Հայաստանում սահմանադրական փոփոխությունների հայեցակարգը պատրաստ կլինի մինչև այս տարվա սեպտեմբեր ամիս, դրանից հետո կսկսվեն հանրային քննարկումներ, սակայն ամբողջական նախագիծը կներկայացվի հաջորդ տարի:
«Արմենպրես»-ի հաղորդմամբ` այս մասին ԱԺ-ում ասաց ՀՀ արդարադատության նախարար Ռուսատամ Բադասյանը՝ պաատասխանելով «Իմ քայլը» խմբակցության ղեկավար Լիլիթ Մակունցի հարցին:
Մակունցը հիշեցրեց, որ նախարարությունը 2019-ին հայտարարել էր, թե պատրաստվում է ստեղծել աշխատանքային խումբ՝ սահմանադրական փոփոխությունների փաթեթի շուրջ աշխատելու համար: Նա հետաքրքրվեց, թե աշխատանքներն ինչ փուլում են:
Բադասյանը տեղեկացրեց, որ աշխատանքներն ընթանում են: «Հիմա աշխատում ենք հայեցակարգի մշակման վրա, որը պետք է նախնական տեսքով պատրաստ լինի մինչև սեպտեմբեր, դրանից հետո հանրային քննարկումներ սկսվեն, և արդեն հաջորդ տարի ներկայացվի սահմանադրական փոփոխությունների նախագիծն ամբողջական»,-ասաց նախարարը:
Կորոնավիրուսի համաճարակի պատճառով ֆիզիկապես նիստեր չեն անցկացնում, սակայն տեսակապի միջոցով ամեն շաբաթ ընթանում են նիստեր՝ բավականին ինտենսիվ, բոլոր ուղղություններով: Նախարարի կարծիքով՝ հիմա արդեն նշմարվում է, որ սահմանադրական փոփոխությունները բավական մեծ շրջանակ են ընդգրկելու:
