«ԶԱՐԹՕՆՔ», ՊԷՅՐՈՒԹ –Գերմանիոյ Deutsche Bank մեծագոյն դրամատունը կը ծրագրէ Լոնտոնէն 450 միլիառ եւրօ արժողութեամբ գոյքեր տեղափոխել Ֆրանքֆուրթ Եւրոպայի կեդրոնական դրամատան կողմէ ճնշումին կապակցութեամբ: Այդ մասին, ինչպէս կը փոխանցէ «Արմէնփրես»-ը, Սեպտեմբեր 16-ին յայտնած է «Financial Times» թերթը:

Հրատարակութեան տուեալներով՝ ԵԿԴ-ը կը պնդէ, որ Deutsche Bank-ը պէտք է 75 տոկոսով նուազեցնէ իր դրամագլուխը  Մեծ Բրիտանիոյ մէջ, որպէսզի Լոնտոնի իր մասնաճիւղը համապատասխանէ այն չափանիշներուն, որոնք սահմանուած են եւրոպական դրամատուներու՝ երրորդ երկիրներուն մէջ գտնուող մասնաճիւղերուն համար: Մեծ Բրիտանիան նման երկիր կը դառնայ 2019 թուականի Մարտին Եւրամիութենէն դուրս գալէ ետք: Ինչպէս կը ճշդուի, Լոնտոնի մէջ Deutsche Bank-ի գոյքերը կը կազմեն մօտաւորապէս 600 միլիառ եւրօ, հաղորդած է «ՏԱՍՍ»-ը:

«ԶԱՐԹՕՆՔ», ՊԷՅՐՈՒԹ – Թուրքիոյ խորհրդարանի հայազգի պատգամաւոր Կարօ Փայլան անդրադարձած է Իսթամպուլի 3-րդ օդակայանի կառուցման աշխատանքներուն մասնակցող բանուորներուն ձերբակալութեան:

Այս մասին, ինչպէս կը հաղորդէ «Արմէնփրես»-ը, Փայլանը գրառում կատարած է իր թուիթըրեան էջին վրայ:

«Ինչո՞ւ մարդոց տուներուն դռները կը կոտրեն եւ զանոնք կը ձերբակալեն: Ինչո՞ւ դժգոհութեան իւրաքանչիւր արտայայտութեան համար ճնշում կը բանեցնեն: Կը ճնշեն, քանի որ կը վախնան: Աւազակները կը վախնան, ուրեմն պէտք է շարունակել զիրենք վախցնել»,- բանուորներու ձերբակալութեան է անդրադարձած է Փայլան:

Իսթամպուլի 3-րդ օդակայանի կառուցման աշխատանքներուն մասնակցող բանուորները գործադուլ յայտարարած էին: Գործադուլի պատճառը աշխատանքային ծանր պայմաններն ու ցած աշխատավարձն էին: Գործադուլէն ետք Իսթամպուլի ոստիկանութիւնը լայնածաւալ գործողութիւններ իրականացուցած է եւ բերման ենթարկած գործադուլի մասնակից մօտ 600 բանուոր:

«ԶԱՐԹՕՆՔ», ՊԷՅՐՈՒԹ – Իրաքի վարչապետ Հայտեր Ալ Ապատին յայտնած է, որ Իրաքը կը պատրաստուի փաստաթղթաւորելու թրքական օդուժին կողմէ Իրաքի օդային հիւսիսային սահմանները խախտելու դէպքերը եւ զանոնք ներկայացնել Միաւորուած ազգերու կազմակերպութեան (ՄԱԿ):

Ինչպէս կը հաղորդէ «Արմէնփրես»-ը, թրքական լրատուամիջոցներու փոխանցմամբ՝ այս մասին կը տեղեկացնէ իրաքեան «Rudaw» լրատուական գործակալութիւնը:

Իրաքի վարչապետը յայտնած է, որ Իրաքը պիտի ուժեղացնէ Թուրքիոյ հետ սահմանի զինուորական հսկողութիւնը եւ սահմանային խախտումի դէպքերը կանխելու նպատակով զինծառայողներ պիտի ուղարկէ Իրաքեան Քիւրտիստան:

Թրքական կողմը պարբերաբար կը խախտէ Իրաքի օդային սահմանը եւ օդային հարուածներ կը հասցնէ PKK (Քիւրտիստանի աշխատաւորական կուսակցութեան) զինեալներու՝ Իրաքի հիւսիսը տեղակայուած դիրքերուն, որոնց Իրաք գտնուելուն եւ առհասարակ գործունէութեան դէմ են նաեւ Իրաքի իշխանութիւնները:

«ԶԱՐԹՕՆՔ», ՊԷՅՐՈՒԹ – 14 ամիսէ Թուրքիոյ մէջ բանտարկուած Մեծ Բրիտանիոյ քաղաքացի Ճօ Ռոպինսոնը դիմած է Մեծ Բրիտանիոյ իշխանութիւններուն եւ խնդրած իրեն ազատել թրքական բանտէն:

Այս մասին, ինչպէս կը հաղորդէ  «Արմէնփրես»-ը, կը յայտնէ թրքական «Diken» պարբերականը:

Ռոպինսոնը բրիտանական «ITV News»-ին տուած հարցազրոյցին նշած է, որ ինքը կը գտնուի խոր ընկճախտի մէջ:

Մեծ Բրիտանիոյ արտաքին գործոց նախարարութիւնը արձագանգած է Ռոպինսոնի խնդրանքին եւ նշած, որ ուշադիր կը հետեւի իր գործին եւ կապ հաստատած է Թուրքիոյ համապատասխան մարմիններուն հետ:

Ճօ Ռոպինսոնը Թուրքիոյ մէջ կալանաւորուած է 2017-ին, երբ իր քիւրտ ընկերուհիին՝ Միրա Ռոժքանի հետ մեկնած էր հանգստանալու: Իր ընկերուհին նոյնպէս ձերբակալուած է: Զոյգը կը մեղադրուի ահաբեկչական կազմակերպութեան անդամակցելու եւ օժանդակելու յանցանքով:

Տեղեկութիւններուն համաձայն՝ Ռոպինսոնը մի քանի տարի առաջ եղած է Սուրիա եւ օժանդակած Սուրիոյ հիւսիսային շրջանը գործող քրտական ազգային զինուած ջոկատներուն (PYD/YPG), որոնք Թուրքիոյ մէջ ահաբեկչական  հռչակուած են: Թրքական դատարանը Ռոպինսոնը դատապարտած է 7 տարի 6 ամիս ազատազրկման:

«ԶԱՐԹՕՆՔ», ՊԷՅՐՈՒԹ – Թուրքիան ծանր զինասարք ուղարկած է Սուրիոյ Իտլիպ քաղաքը:  

Այս մասին, ինչպէս կը հաղորդէ «Արմէնփրես»-ը, կը յայտնեն թրքական լրատուամիջոցները:  

Տեղեկութիւններուն համաձայն՝ զինասարքը հասած է Զիսր Էշ Սուգուր քաղաքը, ուր տեղակայուած է թրքական ԶՈՒ դիտակէտերէն մէկը: 

Թրքական զինուած ուժերը Սուրիոյ հիւսիսը ունի 12 դիտակէտ:

Սուրիական Իպլիպի մէջ կռուող ընդդիմադիր գրոհայիններուն զինասարքերու հերթական խմբաքանակի մատակարարումը Թուրքիոյ նախագահ Էրտողանը հիմնաւորած է տեղի խաղաղ բնակչութեան պաշտպանելու անհրաժեշտութեամբ:

Սոչիի մէջ մեկնարկած է Էրտողան-Փութին հանդիպումը, որուն ժամանակ նախագահները հիմնականօրէն պիտի քննարկեն իրավիճակը սուրիական Իտլիպի մէջ:

«ԶԱՐԹՕՆՔ», ՊԷՅՐՈՒԹ –Թուրքիան մտադիր է շարունակել իր դիրքերու ամրապնդումը Սուրիոյ Իտլիպի տարածաշրջանին մէջ: Այդ մասին, ինչպէս կը փոխանցէ «Արմէնփրես»-ը, Թուրքիոյ նախագահ Թայիփ Էրտողանը յայտարարած է Սեպտեմբեր 17-ին օդանաւին մէջ թրքական լրատուամիջոցներուն տուած հարցազրոյցի ժամանակ՝ Ազրպէյճանէն վերադառնալէ ետք:

«Ճիշդ է, որ մենք Իտլիպի մէջ կ’ամրապնդենք մեր զինուորականներուն դիրքերը: Մենք չենք կրնար թոյլ տալ, որ այդտեղ թոյլ տեղեր ունենանք, ուստի մենք կը շարունակենք ուժեղացումը: Եթէ մենք չուժեղացնենք մեր դիտորդական կէտերը, ապա ուրիշը կրնայ նախաձեռնութիւնը իր ձեռքը վերցնել, որուն հետեւանքով կրնան խաղաղ մարդիկ տուժել»,-Էրտողանի խօսքը մէջբերած է «Haber Turk» թերթը: Աւելի կանուխ, թրքական լրատուամիջոցները յայտնած են, որ հրամանատարութիւնը զինուորականներ ուղարկած է Իտլիպ, ինչպէս նաեւ թրքա-սուրիական սահման:

Ներկայիս, Թուրքիան 12 դիտորդական կէտ ունի տարածաշրջանի սահմանի երկայնքին: Թուրք զինուորականներու խնդիրներու շարքին է հսկողութիւնը տարածաշրջանին մէջ հրադադարի ռեժիմին նկատմամբ, հաղորդած է «ՏԱՍՍ»-ը: