Ռամկավար Ազատական Կուսակցութեան Լիբանանի Շրջանային Վարչութիւնը սրտի դառն կսկիծով կը գուժէ հաւատաւոր, երէց ընկեր՝
ՅԱՐՈՒԹԻՒՆ ՄԿՐՏԻՉԵԱՆի,
մահը, որ պատահեցաւ Երեքշաբթի,Մայիս 12-ին, Նիւ Եորքի մէջ։
Այս տխուր առիթով Ռամկավար Ազատական Կուսակցութեան Լիբանանի Շրջանային Վարչութիւնը իր խորազգաց ցաւակցութիւնները կը յայտնէ հանգուցեալ ընկերոջ հարազատներուն եւ ընտանեկան պարագաներուն, ի մասնաւորի անոր եղբօրորդի՝ ՌԱԿ Կեդրոնական Վարչութեան անդամ, Արեւելեան Ամերիկայի Շրջանային վարչութեան ատենապետ Ընկ. Նորայր Մկրտիչեանին:
Յաւերժ լոյս ու խաղաղութիւն իր հոգիին:
Յարութիւն Մկրտիչեան
(1937 – 2020)
Հաւատաւոր ընկեր Յարութիւն Մկրտիչեան տասնամեակներ շարունակ ունեցած է կուսակցական, միութենական եւ հասարակական բեղուն եւ նուիրեալ գործունէութիւն Լիբանանի եւ ԱՄՆ-ի մէջ։
Ան ծնած է Պէյրութ, 1937-ին, Պօղոս եւ Նազելի Մկրտիչեաններու ընտանիքէն ներս, ըլլալով կրտսերագոյնը՝ ընտանիքի հինգ զաւակներուն մէջ:
Նախակրթական ուսումը Պէյրութի մէջ ստանալէ ետք, յաճախած եւ աւարտած է Կիպրոսի Մելգոնեան կրթական հաստատութիւնը, 1956-ին: Մասնագիտութեամբ եղած է դեղագործի օգնական:
Մկրտիչեան ՌԱԿի շարքերուն անդամագրուած է 1958-ին, Պէյրութի մէջ:
Ան միաժամանակ անդամակցած է Հ.Բ.Ը.Միութեան եւ իր գործօն մասնակցութիւնը բերած է Հ.Ե.Ը.ի Անդրանիկ-Սեւան սկաուտական շարժումին եւ ֆութպոլի խումբին:
1968-ին ընտանեկան բոյն կազմած է Մարիամ Սարգիսեանի հետ եւ բախտաւորուած զոյգ զաւակներով՝ Կարինէ եւ Կարէն:
Լիբանանի քաղաքացիական պատերազմին պատճառով ընտանիոք 1983-ին փոխադրուած է Ամերիկա եւ բնակութիւն հաստատած Նիւ Եորքի Քուինզ քաղաքը:
Ամերիկայի մէջ ան շարունակած է ծառայել Ռամկավար Ազատական Կուսակցութեան, Նիւ Եորք, Նիւ Ճըրզիի Արմենակ-Յովսէփեան ակումբէն ներս, զբաղեցնելով պատասխանատու պաշտօններ: Ան նաեւ գործօն անդամ էր տեղւոյն Թէքէեան Մշակութային Միութեան:
Անոր դուստրը՝ Կարինէն, ԱՄՆի մէջ կ’ամուսնանայ Ռիչըրտ Ուորթիի հետ եւ իր ծնողներուն կը պարգեւէ թոռնուհի մը՝ Ամանտա, այժմ՝ 16 տարեկան :
Ընկեր Մկրտիչեան թուականէս երկու տարի առաջ կորսնցուցած էր իր կողակիցը:
Գաղափարի հաւատաւոր զինուորագրեալ հանգուցեալ ընկերոջ յիշատակը միշտ վառ պիտի մնայ զինք ճանչնալու եւ իր մտերմութիւնը վայելելու բախտաւորութիւնը ունեցողներուն յիշողութեան մէջ։
Աջակցէ՛ ԶԱՐԹՕՆՔ-ին. Ապահովէ՛ Անոր Գոյերթը