Ուկրաինայի Հանրապետության նախագահ Վոլոդիմիր Զելենսկին պնդում է, որ Իրանը ամբողջությամբ պետք է ընդունի մեղքը Թեհրանի օդանավականի մոտակայքում կործանված ուկրաինական ուղևորատար ինքնաթիռի խոցման համար: Ինչպես տեղեկացնում է «Արմենպրես»-ը, Զելենսկին այս մասին գրառում է կատարել «Ֆեյսբուք»-ի իր էջում:
«Այս առավոտը լավը չէր, բայց այն բերեց ճշմարտություն: Դեռ միջազգային հանձնաժողովի աշխատանքների ավարտից առաջ Իրանը իրեն մեղավոր ճանաչեց ուկրաինական ինքնաթիռի խոցման համար: Բայց մենք պնդում ենք, որ Իրանն ամբողջությամբ ընդունի մեղքը:
Մենք Իրանից ակնկալում ենք լիարժեք և բաց հետաքննության պատրաստակամություն, մահացածների մարմինները վերադարձ, փոխհատուցման վճարում, դիվանագիտական ուղիներով պաշտոնական ներողություն, ակնկալում ենք, որ մեղավորները պատասխանատվության կենթարկվեն»,- ասել է Զելենսկին:
Ավելի վաղ, Իրանի զինված ուժերի գլխավոր շտաբը հայտարարել էր, որ Թեհրանի օդանավականի մոտակայքում կործանված ուղևորատար ինքնաթիռը պատահականորեն խոցվել է մարդկային սխալի հետևանքով։
Իրանի գլխավոր շտաբի հայտարարության մեջ նշվում է, որ ինքնաթիռը խոցվել է, քանի որ այն կարևոր ռազմական օբյեկտին մոտ է թռել։ Նշվում է նաև, որ դա տեղի է ունեցել «բարձրացված մարտական պատրաստվածության» պայմաններում՝ կապված Իրանի հրթիռային հարվածներին ԱՄՆ-ի հնարավոր պատասխանի հետ:
Իրանի նախագահ Հասան Ռոհանին պատրաստակամություն է հայտնել միջոցներ ձեռնարկել փոխհատուցման համար։ Միևնույն ժամանակ, նա հայտարարել է, որ Թեհրանը շարունակելու է ինքնաթիռի վթարի հետաքննությունը:
Հունվարի 8-ին «Ուկրաինայի միջազգային ավիաուղիներ» ընկերության մարդատար Բոինգ -737 ինքնաթիռը կործանվել էր Իրանի օդանավակայանի մոտակայքում։Անձնակազմի անդամները և բոլոր ուղևորները՝ 176 մարդ, զոհվել են։
