Հայաստանի Հանրապետական կուսակցության նախագահ, Հայաստանի Հանրապետության 3-րդ նախագահ Սերժ Սարգսյանը մասնակցում է Զագրեբում (Խորվաթիայի Հանրապետություն) ընթացող Եվրոպական Ժողովրդական կուսակցության (ԵԺԿ) համագումարին, որտեղ հանդես է եկել ելույթով:
Ի թիվս շատ հարցերի, երրորդ նախագահը խոսել է նաև ղարաբաղյան հակամարտության բանակցային ներկա փուլի մասին: Անդրադառնալով Ադրբեջանի ագրեսիվ հայտարարություններին, Սերժ Սարգսյանը նշեց. «Արցախյան հակամարտության ներկայիս բակցային փուլը ինձ մոտ մտահոգություններ է առաջացնում: Որպես մարդ, ով մասնակցել է արցախի ինքնապաշտպանական գործընթացին, ես շատ լավ գիտեմ խաղաղության արժեքը: Այս տեսակետից ցանկացած, անգամ վատ բանակցություն գերադասելի է պատերազմից:
Շատ կարևոր է, որ Մինսկի խմբի համանախագահների միջնորդական ջանքերը ստանան միջազգային հանրության անվերապահ աջակցությունը: Ցավոք մենք ականատես ենք, թե ինչպես է Ադրբեջանը շարունակվում զինվել ու սպառնում Արցախին ու Հայաստանին: Ուզում եմ, որ Բաքուն կրկին լսի իմ այս ուղերձը: Արցախը երբեք չի լինելու Ադրբեջանի կազմում և այս խնդիրը չունի ռազմական լուծում»,- ասաց Սարգսյանը:
