Հայաստանում կորոնավիրուսով վարակված նոր 7 անձանց կյանքին ևս վտանգ չի սպառնում: «Արմենպրես»-ի փոխանցմամբ՝ այս մասին մարտի 19-ին հրավիրված մամուլի ասուլիսի ընթացքում ասաց ՀՀ առողջապահության նախարար Արսեն Թորոսյանը:
«Որևէ լուրջ խնդիր ունեցող կամ կյանքին վտանգ սպառնացող պացիենտ չունենք, հիմնականում չեն ջերմում: Նախ բժիշկների հսկողության տակ են, և երկրորդ՝ նրանց առողջական վիճակն իրոք լավ է»,- ասաց Թորոսյանը:
Առողջապահության նախարարն ավելի վաղ հայտնել էր, որ կորոնավիրուսով վարակված մյուս անձաց կյանքին ևս վտանգ չի սպառնում:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն:
Հայաստանում կորոնավիրուսի հաստատված դեպքերի թիվը 122 է: Առաջին դեպքը գրանցվել էր մարտի 1-ին: Քաղաքացին Հայաստան էր եկել Իրանից: Նա ապաքինվել է և դուրս է գրվել: Առաջնակի դեպքերից մեկն արձանագրվել է Էջմիածնում, մյուսը՝ Շենգավիթում՝ արտադրամասում։
