Փետրուար 2020-ին, Գալուստ Կիւլպէնկեան Հիմնարկութեան Հայկական Բաժանմունքը մեկնարկեց «Նորարար Մշակոյթի Ծրագիր»ը, որ ուղղուած է լիբանանահայ ա՛յն երիտասարդներուն, որոնք կը փափաքին արեւմտահայերէնով ստեղծագործել եւ նորարար ծրագիրներ իրագործել:
«Նորարար Մշակոյթի Ծրագիր»-ը Գալուստ Կիւլպէնկեան Հիմնարկութեան Լիբանանին վերաբերող ռազմավարութեան հինգ հիմնասիւներէն մէկը ըլլալով, անոր հիմնական նպատակն է արեւմտահայերէնով յղացուած նորաշունչ նախաձեռնութիւնները խթանել:
Այս նպաստի ծրագիրը կը միտի սփիւռքեան իրականութեան եւ հայկական մշակութային կեանքին մէջ տարբեր ձեւաչափերով ներդրում ունենալու՝ չսահմանափակուելով սեղմ կանոններով: Թէպէտ տասնամեակներու ընթացքին մէջտեղ եկած մշակութային տարբեր ձեռնարկներու կարեւորութիւնը անժխտելի է, սակայն միշտ չէ որ ստեղծարար միտք ունեցող երիտասարդը կրցած է եւ այսօր կրնայ նման պայմաններու մէջ առաւելագոյն չափով յայտնաբերել իր կարողականութիւնը եւ ազատ մտածելու հմտութիւնը:
Ուստի, Հիմնարկութիւնը հետաքրքրական մտայղացումներ ունեցող երիտասարդներուն առիթը կ’ընծայէ ծրագիրներ մշակելու, եւ հետեւաբար իրագործելու արեւմտահայերէնը այսօրուան իրականութեան կապող աշխատանքներ:
Հետեւեալ նպաստին կրնան դիմել, Լիբանան ապրող 18-35 տարեկան երիտասարդներ, որոնք կրնան նորարար արտայայտչամիջոցներու գործածութեամբ նախագծել իրենց ժամանակակից եւ բազմաբնոյթ իրականութեան առնչուող ստեղծագործ եւ նորարար ծրագիրներ, որպէս արտայայտչամիջոց ունենալով արեւմտահայերէնը:
Ծրագիրները կրնան ներգրաւել արուեստի տարբեր բնագաւառներ, գաղափարներ, փորձառութիւններ, եւ տարբեր զգացումներ արտայայտելու ստեղծագործական դրսեւորումներ, հետեւեալ ձեւաչափերուն ընդմէջէն՝
- Երգ, երաժշտութիւն։
- Գրականութիւն, (գիրքեր, լսողական գիրքեր, թերթեր, ամսագրեր, կայքէջեր, առցանց ներկայութիւն)։
- Թատրոն, կատարողական արուեստներ։
- Տեսողական արուեստներ։
- Միջգիտակարգային բնագաւառներ, որոնք գոյացած են արդի հաղորդակցութեան ձեւերու շնորհիւ։
- Տեսերիզներ, եւ այլ արտայայտչամիջոցներ՝ installations, animations, blogs, YouTube channels, podcasts, applications եւ այլն։
- Ձայնասփիւռի յայտագիրներ եւ այլ հեռարձակումներ (առցանց ծրագիրներ ինչպէս օրինակ՝ Mixcloud, SoundCloud, iTunes…)։
- Նորարարական եւ ստեղծագործական աշխատանոցներու ծրագիրներ։
Դիմումը արդէն բաց է բոլոր ստեղծագործ եւ նորարար անձերուն. փորձառու արուեստագէտ ըլլալը կամ «կատարեալ» ձեւով հայերէնին տիրապետելը պարտադիր չէ: Դիմելու պայմանաժամը 19 յունիս 2020-ն է:
Յաւելեալ տեղեկութիւններու եւ յստակացումներու համար դիմել Գայիանէ Մածունեանին՝ carmenias@gulbenkian.pt իմակին իբր վերնագիր նշելով՝ «Creative Culture Program – Lebanon»։
Գալուստ Կիւլպէնկեան Հիմնարկութեան Հայկական Համայնքներու Բաժանմունքին ներկայ ինչպէս նաեւ այլ ծրագիրներու մասին կարդալու եւ տեղեկանալու համար այցելել՝ https://gulbenkian.pt/armenian-communities/ կայքէջը։
