Սիրո բարեխոս Սուրբ Սարգսի տոնին Ն.Ս.Օ.Տ.Տ. Գարեգին Բ Ամենայն Հայոց Հայրապետի օրհնությամբ Ս. Սարգսի Աջը բերվեց Առաջնորդանիստ Ս. Սարգիս եկեղեցի, որով պատարագի Սրբազան հայրը օրհնեց հավատավոր ժողովրդին։ «Արմենպրես»-ի փոխանցմամբ՝ փետրվարի 8-ին լրագրողների հետ զրույցում Արարատյան Հայրապետական թեմի տեղեկատվական բաժնի հոգևոր համակարգող Տ. Եսայի քահանա Արթենյանը նշեց, որ հայ ժողովրդի շրջանում տոնի խորհուրդը հատկապես աստվածային սիրո մեջ է։
«Սուրբ Սարգսի տոնը մեր ժողովրդի համար ամենասիրելի տոներից մեկն է, և խորհուրդը մեր ժողովրդի մեջ տարբեր շերտերով բացահայտվել է՝ և՛ ժողովրդական ավանդույթների մեջ, և՛ հոգևոր իր ապրումների ու զգացումների մեջ։ Բայց, ամենակարևորը, ինչպես որ բոլոր սրբերի պարագայում, այնպես էլ Սուրբ Սարգսի պարագայում, այն սերն էր, որը սրբին առաջնորդում էր։ Պատահական չէ, որ այս օրը մենք հատկապես շեշտը դնում ենք այդ աստվածային սիրո դրսևորման վրա։ Սուրբը իր նահատակությամբ, քաջությամբ, մարդկային տեսակով հենց կրողն էր այդ սիրո, և ոչ թե բացատրեց այդ սերը, այլ ապրեց այդ սիրով։ Մեր ժողովրդի մեջ հենց այդ սիրո շեշտադրումն է, որ մարդիկ գալիս են խոնարհվելու սրբի հիշատակի առաջ՝ նրա բարեխոսությունը հայցելով»,- ասաց Արթենյանը։
Նա նշեց, որ Սուրբ Սարգիսը, լինելով ազգությամբ հույն, հայերի մեջ բացառիկ ընդունելության արժանացավ, հատկապես իր արագահաս բարեխոս լինելով։
Սուրբ Սարգսի Աջը եկեղեցում կմնա մինչև երեկոյան ժամերգությունը: Տոնական Ս. Պատարագը նվիրված է Ս. Սարգիս զորավարի, նրա Մարտիրոս որդու և 14 զինվորների հիշատակին:
