ՀՀ առողջապահությունը գնահատել է, թե բժշկական կազմակերպությունների ինչ կարողություններ ունեն, որքանով են պատրաստ կորոնավիրուսի հնարավոր ներթափանցմանը. բուժհիմնարկներին տրվել են ցուցումներ: «Արմենպրես»-ի հաղորդմամբ՝ այս մասին հրավիրված ասուլիսում հայտնեց ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը:
«ԱՀԿ-ից կողմից տրված մեթոդական ուղեցույցներ են մշակվել, թարգմանվել, տեղայնացվել և տրվել բոլոր ԲԿ-ներին: Մենք նաև գնահատել ենք բժշկական կազմակերպությունների կարողությունները, թե ինչքանով են պատրաստ, ինչ հագեցվածություն ունեն: Կարողությունները ամբողջովին գնահատված են, և համապատասխան բացերը լրացնելու համար նախարարությունից կա ցուցում: Զբաղվում ենք այդ գործընթացն իրականացնելով»,-ասաց Վանյանը:
Նա պարզաբանեց՝ գնահատումն իրականացրել են այն համատեքստում, որ եթե լինի բռնկում, մեծաթիվ հիվանդներ, ինչ գործողություններ պետք է արվեն: Գնահատվել են, թե որքան համազգեստներ, դիմակներ ունեն և այլն: «Եթե տեսնում ենք, որ բավարար չէ, լրացնում ենք կարողությունները: Այնպիսի վիճակ չէ, որ խնդիր ունենք: Եթե դեպքեր ունենանք, մենք պատրաստ ենք: Խոսքը բռնկման, համաճարակի մասին է, մենք նայում ենք, որ նաև ամենավտանգավոր դեպքերի զարգացման ժամանակ պատրաստ լինենք հիվանդներին ընդունելու»,-ասաց նա:
Անդրադառնալով դեղատներում պաշտպանիչ դիմակների նկատելի պակասին, որոշ դեպքում դրանց արհեստականորեն բարձրացված գներին՝ Վանյանը նկատեց՝ դեղատներում դիմակների պակասը վերաբերում է մի շարք երկրների: Նա հիշեցրեց, որ ՏՄՊՊՀ-ն արդեն հայտարարություն է տարածել՝ հորդորելով զերծ մնալ բժշկական դիմակների գների չհիմնավորված բարձրացումից: Այս խնդիրը հիմա համապատասխան ստորաբաժանումների կողմից քննարկվում է: Նախարարությունը որոշակի քանակի դիմակներ ունի, մոտ 160 հազար հատ ձեռք է բերվել: Եվ հիմա գործընթացներ են տարվում լրացուցիչ դիմակների քանակ ձեռք բերելու համար: Սակայն դրանք բուժհիմնարկների, այլ ոչ թե մարդկանց սպառման համար են:
Վանյանը շեշտեց՝ ընդունում է, որ դիմակների բացակայությունը խնդիր է, հիմա քննարկում են այդ հարցը, փորձում են լուծումը գտնել: Բուժհիմնարկները պատրաստ են, եթե դեպք լինի, կտրվեն դիմակներ՝ այդ թվում կոնտակտավորներին:
Հայաստանի Հանրապետությունում կորոնավիրուսի տարածումը կանխարգելող աշխատանքները համակարգող հանձնաժողովի փետրվարի 24-ի նիստում որոշում է կայացվել դադարեցնել ցամաքային հաղորդակցությունը Իրանի հետ, որտեղ արդեն գրանցվել են կորոնավիրուսով վարկման, ինչպես նաև մահվան դեպքեր: Իսկ Իրանի հետ օդային հաղորդակցության նկատմամբ կկիրառվի ոչ ամբողջական սահմանափակումներ: Սակայն Իրանի հետ բեռնափոխադրումները կիրականացվեն առանց սահմանափակումների՝ կիրառելով վարորդների նկատմամբ հատուկ հսկողության ռեժիմ:
