Ցաւալի Լուր մը Լիբանանէն
Հարաւային Լիբանանի մէջ ինքնաշարժի մը վրայ տեղի ունեցած իսրայէլեան հարուածին հետեւանքով սպաննուեցան լիբանանցի լրագրողներ։
«Ալ-Մանար»-ի լրագրող Ալի Շաայէպ եւ «Ալ-Մայատին» հեռատեսիլի լրագրող Ֆաթիմա Ֆթունի սպաննուեցան, երբ իրենց ինքնաշարժը հարուածի տակ առնուեցաւ։ Ֆաթիմային եղբայրը, տեսախցիկավար Մոհամմատ Ֆթունին ընտանիքին այլ անդամներուն հետ քանի մը օր առաջ, նոյնպէս սպաննուած էր թշնամական հարուածի հետեւանքով։
Իսրայէլեան բանակը յայտարարութեան մը մէջ նշեց, թէ «վերացուցած է» Շաայէպը, որուն անուանեց «ահաբեկիչ» Հըզպալլայի հետախուզական բաժանմունքին մէջ, որ հաղորդած էր հարաւային Լիբանանի մէջ իսրայէլեան զինուորներու գտնուած վայրերը։ Ան մեղադրեց զինք իսրայէլեան զինուորներուն եւ քաղաքացիներուն դէմ «սադրանք» հրահրելու համար։
Բանակին յայտարարութիւնը ոչ մէկ յիշատակում կատարեց ուրիշ մահերու մասին եւ ոչ մէկ ապացոյց ներկայացուց հաստատելու համար այն պնդումը, թէ Շաայէպը Հըզպալլայի անդամ էր։
Ինչ ալ ըլլան պատճառաբանութիւնները, իրենց առաքելութիւնը կատարող լրագրողներու թիրախաւորումը բացայայտ պատերազմական յանցանք մըն է, որ այսօր անգամ մը եւս կու գայ աւելնալու լրագրողներու, քաղաքացիներու եւ մանուկներու թիրախաւորումի հարուստ պատմութիւն ունեցող Իսրայէլի բանակի քստմնելի արարքներու ցուցակին վրայ:
Լուր փոխանցողը թիրախաւորելը՝ ճշմարտութեան ձայնը լռեցնելու, ահաբեկելու եւ խախտումներու արձանագրումը արգիլելու մտադրուած փորձ մըն է։
Թափուած այս արեան առջեւ ամէն լռութիւն եւ ճշմարտութեան ամէն մթագնում յանցագործին իր յանցանքները շարունակելու օրինականութիւն տուող աններելի եւ խստիւ դատապարտելի արարք մըն է։
Այս տխուր առիթով «Զարթօնք» իր սրտագին ցաւակցութիւնները կը յայտնէ Լիբանանի լրատուական մարմնին, մեր զոհուած գործընկերներուն ընտանեկան պարագաներուն եւ հարազատներուն եւ խստիւ կը դատապարտէ Իսրայէլեան բանակին կողմէ ճշմարտութեան ձայնին բազմիցս եւ բացայայտ թիրախաւորումը ։
«Զ.»
