ԱՄՆ իշխանությունները հունվարից սկսած աշխարհի տարբեր երկրներից տարհանել են շուրջ 6 հազար դիվանագիտական աշխատողների ու նրանց ընտանիքների անդամների:
Ինչպես հաղորդում է «Արմենպրես»-ը՝ հղում կատարելով ՏԱՍՍ գործակալությանը, այս մասին հայտնել է պետդեպարտամենտի համակարգող Չարլզ Ռոզենֆարբը: Նա տեղեկացրել է, որ տարհանում եղել է տարբեր երկրներից, սակայն ամենաշատը՝ Եվրոպայից:
«Մեր բոլոր դեսպանատները և դիվանագիտական առաքելություններն ի վիճակի են կատարել հիմնական գործողությունները: Ներկայում ամբողջությամբ փակվել է միայն երկու տեղ: Մեկը՝ Վլադիվոստոկում, որտեղ բոլոր ծառայություններն ու աշխատակազմը տեղափոխվել են Մոսկվա, երկրորդը՝ Ուհանում»,-նշել է նա:
Նոր կորոնավիրուսի առաջացրած հիվանդության բռնկումը 2019-ի վերջում գրանցվել է Կենտրոնական Չինաստանում, այնուհետև տարածվել 190-ից ավելի երկրում և մարտի 11-ին Առողջապահության համաշխարհային կազմակերպության կողմից ճանաչվել համավարակ (պանդեմիա)։
