Երեւան քաղաքի ընդհանուր իրավասության դատարանը` դատավոր Ռոբերտ Պապոյանի նախագահությամբ, քիչ առաջ վերադառնալով խորհրդակցական սենյակից որոշեց մերժել ԲՀԿ առաջնորդ Գագիկ Ծառուկյանին կալանավորելու մասին միջնորդությունը: Որոշման հրապարակմանը ներկա էր Գագիկ Ծառուկյանը, գրում է Armtimes.com-ը:
Ծառուկյանին կալանավորելու միջնորդություն Ազգային անվտանգության ծառայությունն էր ներկայացրել: Նրա նկատմամբ քրեական հետապնդում սկսելուն եւ ազատությունից զրկելուն համաձայնություն տալու միջնորդությունը ներկայացրել էր գլխավոր դատախազ Արթուր Դավթյանը։
Ազգային ժողովի հունիսի 16-ի հերթական նիստում պատգամավորները 87 կողմ, 0 դեմ ձայներով քվեարկեցին Գագիկ Ծառուկյանին անձեռնմխելիությունից զրկելու համաձայնության համար:
Նույնը օրը, դարձյալ 87 կողմ, 0 դեմ ձայներով Ազգային ժողովը նաեւ համաձայնություն տվեց ԱԺ պատգամավոր Գագիկ Ծառուկյանի նկատմամբ քրեական հետապնդում սկսելու կամ նրան ազատությունից զրկելու վերաբերյալ գլխավոր դատախազի միջնորդությանը:
