Ժամանակակից գրող Տիգրան Գաբոյանը հոկտեմբերի 4-ին Հայաստանի գրողների միության անդամներին ներկայացրեց թվով երրորդ՝ «Ճեղքերս քաղաքակրթությունների պատերով» բանաստեղծական ժողովածուն:
«Տիգրանի բանաստեղծություններին ծանոթ էի մամուլից: Ամփոփ մի գրքում նրա նկարագիրն ավելի հստակ է դառնում: Հեղինակի բանաստեղծական մտածողությունը գիտեի, բայց նա ինձ երբեմն հանկարծակիի էր բերում: Նրա լեզվամտածողությունը, պատկերային, բանաստեղծական մտածողությունը շատ հետաքրքիր են արտահայտվում այս գրքում: Այստեղ արտացոլվել են վերջին տարիներին Սիրիայում տեղի ունեցած դաժան իրողությունները, որոնց ականատեսն է եղել գրողը, և նրա կենսափորձը դարձել է բանաստեղծություն»,-«Արմենպրես»
Նա շեշտեց, որ Տիգրանն իր բանաստեղծական խոսքը մոտեցնում է մարդու հոգուն, և դրանցում կա սեր, մարդկություն:
Տիգրան Գաբոյանն էլ նշեց, որ իրենց շատերն են քաջալերել հրատարակել ժողովածուն: Ինքն արդյունքից գոհ է:
Տիգրանն իրեն խորը հայաստանցի և ծանրակշիռ սփյուռքահայ անվանեց: «Որպես քաղաքակրթական արժեք, սփյուռքն ինձ տառապեցրել է: Հայաստանն ու հայաստանակենտրոնությունն իմ կյանքում միշտ առկա էին: Առաջին բանաստեղծությունս նվիրված էր Մասիսին: Կարծում եմ` պոեզիան եկավ ամբողջացնելու Հայաստանի հանդեպ կարոտը»,-խոստովանեց գրողը:
Գիրքը լույս է տեսել ՀՀ կրթության, գիտության, մշակույթի և սպորտի նախարարության, Հայաստանի գրողների միության նախաձեռնությամբ:
Այն հրատարակվել է 300 օրինակ տպաքանակով. շուտով դրանք կլինեն գրախանութներում:
Տիգրան Գաբոյանն առաջին՝ «Դեպի երկինք արձակված նետ» գիրքը գրել է 1995 թվականին, իսկ երկրորդ՝ «Անմաս» գիրքը՝ 2003-ին: Գաբոյանը նաև արաբերենի թարգմանիչ է, գրական-մշակութային գործիչ, Հայաստանի գրողների միության անդամ և միջազգային հարաբերությունների մագիստրոս:
