Մայր Աթոռ Սուրբ Էջմիածնից Կանանց տօնի առիթով շնորհաւորում եւ Հայրապետական Մեր օրհնութիւնն ենք բերում տիկնանց եւ օրիորդաց:
Այսօր վերստին առիթն ունենք անդրադառնալու կանանց ներդրումին ու բարի աւանդին ընտանիքներում, մեր ազգային, եկեղեցական եւ պետական ու հասարակական կեանքում, գնահատելու նրանց ձեռքբերումները կրթութեան, գիտութեան, առողջապահութեան եւ բազում այլ կարեւոր բնագաւառներում: Մեր երկիրն այսօր դժուարութիւններ է կրում, դեռ յաղթահարուած չեն պատերազմի ծանր հետեւանքները եւ շատ հոգսեր ծանրացած են կանանց ուսերին, ովքեր համբերութեամբ, նախանձախնդրութեամբ եւ արիութեամբ յանձնառու են իրենց առաքելութեանը:
Սիրելի մայրեր, քոյրեր եւ դուստրեր, աղօթք ենք բարձրացնում ամէնքիդ համար` հայցելով, որ Տէրը Իր օրհնութեան ու շնորհների ներքոյ քաջառողջ պահպանի ձեզ եւ հաւատով ու սիրով լեցուն, որպէսզի նոյն նուիրումով ծառայէք ձեր ընտանիքների ապահովութեանն ու երջանկութեանը եւ մեր հայրենիքի ու ժողովրդի առաջընթացին: Ձեր ջանքերով է նաեւ, որ պիտի յաղթահարուեն առկայ նեղութիւնները եւ զօրանայ յոյսը ապագայի հանդէպ,հասակ առնի ջերմ հաւատքով, ազգասէր ու հայրենասէր ոգով սերունդ` անխախտ պահելու մեր ժողովրդի վերելքի ուղին: Թող Բարձրեալի շնորհով ձեր կեանքի եւ համայն մեր ժողովրդի ուղեկիցները լինեն խաղաղութիւնն ու բարօրութիւնը: Ապրէ՛ք առ Աստուած ապաւինութեամբ եւ աղօթքը` մշտահունչ ձեր շուրթերին. «Յիշի՛ր մեզ, Տէ՛ր, ի հաճութիւն քո ժողովրդի, եւ այցելի՛ր մեզ քո շնորհելիք փրկութեամբ» (Սղմ. 105. 4):
Թող մեր Տէր Յիսուս Քրիստոսի սերն ու ողորմութիւնը, շնորհներն ու օրհնութիւնը լինեն մեզ հետ եւ բոլորի, այսօր եւ միշտ. ամէն:
