Համակարգող Խորհուրդի Նիստ Երեւանի Մէջ.
Խմբագիրներու համահայկական համաժողովները համակարգող խորհուրդի հերթական նիստը տեղի ունեցաւ չորեքշաբթի, 8 փետրուար 2023-ին «Նոյեան տապան» լրատուական գործակալութեան Երեւանի կեդրոնին մէջ:
Նիստին մասնակցեցան Սաթիկ Սէյրանեան, Նարինէ Նազարեան, Արամ Անանեան, Տիգրան Յարութիւնեան, Շահան Գանտահարեան, Սեւակ Յակոբեան, Միքայէլ Հաճեան եւ Յակոբ Ասատրեան:
Ժողովականները ընդգծեցին շրջափակուած Արցախի մասին հայկական բոլոր լրատուական միջոցներուն առօրեայ արձագանգումներուն կարեւորութիւնը, միջազգային հանրային կարծիքին օտարալեզու թողարկումներով տեղեկացնելու հարցին էութիւնը, Ազրպէյճանի ցեղական զտման քաղաքականութեան մերկացումին անհրաժեշտութիւնը:
Նիստը կարեւոր նկատեց նաեւ այսօրուան պայմաններուն մէջ տեղեկատուական հարթութեան վրայ համագործակցութիւնը վերարժեւորելու եւ լրատուական ցանցային համակարգը նպատակաուղղուած աշխատցնելու հրամայականը:
Որոշուեցաւ յետհամավարակային ներկայ ժամանակահատուածին համախմբումի հանդիպումներու ձեւաչափը վերականգնել եւ աշխատանքներուն հարթակները վերաձեւաւորել:
Այս շրջածիրին մէջ արծարծուեցաւ տարածաշրջանային համաժողովներ կազմակերպելու կարելիութիւնը: Առաջին տարածաշրջանային համաժողովը տեղի պիտի ունենայ Լիբանանի մէջ:
Միջին Արեւելքի տարածաշրջանին համար նախատեսուած այս համաժողովին մանրամասնութիւնները կը հրապարակուին շուտով:
Համակարգող խորհուրդը իր հերթական նիստերը պիտի շարունակէ գումարել թէ՛ առցանց, եւ թէ ֆիզիքական ներկայութեամբ հանդիպումներու դրութիւններով:
Լրատուամիջոցներու խմբագիրները իրենց առաջարկները կրնան յղել
panarmenianmediaforum@gmail.com հասցէին:
