Սամվել Բաբայանը նշանակվել է Արցախի Հանրապետության անվտանգության խորհրդի քարտուղար։ Ինչպես տեղեկացնում է «Արմենպրես»-ը, այս մասին «Ֆեյսբուք»-ի ուղիղ եթերում հայտնել է Արցախի Հանրապետության նախագահ Արայիկ Հարությունյանը։
«Վերջնական որոշումը կայացրել ենք երեկ Երևանում։ Մինչ այդ Սամվել Բաբայանը երբևէ չի ակնարկել որևէ պաշտոն զբաղեցնելու առումով, նա միշտ պատրաստ է համագործակցության հանուն երկրի ապագայի և ժողովրդի։ Երեկ առաջարկել եմ նրան զբաղեցնել Արցախի անվտանգության խորհրդի քարտուղարի պաշտոնը»,- ասաց Հարությունյանը։
Արցախի նախագահի խոսքով՝ Արցախի անվտանգության խորհուրդը իր համար լինելու է կարևոր օղակներից մեկը։
«Ցանկանում եմ շնորհակալություն հայտնել Սամվել Բաբայանին այս ծանր ժամանակահստվածում ստանձնելու նման կարևոր պատասխանատու պարտականություն»,- ասաց Հարությունյանը։
Սամվել Բաբայանը եղել է ԼՂՀ ինքնապաշտպանական ուժերի նախկին գլխավոր հրամանատարը։ Ռազմական, պետական և քաղաքական գործիչ է՝ գեներալ-լեյտենանտ (1996), Արցախի հերոս (1997)։
