Արցախի Հանրապետությունում կորոնավիրուսի տարածումը կանխելու նպատակով հայտարարված արտակարգ դրության ընթացքում Մարտակերտի շրջանի վարչական տարածքի հատուկ տեղամասերում Ազգային անվտանգության համապատասխան ստորաբաժանումները տեղակայել են չորս հատուկ անցակետեր։
«Արմենպրես»–ի հաղորդմամբ՝ այս մասին տեղեկանում ենք Արցախի տեղեկատվական շտաբից։
«Հիմք ընդունելով Արցախի Հանրապետության Նախագահի 2020 թվականի ապրիլի 12-ի «Արցախի Հանրապետությունում արտակարգ իրավիճակ հայտարարելու մասին» ՆՀ-32-Ն հրամանագիրը և դրա հիման վրա Պարետի կողմից ընդունված արտակարգ իրավիճակի իրավական ռեժիմով պայմանավորված՝ Արցախի Հանրապետության ողջ տարածքում անձանց ազատ տեղաշարժի իրավունքի նկատմամբ կիրառվող ժամանակավոր սահմանափակումների մասին որոշումը, ինչպես նաև ղեկավարվելով Ազգային անվտանգության ծառայության կանոնադրության 16-րդ կետի 8-րդ ենթակետով՝ Արցախի Հանրապետության Ազգային անվտանգության տնօրենի հրամանով, Ծառայության համապատասխան ստորաբաժանումները սույն թվականի ապրիլի 15-ի ժամը 22:00-ից՝ Մարտակերտի շրջանի վարչական տարածքի հատուկ տեղամասերում տեղակայել են թվով 4 հատուկ անցակետ։ Այնտեղ իրականացվում է պարեկային շուրջօրյա ծառայություն նշված ուղղությամբ և հարակից բնակավայրերում անձանց և տրանսպորտային միջոցների տեղաշարժը վերահսկելու և Պարետի կողմից սահմանված որոշումների պահանջներն ապահովելու համար: Նշված գործունեության շրջանակում Ազգային անվտանգության ծառայությունն ակտիվ համագործակցում է ԱՀ ոստիկանության, տեղական ինքնակառավարման մարմինների և շահագրգիռ մյուս կառույցների հետ»,- նշված է հաղորդագրության մեջ:
Արցախում նոր տիպի կորոնավիրուս է հաստատվել 7 քաղաքացու մոտ, որոնցից 2-ը բուժվել են։ Ընդհանուր առմամբ իրականացվել է 141 թեստավորում, մեկուսացվել 25 անձ։
