Հայաստանում կորոնավիրուսով վարակված 833 հոգուց 8-ը գտնվում է ծայրահեղ ծանր վիճակում: «Արմենպրես»-ի փոխանցմամբ՝ այս մասին «Ֆեյսբուք»-ի իր էջի ուղիղ եթերի ընթացքում ասաց Առողջապահության նախարար Արսեն Թորոսյանը:
«Մեր պացիենտներից մեծ մասը, նույնիսկ, ջերմություն չունի, սակայն ունենք 146 թոքաբորբ ունեցող քաղաքացի: Մոտ 35 հոգի գտնվում է ծանր վիճակում, 8 ծայրահեղ ծանր հիվանդ ունենք»,- ասաց Թորոսյանը:
Նախարարը նշեց, որ այս պահի դրությամբ՝ 1500 քաղաքացի գտնվում է մեկուսացման մեջ, իսկ հատուկ ցուցումով ինքնամեկուսացման մեջ է 5000 քաղաքացի:
Հայաստանում ապրիլի 6-ի՝ ժամը 11:00-ի դրությամբ կորոնավիրուսի հաստատված դեպքերի ընդհանուր թիվը 833 է, արձանագրվել է մահվան 8 դեպք: Ապաքինվածների թիվը 62 է:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Երկրում գործում է խիստ սահմանափակումների ռեժիմ։
