարկներ ներկայացնել օրէնքի նախագիծի ընդունումէն ետք: «Մենք կը կարծենք, որ օրէնքը այս ձեւով պէտք չէ ընդունուի, հետեւաբար կը մերժենք կառավարութեան այս առաջարկը»,- ըսին ուսանողները:

Անոնք կը պահանջեն օրէնքին մէջ զինուորական ծառայութեան համար ուսումը կասեցնելը պարտադիր դարձնելու դրոյթին վերացումը:

Սերժ Սարգսեան Նոյեմբեր 10-ին ընդունած է Արցախի Հանրապետութեան Ազգային ժողովի խորհրդարանական պատուիրակութիւնը` Արցախի ԱԺ նախագահ Աշոտ Ղուլեանի գլխաւորութեամբ:

Պատուիրակութիւնը Հայաստան ժամանած է մասնակցելու Հայաստանի եւ Արցախի Ազգային ժողովներու միջեւ համագործակցութեան միջխորհրդարանական յանձնաժողովի 12-րդ նիստին:

Ինչպէս կը տեղեկացնէ ՀՀ Նախագահի կապի վարչութիւնը, հանրապետութեան նախագահը ողջունած է պատուիրակութիւնը Հայաստանի մէջ եւ կարեւոր համարած միջխորհրդարանական սերտ շփումները հայկական երկու հանրապետութիւններուն միջեւ` ընդգծելով, որ ինչ ձեւաչափով ալ դրսեւորուի փոխգործակցութիւնը` միջխորհրդարանական համագործակցութեան յանձնաժողովի նիստեր, ԱԺ մշտական յանձնաժողովներու պարբերաբար իրականացուող համատեղ նիստեր կամ պատգամաւորական խումբերու շփումներ, ատիկա, ամէն պարագայի, լաւագոյն ձեւն է իրարու միջեւ տեղեկատուութիւն փոխանակելու եւ ընդհանուր խնդիրներու լուծման ուղղութեամբ ջանքերը համատեղելու:

«Ինծի միշտ լաւատեսութեամբ կը համակէ այն, որ հակառակ պարտադրուած պատերազմին` հակառակ սահմանագիծի վրայ առկայ, Արցախի մեր քոյրերն ու եղբայրները մեծ հաւատքով լեցուած են իրենց ապագայի նկատմամբ եւ այդ հաւատքով կ՛ամրապնդեն իրենց պետականութիւնը, կ՛աւելցնեն բարեկեցութիւնը, կը զարգացնեն ժողովրդավարութիւնը: Եւ սա բոլորիս կը համոզէ, որ ճիշդ ճամբու վրայ ենք, եւ որ մեր կամքը անբեկանելի է: Այս ճանապարհին, ի հարկէ, շատ կարեւոր հանգրուան էր ընթացիկ տարուան Փետրուար 20-ին տեղի ունեցած սահմանադրական բարեփոխումներու հանրաքուէն, որ մէկ անգամ եւս հաստատեց, որ չկայ խզուածութիւն Արցախի գործադիր ու օրէնսդիր իշխանութիւններու եւ ժողովուրդի միջեւ, իսկ սա չափազանց կարեւոր հանգամանք է մարտահրաւէրներուն դիմակայելու ընթացքին: Կը կարծեմ` ոեւէ մէկը չի կասկածիր, որ այս ուղին անցնելու ընթացքին ոչ միայն Հայաստանի Հանրապետութիւնը, ոչ միայն մեր բոլոր քաղաքացիները, այլեւ համայն հայութիւնը ձեր կողքին է եւ միշտ այդպէս պիտի ըլլայ»,- ըսած է նախագահը` ընդգծելով, որ խորհրդարանականներու քննարկումներուն արդիւնքները անհրաժեշտ է պարբերաբար հասցնել նաեւ երկու հանրապետութիւններու քաղաքացիներուն, քանի որ, ըստ նախագահ Սարգսեանի՝ մենք ամուր ենք, լաւատես ենք, հաստատակամ ենք, եթէ մեր քայլերը համահունչ են մեր ժողովուրդի ցանկութեան:

Արցախի Ազգային Ժողովի նախագահը շնորհակալութիւն յայտնած է նախագահ Սերժ Սարգսեանին հիւրընկալութեան համար` նշելով, որ ՀՀ ԱԺ-ի հետ միջխորհրդարանական համագործակցութեան նիստերու ծիրէն ներս Հանրապետութեան նախագահին մօտ աւանդաբար հիւրընկալուիլը շատ կարեւոր է խորհրդարանականներուն համար, քանի որ նման հանդիպումները լաւ հնարաւորութիւն են համագործակցութեան օրակարգէն բացի անդրադառնալու երկուստէք հետաքրքրութիւն ներկայացնող արդիական թեմաներուն, համահայկական նշանակութեան խնդիրներուն:

Ան նախագահին տեղեկացուցած է կառուցողական եւ ջերմ մթնոլորտի մէջ տեղի ունեցող միջխորհրդարանական այսօրուան նիստին քննարկուող հարցերուն մասին:

«Մեր հրատապ թեմաներու շարքին է նաեւ յետսահմանադրական զարգացումները ե՛ւ Հայաստանի ե՛ւ Արցախի մէջ: Ինչպէս Դուք նշեցիք, պարո՛ն նախագահ, մենք հիմա շատ կարեւոր փուլ մտած ենք ե՛ւ Հայաստանի ե՛ւ Արցախի մէջ սահմանադրական հանրաքուէներէն ետք մեր կեանքի կարգաւորումները նոր սահմանադրութիւններով պայմանաւորելու առումով: Թէկուզ մենք տարբեր կառավարման ձեւեր ընտրած ենք, բայց այս գործընթացին մէջ ունինք շատ ընդհանրութիւններ, որովհետեւ անցած ճամբան ալ այդ մասին կը վկայէ: Կան որոշ առանձնայատկութիւններ, որոնք, ի հարկէ, մենք կը ցանկանք քննարկել մեր գործընկերներուն հետ, որոնք տեղեակ եղած են այդ գործընթացէն եւ կրնան օգտակար ըլլալ մեր օրէնսդրութիւնը հիմնական օրէնքին համապատասխանեցնելու գործին»,- ՀՀ նախագահին հետ հանդիպման ժամանակ ըսած է Արցախի ԱԺ նախագահ Աշոտ Ղուլեան:

Նոյեմբեր 5-էն 11 Արցախա-Ատրպէյճանական հակամարտ զօրքերու շփման գիծին մէջ պահպանուած են յարաբերական հանգիստ իրադրութիւն:

Նշուած ժամանակահատուածին հակառակորդը հրադադարի պահպանման կարգը խախտած է շուրջ 200 անգամ՝ հրաձգային զինատեսակներէն հայ դիրքապահներու ուղղութեամբ արձակելով 2300 կրակոց:

ՊԲ յառաջապահ զօրամասերը լիակատար վերահսկողութիւն կը  պահպանեն առաջնագիծին վրայ եւ կը շարունակեն վստահօրէն իրականացնել մարտական հերթապահութիւն:

Կրթութիւնը իւրաքանչիւր քաղաքակիրթ երկրի մէջ առաջնակարգ մարզերէն մէկն է: Սակայն, ցաւօք, նիւթական խնդիրներու պատճառով շատ երեխաներ զրկուած են դպրոց յաճախելու իրենց իրաւունքէն: 2010 թուականէն սկսած բարերարներու շնորհիւ «Թէքէեան Կեդրոն» հիմնադրամը կ’իրականացնէ «Անվճար դասագիրքեր կարիքաւոր երեխաներու համար» ամէնամեայ ծրագիրը եւ կ’օժանդակէ առաւել անապահով երեխաներուն ստանալ անվճար դասագիրքեր:

Ծրագիրը կ’իրականացուի նուիրատուութիւններու շնորհիւ, որոնք մասնաւորապէս կ’ապահովուին Լոնտոնի Թէքէեան Խնամակալ Մարմինի կողմէ Անգլիոյ եւ այլ երկիրներու մէջ կազմակերպուած դրամահաւաքներու միջոցով:

2017-2018 ուսումնական տարեշրջանին «Թէքէեան Կեդրոն» հիմնադրամը 2,433 անվճար դասագիրք  տրամադրած է 190 անապահով աշակերտի՝ Երեւանէն, Կիւմրիէն, Ստեփանավանէն, Կարբի գիւղէն եւ Բերձորէն, անորմով իսկ թեթեւցնելով ընտանիքներու նիւթական մտահոգութիւնները: Իսկ ծրագրի իրականացման ութ տարիներու ընթացքին ընդհանուր առմամբ հիմնադրամը տրամադրած է շուրջ 19,000 դասագիրք 10,135,000 ՀՀ դրամ արժողութեամբ:

Հիմնադրամը նպատակ ունի ընդլայնել ծրագիրը, ուստի կը պահանջէ ու կ’ակնկալէ Հայաստանի եւ Սփիւռքի կազմակերպութիւններու եւ անհատներու տեւական համագործակցութիւնն ու օժանդակութիւնը՝ ընկերային գետնի վրայ անապահով ընտանիքներու երեխաներուն:

Նուիրատուութիւն կրնաք կատարել`

«Թեքէեան Կեդրոն» հիմնադրամ
/ՀՀ, Երեւան 0025, Խանջեան 50/
Դրամատուն` «Ամերիաբանկ» ՓԲԸ
Դրամատնային հաշիւ` 15700 22679770200 (ՀՀ դրամ)
SWIFT / BIC: ARMIAM22

«Թէքէեան Կեդրոն» հիմնադրամը կը յայտնէ իր խորին երախտագիտութիւնը բոլոր նուիրատուներուն հայ դպրոցի զարգացման եւ բարգաւաճման հայրենանուէր գործին աջակցելու համար: