Սեպտեմբեր 14-ին Հայ կաթողիկէ Մեսրոպեան բարձրագոյն վարժարանի անձնակազմը գումարեց իր առաջին՝ վերամուտի ընդհանուր ժողովը, Ֆարաճեան հանդիսասրահին մէջ:
Ժողովը բացուեցաւ Մեսրոպեանի հոգեւոր տեսուչ Արժ. տէր Ռաֆֆի քահանայ Յովհաննէսեանի խորհրդածութիւններով: Տէր Ռաֆֆի, մեկնելով կոյր մարդու բժշկութեան աւետարանական հրաշքի խորհուրդէն, անհրաժեշտ համարեց, որ մանկավարժները լաւապէս գիտակցին իրենց պաշտօնը, հասկնան աշակերտներուն կարիքները, գօտեպնդեն զանոնք ինքնավստահութեամբ, օգնեն բոլորին` ամրօրէն ոտքի մնալու գիտութեան ճամբուն վրայ եւ, ամենակարեւորը, արժանի ուշադրութիւն եւ հոգածութիւն ընծայեն ամենատկարներուն, որպէսզի անոնք չմնան լուսանցքի վրայ, այլ ընթանան բոլորին հետ միասին` բոլորին համար նախատեսուած զարգացման ուղիով:
Մեսրոպեանի տնօրէն պարոն Կրէկուար Գալուստ իր զեկոյցի առաջին մասով ընդհանուր գնահատականը կատարեց 2017-2018 տարեշրջանի գործունէութեան՝ դիտել տալով, որ վարժարանը պետական քննութիւններուն արձանագրեց շատ լաւ արդիւնքներ. ընդհանուր հաշուով քննութիւններուն ներկայացան բարձրագոյն եւ արուեստից վարժարաններու 124 աշակերտներ, որոնցմէ 119-ը յաջողեցան (համեմատութիւնը` 96 առ հարիւր):
Անդրադառնալով նոր տարեշրջանի նորութիւններուն՝ պարոն Գալուստ հաղորդեց, որ Մեսրոպեանի մէջ պիտի գործադրուի եռամեայ նոր ծրագիր մը, որուն նպատակն է արմատապէս բարեփոխել դպրոցին կրթական դրութիւնը: Ծրագիրին ղեկավարն է Սեն Ժոզեֆ համալսարանի մանկավարժութեան դասախօս, ուսուցման մեթոտաբան եւ ուսուցիչներու վերապատրաստութեան մասնագէտ դոկտ. Քոլեթ Աուն, որ պաշտօնի կոչուած է որպէս կրթական հարցերու տնօրէնի խորհրդական: Ըստ այդ ծրագիրին՝ այս տարուընէ սկսեալ անգլերէնը պիտի ուսուցանուի մանկապարտէզի առաջին դասարանէն սկսեալ` պահպանելով հանդերձ դպրոցի ֆրանսալեզու ուղղութիւնը, պիտի դասաւանդուի նոր նիւթ մը` կենցաղավարութիւն եւ բարի վարք, պիտի ամրապնդուի համակարգչային գիտութեան դասանիւթին նշանակութիւնը բոլոր դասարաններուն պարագային, զարկ պիտի տրուի ուսուցման մէջ արհեստագիտութեան համարկումին, ինչպէս նաեւ արհեստագիտական նիւթերու եւ «ռոպոթիքս»-ի ուսուցումին (գործակցաբար STEM-ի եւ Little Engineer-ի): Պիտի շարունակուի գործակցութիւնը համալսարաններու եւ միջազգային կազմակերպութիւններու հետ` ուսուցիչներու վերապատրաստման, աշակերտներու զարգացման եւ ծնողներու խորհրդատուութեան մարզերուն մէջ: Պիտի շարունակեն գործել դպրոցական օրուան աւարտէն ետք ուսուցման ծրագիրները («Պիզի Քիտզ» եւ «Փիւնիկ»), շաբաթօրեայ խմբակները, արեւելումի եւ ընկերային-հոգեբանական խորհրդատուութան գրասենեակները:
Պարոն Գալուստ տեղեկացուց, որ յառաջիկայ տարին կը զուգադիպի Մեսրոպեան վարժարանի հիմնադրութեան 80-ամեակին, որուն նուիրուած տեղի պիտի ունենան շարք մը ձեռնարկներ:
Մեսրոպեանի տնօրէնը կարեւորեց փոխադարձ յարգանքի, նախաձեռնողական ոգիի, անկեղծութեան, կարգ ու կանոնի, հետեւողականութեան, հանդուրժողականութեան, գործակցութեան եւ լայնախոհութեան առկայութիւնն ու ամրապնդումը ուսուցիչներուն մօտ՝ յանուն աշակերտներու լաւագոյն կրթութեան եւ դաստիարակութեան: Ան շեշտեց, որ նման պայմաններու մէջ Մեսրոպեանի անձնակազմի անդամները ի վիճակի են սպասուած արդիւքները արձանագրելու՝ վարժարանը առաջնորդելով վերելքի ճանապարհով:
Ժողովի երկրորդ մասով, դոկտ. Քոլեթ Աուն Մերսոպեանի ուսուցիչներուն հետ կայացուց առանձին հանդիպում մը, որուն ընթացքին հանգամանօրէն ներկայացուց կրթական բարեփոխումներուն նպատակները, առանցքային ուղղութիւններն ու գործադրութեան եղանակները:
Տեղեկատուական գրասենեակ
Հայ կաթողիկէ Մեսրոպեան բարձրագոյն վարժարանի
