Թէքէեան Մշակութային Միութեան Ամերիկայի Միացեալ Նահանգներու եւ Գանատայի Կեդրոնական վարչութիւնը 26 Մարտ 2026-ին պաշտօնապէս յայտարարեց ընկեր Սերխիո Նահապետեանի նշանակումը որպէս Կեդրոնական Վարչութեան մնայուն անդամ։
Նշանակումի որոշումը կայացուած էր 24 Մարտ 2026-ին տեղի ունեցած ԹՄՄ ԱՄՆ եւ Գանատայի Կեդրոնական վարչութեան յատուկ ժողովի մը ընթացքին, որ հրաւիրուած էր լրացնելու հանգուցեալ ընկ.հի Մարօ Պետրոսեանի մահով յառաջացած թափուր տեղը։ Որոշումը ընկ. Նահապետեանին հաղորդուեցաւ Վարչութեան նախագահ դոկտ. Արշաւիր Կէօնճեանի կողմէ:
Ընկ. Նահապետեանի անձին նշանակումը կը համապատասխանէ միութեան մէջ իր երկարամեայ գործունէութեան եւ մշակութային ու համայնքային կեանքի տարբեր ոլորտներուն մէջ իր արժէքաւոր ներդրումներուն։
Թեքէեան Մշակութային Միութիւնը իր գոհունակութիւնը յայտնեց այս նշանակումին համար եւ բարի գալուստ մաղթեց ղեկավար նոր անդամին` յայտնելով իր ակնկալութիւնը յառաջիկայ տարիներուն արգասաբեր համագործակցութեան մը։ Նոյնպէս, ան շեշտեց իր մշակութային եւ կրթական առաքելութեան շարունակական ամրապնդման, յատկապէս հայկական աշխարհի նոր սերունդներուն մասնակցութեան կարեւորութիւնը։
Այս նշանակումով, հաստատութիւնը կը վերահաստատէ իր նուիրումը իր ազգանուէր առաքելութեան շարունակականութեան եւ իր ծրագիրներուն աւելի եւս զարգացման միջազգային մակարդակի վրայ յօգուտ մեր Հայրենիքին ու ժողովուրդին։
Մեր կողմէ սրտանց կը շնորհաւորենք արժանաւոր ընկեր Սերխիո Նահապետեանին այս պատասխանատու պաշտօնին վրայ իր նշանակումը, որուն անցած ճանապարհին, փորձին ու նուիրումին հանդէպ ունինք մեծ յարգանք եւ բացարձակ վստահութիւն: Այս առիթով կը շնորհաւորենք նաեւ ԹՄՄ Կեդրոնական վարչութիւնը իր առած լաւագոյն որոշումին համար, նշանակելով ճիշտ անձը իր ճիշտ պաշտօնին վրայ:
«Զ.»
