Հայաստանում կորոնավիրուսով վարակված անձանց նկատմամբ հսկողություն իրականացնող բժիշկներից մի քանիսը, իրենց համարելով ռիսկային, տուն չեն գնում, ոմանք գիշերում են հյուրանոցում: Պետությունը հոգում է բոլոր ծախսերը: «Արմենպրես»-ի փոխանցմամբ` այս մասին ասուլիսում հայտնեց ՀՀ առողջապահության նախարար Արսեն Թորոսյանը:
«Այն բոլոր բուժաշխատողների համար, որոնք այս հիվանդության դեմ բուժում և հսկողություն են իրականացնում այս պահին գործող երեք հիվանդանոցներում, ապահովվում են առաջին հերթին լավ կենցաղային պայմաններ: Սնունդ է ապահովվում, ապահովվում է տրանսպորտ` տուն գնալու կամ որոշ դեպքերում հյուրանոցում ապրելու համար: Կան բժիշկներ, որ որոշել են տուն չվերադառնալ` իրենց համարելով ռիսկային խումբ, որ տան անդամներին չվարակեն»,-ասաց Թորոսյանը:
Նախարարը նաև տեղեկացրեց, որ վերապատրաստվում է բժիշկների նոր խումբ, մոտ 50 բուժաշխատող է վերապատրաստվել` հերթափոխ իրականացնելու համար: Եվ այդ գործընթացը շարունակական է:
Կորոնավիրուսով վարակված անձինք բուժում են ստանում հիմնականում «Նորք» ինֆեկցիոն հիվանդանոցում: Նախարար Թորոսյանը մարտի 25-ին հայտնել էր, որ Վանաձորի և Գյումրիի ինֆեկցիոն հիվանդանոցների համապատասխան բաժանմունքներում ևս գտնվում են պացիենտներ, որոնք ախտանշաններ չունեն կամ շատ թեթև ախտանշաններ ունեն:
Մարտի 19-ին հայտնի էր դարձել, որ «Նորք» ինֆեկցիոն հիվանդանոցի բուժքրոջ մոտ կորոնավիրուս է հայտնաբերվել: Նախարարը մարտի 20-ին հայտնեց ևս մեկ բուժաշխատողի և վարորդի վարակված լինելու մասին:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն:
Մարտի 24-ի ժամը 23:59-ից մինչև մարտի 31-ը, ժամը 23:59-ն ՀՀ ամբողջ տարածքում սահմանափակված է մարդկանց ազատ տեղաշարժվելու իրավունքը:
Հայաստանում մարտի 26-ի՝ ժամը 10:00-ի դրությամբ կորոնավիրուսի հաստատված դեպքերի ընդհանուր թիվը 290 է: Հայաստանում մարտի 25-ին ժամը 19:00-ի դրությամբ կորոնավիրուսից ապաքինվել է 18 քաղաքացի
