Սիրելի բարեպաշտ ժողովուրդ ի հայրենիս եւ ի սփիւռս,
Ամանորի տօնական այս երեկոյ Մայր Աթոռ Սուրբ Էջմիածնից հայրական սիրով Մեր օրհնութիւնն ու շնորհաւորանքներն ենք բերում ամէնքիդ:
Ամանորը ժամանակի իւրօրինակ սահմանագիծ է հնի եւ նորի, անցեալի եւ ապագայի միջեւ եւ առիթ՝ գնահատելու անցած ուղին, արարուած լաւն ու բարին, թոյլ տրուած սխալները, որովհետեւ դրանց անկեղծ ու շիտակ գնահատականն է պայմանաւորում այն տեսլականն ու ակնկալութիւնները, որոնցով մուտք ենք գործում 2020 թուական:
Անցնող 2019 թուականը պետական կեանքի վերակազմակերպման, նոր ծրագրերի, իրագործումների ժամանակ եղաւ: Հայրենական, ազգային եւ հոգեւոր մեր անդաստանում ունեցանք յաջողութիւններ: Դրական իրագործումների կողքին տակաւին առկայ են հրատապ լուծման կարօտ խնդիրներ եւ նոր մարտահրաւէրներ, որոնք պահանջում են մեր ողջ ժողովրդի համատեղ ջանքն ու աշխատանքը: Իւրաքանչիւրիս ծառայանուիրումի ոգին, պատասխանատուութիւնն ու դաւանած արժէքներն են, որ պիտի իրական դարձնեն հզօր հայրենիքի, պայծառ ապագայի մեր տեսիլքները:
Նոր տարին նոր սկիզբ է մեր կեանքը նորոգելու եւ առաջընթացի ուղիներում հաստատուն պահելու: Մենք բոլորս պատասխանատու ենք մեր ապրած իւրաքանչիւր օրուայ համար: Պատասխանատու ենք Աստծոյ, մեր պատմութեան, մեր նախնեաց եւ սերունդների առջեւ: Հայրապետիս յորդորն ու պատգամն է, սիրելիներ, որ այս գիտակցութեամբ անենք առաւելագոյնը Հայաստանն ու Արցախը հզօրացնելու, մեր կեանքը խռովող երեւոյթները փարատելու, ամրապնդելու համերաշխութեան ոգին մեր հասարակութեան մէջ եւ միասնականութիւնը ազգային մեր կեանքում: 2020 թուականը հայրենաշինութեան եւ ազգային կեանքի պայծառացման տարի դարձնենք միմեանց հանդէպ սիրով, բարու մէջ մեր նախանձախնդրութեամբ եւ միշտ ապաւինելով Աստծուն, քանզի ինչպէս սաղմոսերգուն է ասում,- «Տէրը մօտ է բոլոր նրանց, ովքեր կանչում են Իրեն, բոլոր նրանց, ովքեր կանչում են Իրեն ճշմարտապէս» (144:18):
Ամանորի այս յուսառատ պահին Մեր ջերմ բարեմաղթանքներն ենք բերում ամէնքիդ՝ պաշտօնեայ, գործարար, մտաւորական, արուեստագէտ, հողի մշակ ու աշխատաւոր, բոլոր բոլորիդ, ում ջանքերի, հաւատքի, նուիրումի շնորհիւ զօրանում են կամքն ու վճռականութիւնը կերտելու մեր հայրենիքի ու ժողովրդի անկասելի առաջընթացը: Հայրապետիս սէրն ու բարձր գնահատանքը՝ Հայոց բանակի իւրաքանչիւր քաջարի զինուորին: Մեր աղօթքն ու օրհնութիւնը՝ նոր տարին ծառայութեան մէջ դիմաւորողներին եւ այս պահին ընտանեկան օջախից հեռու գտնուողներին: Աղօթենք միասնաբար Մերձաւոր Արեւելքում դժուարութիւններ դիմագրաւող մեր ժողովրդի զաւակների, նաեւ նեղութեան մէջ գտնուողների, հոգով եւ մարմնով տկարների համար:
Մեր աղօթքը բարձրացնենք աշխարհի խաղաղութեան համար՝ հայցելով, որ Բարին Աստուած Իր Սուրբ Աջի ներքոյ պահպանի մեր հայրենիքը, մեր ժողովրդին ի սփիւռս աշխարհի եւ արդիւնաւորի Հայաստանի եւ Արցախի մեր իշխանութիւնների ջանքերը դարերով փայփայած անկախ պետականութեան զօրացման ճանապարհին:
Թող Փրկիչ մեր Տիրոջ սէրն ու առատ շնորհները միշտ ձեզ հետ լինեն, հովանի՝ ձեր կեանքին եւ ձեր ընտանիքներին:
Շնորհաւոր նոր տարի:
