Գյումրու Տեխնոլոգիական կենտրոնում նոյեմբերի 23-ին մեկնարկեց «Մարզերի հզորացումը բարձր տեխնոլոգիաների խթանմամբ» համաժողովը: Արդեն երրորդ անգամ անցկացվող համաժողովի առանցքային թեմա է ընտրվել մարզային բարձր տեխնոլոգիական կրթական մոդելների մշակումը՝ միջազգային գործընկերների և բուհերի հետ համագործակցությամբ։ Այս տարի համաժողովը հյուրընկալել է ոլորտով հետաքրքրված ավելի քան 200 երիտասարդի՝ ՀՀ բոլոր մարզերից:
Ինչպես տեղեկացնում է «Արմենպրես»-ը երկօրյա համաժողովն անցկացվում է Ձեռնարկությունների ինկուբատոր հիմնադրամի, Գյումրու տեխնոլոգիական կենտրոնի, ՀՀ կառավարության, Շիրակի մարզպետարանի, Գյումրու քաղաքապետարանի և Եվրոպական միության ու Գերմանիայի տնտեսական համագործակցության և զարգացման դաշնային նախարարության կողմից;
Համաժողովն իրականացվում է «Աջակցություն ՓՄՁ զարգացմանը Հայաստանում» ծրագրի հետ համատեղ, որը համաֆինանսավորվում է Եվրոպական միության և Տնտեսական համագործակցության և զարգացման դաշնային նախարարության, Գերմանական զարգացման համագործակցության (GIZ)-ի կողմից , «Աջակցություն ՓՄՁ զարգացմանը Հայաստանում» ծրագրի միջոցով։
«Համաժողովի նպատակն է ՀՀ բոլոր մարզերի երիտասարդներին, տեղական ինքնակառավարման մարմինների և մարզային ուսումնական հաստատությունների պատասխանատուներին, ինչպես նաև մասնավոր հատվածի ու միջազգային կառույցների ներկայացուցիչներին մեկ միջավայրում համախմբելը, բարձր տեխնոլոգիաների, ճարտարագիտության և հարակից ոլորտների բարձրագույն կրթության, բիզնեսի զարգացման ու ենթակառուցվածքային խթանիչ միջավայրի ձևավորմանն ուղղված գործընթացները և առկա մարտահրավերները քննարկելը, մարզային հաջողված փորձերը ներկայացնելն ու փորձի փոխանակումը` հիմք ընդունելով Բարձր տեխնոլոգիաները՝ որպես մարզերի հզորացման երաշխիք»,- իր խոսքում նշեց Ձեռնարկությունների ինկուբատոր հիմնադրամի ծրագրերի ղեկավար Ամալյա Եղոյանը։
Ողջունելով համաժողովի բոլոր մասնակիցներին ՀՀ բարձր տեխնոլոգիական արդյունաբերության նախարար Հակոբ Արշակյանը կարևորեց հենց մարզերում նման համաժողովների անցկացումը: «Մենք առաջնահերթ ենք համարում մարզերի զարգացումը՝ ստեղծելով նոր կրթական կենտրոններ: Մենք ունենք այն վստահությունը, որ Հայաստանը կապահովի տեխնոլոգիական առաջընթաց և պետք է դառնա ու կդառնա բարձր տեխնոլոգիական արդյունաբերական երկիր՝ իր հետևից տանելով ռազմարդյունաբերության և թվայնացման ճյուղը: Մեր ամբողջ հույսը կրթվող ու նորը սովորող սերունդն է»,-նշեց ՀՀ բարձր տեխնոլոգիական արդյունաբերության նախարար Հակոբ Արշակյանը:
«Շիրակի մարզի համար մեծ պատիվ է Երևանից դուրս դառնալ բարձր տեխնոլոգիաների «արտահանող» միջավայրերից մեկը: Իրապես Շիրակն ունի տեխնոլոգիական ամբիցիաներ ու այդ ամբիցիաները բավարարելու գործողություններ: Իմ համար շատ ոգևորող է մի քանի օր առաջ արված հայտարարությունը, որ ՀՀ բարձր տեխնոլոգիական ու ռազմարդյունաբերական բյուջեն քառապատկվելու է՝ 2 մլրդ դրամ ստարտափերի համար, 6 հազար մարդու վերապատրաստում՝ մեկ տարում: Սրանից Շիրակի մարզն օգտվելու է, իսկ այսուհետ ոչ մի ոլորտի զարգացում առանց բարձր տեխնոլոգիաների զարգացման չի լինելու»,-իր խոսքում նշեց Շիրակի մարզպետ Տիգրան Պետրոսյանը:
Համաժողովի պաշտոնական բացման արարողությունից հետո մեկնարկեցին պանելային 3 քննարկումներ՝ «Երիտասարդ մասնագետները առաջատար տեխնոլոգիական ընկերություններում՝ հնարավորություններ և մարտահրավերներ», «Բարձր տեխնոլոգիաները մարզերում` առաջնահերթությունները և մարտահրավերները» և «Բարձրագույն կրթությունը որպես մարզերի տեխնոլոգիական զարգացման գրավական»:
Համաժողովի 2-րդ օրը՝ նոյեմբերի 24-ին, միջազգային և տեղական փորձագետների կողմից կանցկացվեն սեմինարներ և առաջատար բիզնես մասնագետները կկիսվեն մասնակիցների հետ իրենց փորձով:
Արմենուհի Մխոյան
