Մինչ ներքին եւ միջազգային ճնշումները ամէն օր աւելի եւս կը սաստկանան, կառավարութեան վրայ, որպէսզի անյապաղ բարեփոխումներու ձեռնարկէ, կառավարութիւնը փորձեր կը կատարէ քայլեր առնելու այս ուղղութեամբ: Իր առաջին քայլը պիտի ըլլայ ելեկտրականութեան ոլորտի բարեփոխումներուն ձեռնարկել: Ոլորտ մը, որուն տնօրինման բարեփոխումը միջազգային նուիրատուներու եւ պարտատէրերու կարեւորագոյն պահանջն է: Նշենք, որ այս ոլորտը լիբանանի պետութեան պիւտճէին տարին 2 միլիառ տոլարի բաց կը ձգէ:
Նախարարաց խորհուրդը պիտի գումարուի Երեքշաբթի առաւօտեան ժամը 11ին Պաապտայի պալատին մէջ օրակարգ ունենալով ելեկտրականութիւնը: Օրակարգը կը գլխաւորէ պետական հաստատութիւն հանդիսացող ելեկտրական ընկերութեան տնօրէններու նոր խորհուրդ մը նշանակել: Վարչական տնօրինումներու հարցով տակաւին համախոհութիւն չկայ կողմերուն մէջ, որոնցմէ իւրաքանչիւրը նշանակումներու մէջ իր բաժինը կը հետապնդէ:
