«Եղեռնազարկ ժողովրդի զավակ». այսպես է իրեն անվանել հայ գրականության մեծանուն քնարերգու Հովհաննես Շիրազը, որը բազմաթիվ բանաստեղծությունների, պոեմների ու քառյակների հեղինակ է, գրող, որը կարողացել է իր ստեղծագործությունների անկեղծությամբ գերել ընթերցողներին:
«Արմենպրես»–ի հաղորդմամբ՝ ապրիլի 27-ը Հովհաննես Շիրազի ծննդյան օրն է:
Մեզ հետ զրույցում Եղիշե Չարենցի անվան գրականության և արվեստի թանգարանի տնօրեն Կարո Վարդանյանն ասաց, որ Շիրազն առաջիններից էր, եթե ոչ առաջինը, որն իր տաղանդը լիաբուռն նվիրեց պահանջատիրությանը: «Մասիսը՝ որպես Հայոց ցեղասպանության, պատմական Հայաստանի վերապրումի, կենսասիրության խորհրդանիշ հենց Շիրազը բերեց գրականություն: Շիրազը Արարատին նվիրված տասնյակ բանաստեղծություններ ունի»,-նշեց Վարդանյանը:
Նրա խոսքով՝ Հովհաննես Շիրազը երևելի սերնդի բացառիկ ներկայացուցիչ էր: «Ժամանակը շատերին լուսանցք նետեց, իսկ Շիրազը, Համո Սահյանը, Պարույր Սևակը, որոնք իրապես շատ մեծ են, մնացին հաստատուն, և այսօր էլ նույնքան սիրում ու մեծարում ենք նրանց, ինչպես տասնամյակներ առաջ»,-ասաց թանգարանի տնօրենն ու հավելեց, որ Շիրազի գործերում ընդգծված վերաբերմունք կա հայրենիքի և մոր նկատմամբ. մայր ասելով՝ հասկանում էր հայրենիք, իսկ հայրենք ասելով՝ Աստղիկ մորը:
«Շիրազը հոյակապ դեմք է մեր պոեզիայի Պառնասում, հորդաբուխ ու ճշմարիտ բանաստեղծ, նրա ամեն մի բանաստեղծությունը մի գյուտ է զարմանալի պատկերներով: Համաշխարհային գրական գոհարներ եթե կազմվեն, ես մեծ սիրով տեղ կտայի «Էքսպրոմտին», «Բիբլիականին» և այլ բանաստեղծությունների:
Շիրազը հայ ժողովրդի վշտի դարավոր մառախուղից ծագած աստղն է»,-գրել է Ավետիք Իսահակյանը:
