Սուրբ Էջմիածնի Կրօնասէր Տիկնանց Համախմբումը խոր վիշտով կը գուժէ մահը իր նուիրեալ, բարեպաշտ, երկարամեայ վարչականուհիներէն Տիկին Վեհան Պետիրեանի, որ պատահեցաւ Լոս Անճելըսի մէջ, Մայիս 14, 2020֊ին։
Սիրելի վարչականուհին նուիրուածութեամբ եւ անվերապահօրէն վարած է Համախմբումի ատենադպրութիւնը, օրինակելի գիտակցութեամբ եւ պատրաստակամութեամբ, մօտ 30 տարիներ, Ամերիկայի Միացեալ Նահանգներ մեկնելէ առաջ Յուլիս 2015֊ին։
Ան անսահման հաւատք և խորունկ սէր ունէր հանդէպ Հայաստանեայց Առաքելական Եկեղեցւոյ առաքելութեան եւ անսասանութեան։
Իր ամուսնոյն, գրագէտ և պատմաբան Լեւոն Վարդանին հետ ծառայած է հայերէն լեզուի եւ գրականութեան ծաղկումին, Լիբանանի պայծառ եւ դժնդակ տարիներուն։
Երկար տարիներ, որպէս կրթական մշակ, հայեցի դաստիարակութեամբ ջամբած է հազարաւոր հայ սերունդներ։
Իր յիշատակը վառ պիտի մնայ Համախմբումի տարեգրութեան եւ հաւատացեալներու մօտ։
Սուրբ Էջմիածնի Կրօնասէր Տիկնանց Համախմբումը իր խորին ցաւակցութիւնը կը յայտնէ զաւկին Վարուժան Պետիրեանին և համայն Պետիրեան ու Մելիտոնեան ընտանիքներուն։
Յիշատակը անթառամ մնայ.
Խունկ և աղօթք իր շիրիմին։
