Փարիզի մէջ մահացած է Սուրիոյ նախկին փոխ նախագահ Ապտըլ Հալիմ Խատտամը։ Այս մասին լուրը հաղորդեց «Արեւելք»-ը վկայակոչելով լիբանանեան «Էլ Նաշրա» լրատուական կայքը։
Աղբիւրը նաեւ նշեց, որ Խատտամ երկար ժամանակով վարած է Սուրիոյ Արաբական Հանրապետութեան փոխ նախագահի պաշտօն։
Յիշեցնենք, որ Խատտամ, իր քաղաքական ասպարէզը սկսած է 1960-ականներուն դառնալով Համայի նահանգապետ։ Ան ազդեցիկ դերակատարութիւն ունեցած է վաղ ութսունականներուն, երբ նշանակուելէ ետք Սուրիոյ փոխ նախագահ (1984) դարձած է լիբանանեան թղթածրարի գլխաւոր պատասխանատուն եւ համակարգողը։
Մինչեւ 2005 թուական Խատտամ շարունակած է իր նշանակալի ներկայութիւնը Սուրիոյ մէջ, որմէ ետք ալ նախագահ Պաշշար Ասատին հետ իր ունեցած տարակարծութիւններուն հետեւանքով լքած է Սուրիան եւ հաստատուած՝ Ֆրանսա։
Սուրիոյ մէջ ծաւալած դէպքերէն անմիջապէս ետք Խատտամ հանդէս եկած է ընդդիմադիր դիրքերէ այդպիսով թիրախ դառնալով սուրիական իշխանութիւններուն։
Խատտամ 88 տարեկան էր։
