«Զվարթնոց» միջազգային օդանավակայանի բեռնային համալիրում տևական դադարից հետո կսկսեն իրականացվել կանոնավոր բեռնային (cargo) փոխադրումներ:
«Արմենպրես»–ի հաղորդմամբ՝ այս մասին տեղեկացնում են «Զվարթնոց» միջազգային օդանավակայանից։
«Coyne Airways ընկերության և «Զվարթնոց» միջազգային օդանավակայանի միջև ձեռք բերված պայմանավորվածության համաձայն, սույն թվականի մայիսի 10-ին մեկնարկ տրվեց Լյեժ (Բելգիա) և Երևան քաղաքների միջև կանոնավոր բեռնային փոխադրումներին: Բեռնային փոխադրումները կիրականացվեն շաբաթական մեկ չվերթ հաճախականությամբ՝ յուրաքանչյուր կիրակի: Չվերթները կիրականացվեն Բոյինգ 737-400 օդանավերով՝ մինչև 20 տոննա բեռ փոխադրելու հնարավորությամբ»,- նշում են օդանավակայանից:
«Internatioanl transport journal»-ից տեղեկանում ենք, որ բրիտանական ընկերությունն արդեն ավելի քան երկու տասնամյակ է, ինչ իրականացնում է բեռնափոխադրումներ դեպի Երևան՝ ավելի վաղ սպասարկելով Հայաստանի մայրաքաղաքը Թբիլիսիի տարածքով:
Ավիաընկերության գործադիր տնօրեն Լարի Քոյնը նշել է, որ Երևանն իրենց համար կարևոր շուկա է եղել տարիներ շարունակ։
«Մենք ուրախ ենք Լյեժից ուղիղ բեռնափոխադրումների միջոցով թողունակությունը մեծացնելու հնարավորության համար, ինչը, հատկապես կողջունվի գլոբալ համաճարակի ժամանակ»,- հայտնել է Քոյնը:
Լյեժ և Երևան քաղաքների միջև կանոնավոր բեռնային փոխադրումների ծառայությունը սկսվել է 2020 թվականի մայիսի 10-ից։
