Ես կը հաւատամ, որ շուտով պիտի ըսենք, թէ վարակ մը անցաւ այստեղէն եւ աւելի եւս ուրախ օրեր դարձեալ պիտի գան:
Գաւաթ մը սուրճը, որ սրճարանին մէջ մեր սիրելիներուն հետ կը խմէինք աւելի եւս անոյշ պիտի բուրէ եւ յատուկ համ մը պիտի ունենայ:
Մայրամուտի պահը աւելի եւս տեսարժան պիտի ըլլայ երբ բոլորս զինք դիտելու պիտի ժամադրուինք նորէն:
Պտուղներու բուրմունքը աւելի եւս պիտի գրաւէ մեզի: Մարդիկ դարձեալ պիտի ուտեն ինչ ցանած են. հողին արտադրածը աւելի առողջ է, որովհետեւ մարդկութիւնը ձանձրացած է իր համար տուփերու մէջ դրուած պահածոյ սնունդէ, մշակոյթէ եւ ատելութենէ…:
Պիտի յաղթենք նորէն: Տօներ դարձեալ պիտի գան եւ ճաշասեղաններուն շուրջ կենացներ պիտի խմենք: Աղօթատեղիները պիտի լեցուին հաւատացեալներով, որոնք իրենց տարբերութիւններուն հանդէպ աւելի հանդուրժող պիտի ըլլան:
Բոլոր յետաձգուած հարսանիքները աննախընթաց կերպով պիտի կայանան իսկ բնութեան մէջ մեր հաւաքոյթները՝ լուսինը դարձեալ պիտի լուսաւորէ ու ջերմացնէ:
Բոլոր ձայները կեանքը սիրող երգեր պիտի երգեն: Անոնք, որոնք իրարմէ սրտնեղած էին, դարձեալ քով-քովի պիտի գան: Իսկ բոլոր անոնք, որոնք գաղթած էին կամ մղուած էին գաղթելու՝ պիտի վերադառնան:
Կեանքը, որ կարծէք պահ մը կանգ առած է այսօր, պիտի դարձեալ ընթացք առնէ:
Անպայման պիտի ընթացք առնէ:
ՍԵՒԱԿ ՅԱԿՈԲԵԱՆ
Աջակցէ՛ ԶԱՐԹՕՆՔ-ին. Ապահովէ՛ Անոր Գոյերթը
