Վարչապետ Հասսան Տիապ երէկ հաւանական անկումէ մը փրկեց կառավարութիւնը, երբ յետս քաշեց Կեդրոնական Դրամատան պաշտօնեաներու նշանակումին խնդրայարոյց օրակարգը:
Տիապ ստիպուած այս քայլին դիմեց, երբ Մարատա կուսակցութեան նախագահ Սլէյման Ֆրանժիէ անդրդուելի մնաց իր կեցուածքին վրայ ինչ կը վերաբերի իր տուած անուններուն անպայման նշանակումին: հակառակ պարագային սպառնալով իր հովանաւորած նախարարներուն հրաժարումով:
Մարատա կուսակցութեան հովանաւորութիւնը վայելող երկու նախարարներուն երէկուայ նիստէն բացակայումը արդէն յստակ կը դարձներ հրաժարականի սպառնալիքին լրջութիւնը:
Տիապ չուզեց վտանգի ենթարկել իր կառավարութիւնը եւ նախընտրեց այս քայլին դիմել, աւելի եւս ժամանակ ունենալու նոր բանակցութիւններու:
